後生仔仲有冇5仔主義 車仔屋仔老婆仔
以前大學生有「五仔主義」，做「打工仔」可以有「屋仔、老婆仔、細路仔、車仔」，而家一樣係，不過全部走哂樣，真係聞者傷心！
屋仔：未畢業排公屋
最近公布的公屋輪候冊數字，單身非長者申請超過14萬宗，佔總輪候冊數目一半，而學生竟然佔單身非長者申請四成。
以前大學生好有目標，勢要住洋樓，夢想係住九龍塘豪宅，實際嚟講就俾心機打工，好快儲夠錢買私樓，安安穩穩咁過日子。而家大學生未畢業就排定隊上公屋，私樓首期俾唔起，稍為平少少既居屋又爭崩頭。仲諗九龍塘？上唔到公屋的話，係市區有間「高級劏房」算好好啦！
老婆仔：要肯捱麵包兼幫手供樓
早前有單超爆新聞，話一個80後港男娶左個女護士，男月儲三千，女月儲一萬，仲要一齊捱麵包，拍拖行公園，行路返工，死慳死抵先上到車。
以前嫁畀大學生，可以做少奶奶，只要氹得掂老爺奶奶，就真係生活無憂。依家？各位港女要醒下啦，嫁畀大學生唔單止要繼續打工捱騾仔，仲要幫手供樓，隨時仲要供份大既，死未！
BB仔：最好唔生
舊時大學生都想生返幾個仔女，養埋隻番狗，一家人幾代同堂，熱熱鬧鬧。而家？李麗珊話生個小朋友洗費起碼400萬元，Sorry，呢個廣告已經係十年前，計埋近幾年的通脹，可能已經升到600萬，700萬元，真係做到隻積都養唔起。
你睇香港出生率咁低，就知年青一代聽到生仔已經怕怕。家計會仲呼籲人哋生四、五、六個BB，真係啋佢都傻。
車仔：日日迫巴士地鐵
買架車威水下係以前大學生目標，出入都方便啲。而家大學生日日迫地鐵(上唔到就等多一班囉)、趕巴士(班次疏、唔準時係基本)。如果見到架靚車快速駛過，通常會加把口「車！二世祖」……
打工仔：政府工爭崩頭
以前政府工人工升幅慢，所以冇人吼。1997年前考政府工真係好容易，中三畢業都可以輕易考到懲教署、入境處等紀律部隊。
主要原因係以前大學生畢業後一心一意走去做銀行、金融，要係商業世界闖一番事業。就算有考政府工，冇主任級或督察級以上都唔好諗。
而家的大學生，反而好恨打政府工，紀律部隊冇督察級職位都唔緊要，散仔級超殺，就算做人工較低的政府文職都唔緊要，起碼工作夠悠閒，準時收工及出糧最緊要。
