代理乜都Sell  唔識易中伏

代理乜都Sell 唔識易中伏

日前到紅磡新盤傲形的展銷場地睇示範單位。
代理:「有興趣不如入張飛,呢個盤咁抵,入咗飛都要抽。」

筆者:「我覺得呎價貴咗啲,返去考慮吓先。」

代理送筆者離開會場,到了商場大門,代理熱切告別時說:「如果呢個盤唔啱,有冇興趣睇吓其他?」
筆者:「有咩好嘢?」
代理:「嚟緊東九龍有個新盤峻瀅二期。」
筆者:「嗰度係日出康城,唔係東九龍喎。」
代理:「日出康城咪即係將軍澳,將軍澳咪即係東九龍。」
筆者:「日出康城我興趣嘛嘛,到時睇吓得唔得閒。」

筆者離開商場,十分鐘後,又收到代理電話。
代理:「除咗住宅外,仲有好多細銀碼筍盤諗唔諗?」
筆者:「仲有?」
代理:「係呀,葵涌智慧型工廈,24小時出入,200萬、300萬元入場。」

筆者:「係咪講緊iPLACE?」
代理:「係呀,銀碼咁細,好值得投資。」
筆者:「我响葵涌都有投資工廈,分契拆細,100萬元入場。」
代理:「點同呢?呢個靚好多!」
筆者:「唔啦,我哋自己拆細單位,冇理由去買人哋啲細單位。」
代理:「咁……仲有個,一定啱你!」
筆者:「咩呢?」
代理:「幾百萬元可以做舖位業主!有冇聽過現時點?」
筆者:「唔啦,我有投資街舖,商場舖我嘛嘛。」
代理:「舖位喎!好有潛力架!」
筆者:「我都係鍾意街舖多啲,忙緊,再傾!」

住宅、工廈、商舖樣樣SELL

今次節錄的對話多咗啲,不過真係幾有趣。依家做代理,真係乜都Sell。看到他們很有計劃,今次「傲形」主打細單位、細銀碼,就從這個角度出發,除咗住宅,同樣是以細銀碼為賣點的工廈、商場舖都不放過。

以往,住宅、工廈、商廈、商舖是幾個不同的市場,各有捧場客,尤其是工商舖,大部分都是資深投資者,或是業內的生意人。例如買工廈的,多數是工業出身,或者有用工業大廈經營生意的投資者,否則好地地,點會無端端去睇工廈?

近年政府不斷出招,迫使很多投資者要擴闊眼界,學習投資工商舖。從此,即使是某某屋苑的投資者、師奶兵團,都開始投資工商舖。

至於代理,為搵兩餐,住宅交投少,冇生意,就自然乜都賣。正如日前Sell我的代理,望埋去都唔知大學畢業未,熟識住宅已經好叻,點可能識得投資工廈?投資商舖?都係照稿背啫。

買工商舖前要裝備自己

買家方面,其實都係玩開住宅多,因為這幾年賺了錢,身痕,聽見話平,兩、三百萬有交易,咪走去搏一搏,有幾多真係識?

之前有好幾個商場已經出事,據聞中原集團施永青先生亦指示旗下同事唔可以隨便推銷這些商場。擴闊眼界,涉獵工商舖是應該的,然而投資前必須好好裝備自己,否則蝕錢無人可憐。