月入$13,000用$1700買潮鞋 然後我後悔了
廣告
文：Purple弟弟
新一年就快到啦，筆者都提早買咗份禮物俾自己！身為香港地男仔，想買衫買鞋都要食炒價，款又唔似女裝咁多選擇，想買對正常純黑或者純白鞋款無四位數都走唔甩，所以我都只係一年換一對鞋。
上年我就用咗大約＄1,200左右買左對全黑籃球鞋，今年再上鞋鋪睇，同一款鞋已經賣緊＄1,500。最後無理由又買全黑，於是花咗$1,700蚊買咗對全白嘅款，對於人工只有$13,000嘅我嚟講都算係奢侈品。
買完鞋第二朝，我就決定著佢返工！望住純白無瑕嘅乖鞋子，返工心情都冇咁低落。
列車到站：「請先讓乘客落車，多謝合作！」港鐵職員同廣播系統一齊無限loop呢一句句子，而我係一個守法好公民，雖然排緊頭位，但都好有耐性咁等人落車先，
反而企喺我後面嘅乘客就好心急，用眼神不停問候我母親：
「xxxx，行入去啦死𡃁仔！」
終於佢地等唔切，開始推我入車廂，不停咁踩到我鞋尾，我嘅乖鞋子就咁俾人污染咗！
返工時段車廂人貼人就一定㗎啦，我算好運，搵到位置可以扶手，難為身邊嘅打工仔要練平衡，見到都覺辛苦。
車一開，唔知邊條友仔平時唔練好打工仔下盤基本功，失重心撞向其他人，要停止呢個衝擊，最後當然係撞到有扶手嘅我先得已平息。
「Sorry啊，踩到你！」
唔踩都踩咗啦，我可以點。
「唔緊要！」
我嘅乖鞋子又受辱了。
大約比人踩咗10下左右，我成功由天水圍到達觀塘！行過工業區，即使天清氣朗，都總會有幾攤積水，加上舊區重建，到處都係泥沙飛濺。
行到返公司，對新鞋已經有幾撻污漬，我欲哭無淚。
