完成工作唔代表準時收工 因為老闆覺得咁樣唔勤力 | 職場入門

完成工作唔代表準時收工 因為老闆覺得咁樣唔勤力 | 職場入門

【職場入門】「頂!個客收咗工!我只係遲咗五分鐘啫,點解個天要咁對我啊?」

「係啊~呢間鬼佬公司,好鬼懶㗎。」多年來已經習慣加班嘅我,最討厭就係某啲客,食飯又準時!放工仲準時過銀行關門!偶爾有急事要搵佢哋幫手,點知一打電話去就收咗工…

以上提及嘅鬼佬公司,唔單止食飯同放工準時,佢哋老闆為咗唔想員工返工塞車,上班時間係早上9:30。

但諗深一層,點解佢哋咁「懶」,間公司都生存到?

大家諗真啲,每日準時放工喎!老實講而家加班一粒鐘係好基本,全公司十個員工,每日工作就少咗十個鐘,點搞得掂啊?!

無錯,當我哋已經習慣咗香港嘅加班傳統,就會疑惑點解咁多外國國家,工時咁短都生存到?

定其實…係我哋香港「加班為常態」嘅問題?

我好記得當初返工,第一星期放工同事同我講:「有得準時收工好走啦~」

當時我心諗唔通公司好多嘢做?但過咗一個月,我完全接手離職同事嘅工作,照樣準時完成工作。

但,同事好溫馨咁提示我。

「同事同事~雖然我知道你做晒嘢,但老闆唔鍾意人哋咁準時收工嘅。」

「老闆唔鍾意員工準時?」我問。

「唔係,老闆覺得準時走嘅員工唔太勤力。」

「但我做晒嘢喎。」我。

「我都知嘅,其實全公司同事都做晒嘢,但需要加班囉。」

呢一刻,全公司同事向我擺出一個無奈嘅微笑…

同事話老闆雖然唔喺公司,但會用Apps去睇公司個閉路電視,所以大家就算留喺度上網,都要對住個電腦呆坐。

到底老闆係咩心態,寧願全部員工發呆,浪費公司電力,嚟證明所有人都好勤力工作?

我好記得,讀書咁多年,任何考試都係有「時限」。考生需要喺限時內回答試劵所有問題,就算你識答晒但唔夠時間,都係無分嘅。

所以考試除咗溫書,仲講求答題效率。

但點解出到嚟工作,會變成工作時間愈長,先拎到愈高分?

可能…呢樣就係讀書同工作最大嘅分別。

相關文章:

6種表面風光的職業 實際相當難頂

返工好受氣 7種衰同事令人要辭職

關鍵詞
上司職場