股市大跌後，樓價會大跌嗎？

筆者： 「前日睇嗰個筍盤，代理傾到差唔多啦，準備首期。」
同學： 「要幾多錢呀？」
筆者： 「樓價350萬元，首期35萬元，連埋厘印預43萬元先。」
同學： 「最遲要幾時畀？」
筆者： 「15萬元細訂明天畀，其餘14日內上律師樓畀埋。」
同學： 「咁急？過兩日得唔得呀？」
筆者： 「你唔係話已經有60萬元準備好咩？」
同學： 「我買晒股票，之前跌淨40幾萬元，而家有50萬元。」
筆者： 「咁一係我畀第二個同學啦。」
同學： 「唔好，我轉頭賣晒佢，兩日後應該收番錢。」

股市升得急 亦可跌得甘

同學順利簽訂臨時買賣合約。但4月底股市再升多一段，當時同學都有點後悔，如果遲兩個星期先買樓，他的投資組合可能會再多幾萬元進賬。

然而這份後悔，很快就變成慶幸，因為股市在高位受阻，上星期更跌到反艇，同學之前買的股票亦打回原形，如果持貨至今，可能只剩30幾萬元。

同學： 「早幾日股市跌到阿媽都唔認得，真係輸死人！」
筆者： 「升得急，自然跌得甘，好正常！」
同學： 「好在我早兩個月攞晒啲錢畀首期，避過一劫。」
筆者： 「整定。」
同學： 「如果之後再跌，唔知到時再買會唔會平啲？」
筆者： 「又後悔？」
同學： 「唔係，諗吓啫！」
筆者： 「如果股市再跌，樓價就算跟住跌，你有冇錢買？」
同者： 「咁又係，我計過如果持貨到今日，剩番30幾萬元。」

筆者： 「如果再跌多一浸呢？」
同學： 「我可能會愈買愈大，成個首期輸晒都似。」

師傅教落，股市跌，樓價都難獨善其身。過往的經驗是，股市約比樓市行快三個月至半年，以2008年為例，股市於2007年底見頂，樓市則於2008年中開始下滑，短短半年就跌了三成，租金亦跌兩成，非常恐怖。

如果股市繼續下跌，相信樓市亦無可避免。不過比較2008年的跌市，是全球性的金融危機，今次的跌市，純粹是因為中央政府4月初，硬將股市炒高的惡果。

在大陸投資多年的朋友說：「中國的股市，水很深！」意思是很多企業質素其實不高，上市純粹為賺股民錢而已，是無底深潭。

香港股民今輪損失有限

大陸政府將今次跌市，歸咎於有外資惡意沽空，呼籲股民齊齊抵抗外敵，真的因為外資惡意沽空嗎？筆者所見，只是莊家、高手，將股價炒高了，賺了錢，就走，沒打算跟你長遠發展而已！

加上大爸、大媽賭性爆發，唔理間公司做乜，都瞓身賭一舖。升得急，跌得甘，市況走勢應當如此。可幸香港股民見慣風浪，以身邊的朋友來看，今次損失不算慘重。

既然損失不算慘重，樓市何來大跌呢？不過筆者同意短期內市場氣氛會差，會有不少散戶因為輸了股票要賣樓套現，市場會有減價盤湧現，想買樓的朋友可以留意。

最重要是，如果股市繼續跌，樓價跌多一成，有錢買嗎？4月的升市，個個都係股神，看見身邊的朋友無端端賺大錢，很多散戶都按奈不住，要一試身手。

以同學為例，如果持貨至今，原本60萬元首期只會輸剩不到40萬元，再跌？隨時得番20萬至30萬元，仲夠錢畀首期咩？身邊好多朋友都話，等樓價跌，筆錢炒住股先，除非你炒股好叻，否則呢個策略結果通常都係首期都輸埋。