上一代打工心態 月薪$12,000當正間舖係自己開
廣告
文：Purple弟弟
作為一個平凡到不能再平凡嘅屋邨仔，父母都係靠打份牛工賺錢，辛辛苦苦供書教學養大我，雖然生活稱不上衣食無憂，但都好感謝雙親嘅養育之恩！人大咗，父母都開始同自己分享多咗工作上嘅事情，但我永遠都唔明，佢哋講到好激動嘅事，往往喺我角度嚟講只係有如雞毛蒜皮。
以我媽咪為例，佢做零售業，都叫做係資深員工，有時放假佢電話都會不停響起！不外乎都係其他同事問佢啲嘢擺喺邊，價錢折扣嗰啲點做之類。
「唉好煩啊係咁打嚟！」
「你放緊假，可以唔聽。」
「唔得㗎，佢哋唔識會做錯晒！」
「咁關你咩事……」
「唉你唔明…」
我真係唔明，你人工只係高過佢哋$500，得嗰$12,000蚊返6日，每日踩10個鐘，咁上心做咩。最慘就係佢哋仲會為咗呢啲人哋嘅事，食唔安坐唔落，同佢行行吓街，佢都會走咗去打電話，精神長期崩緊，作為佢個仔望到都覺得心痛無奈。
「啊仔，你等我一陣，我驚阿Mary搞錯啲數，我都係打返去公司問問。」
隔咗一陣，又驚自己有甩漏。
「死啦，琴日呢隻洗面奶開始做優惠價，我有冇轉價錢牌呢？唉都係打返去問下好啲。」
當你以為終於無事發生，可以同媽咪享受天倫之樂。
少年你太天真，佢哋可以天馬行空咁創造問題出嚟。
「死啦，我琴日好似漏咗同個客講歡迎光臨，死啦，佢個樣好似神秘顧客……又要俾人照肺啦今次！」
唔怪得各行各業都鐘意請我媽咪呢啲年齡層嘅做低下層，因為請佢哋好多時都唔需要高人工，又上心負責！我係呢到代表香港嘅有錢人，向母親你奉上最高敬意！獅子山精神無得頂！
