鬼叫你係公司低層 做上司唔需要有時間觀念

鬼叫你係公司低層 做上司唔需要有時間觀念

放工前十五分鐘,大家都搏晒命完成手頭上工作,務求準時收工!呢個係每個打工仔嘅使命,但或者呢啲就係命運…

「我都知道就嚟放工,但阻大家三分鐘,開個會講兩句。」上司。

就係咁,呢個會開咗足足半個鐘,每個同事黑晒面咁出返嚟,上司若無其事咁坐返埋位做嘢。

作為公司最底層,你當然唔可以投降,亦唔能夠舉手同上司講已經夠鐘收工,有咩留返聽日再講。

因為上司嘅會議,比起你私人時間更重要!

就算唔係有緊急會議,臨放工前上司都會交托工作畀你。

「記得將呢份文件搞掂之後畀我簽名,我今日一定要畀到個客!」上司。

你望一望手錶,好彩仲有十分鐘時間,你趕到幾乎瀨屎去趕工,人生史無前例咁有成就感,你立即衝入上司房,發現…

上司去咗開會!

你坐返埋位,一分一秒咁過去。如果貿然收工,隔日一定會畀人鬧不負責任,唯一可以做嘅做係等…

6:30PM,上司終於出嚟。

一句:「哎~唔好意思,開會開耐咗,要你等添。」

睇佢表情同語氣,你完全唔覺得佢「唔好意思」。

因為就算你放工約咗人,有緊要事要做,都不及上司開會更重要。

有好多時,上司心態就係覺得佢嘅時間先係最重要,相反員工嘅時間佢根本唔在乎。

放工?返屋企食飯?點及工作咁重要啊?

公司有個無時間觀念嘅上司,你開始唔敢約朋友去街,同屋企人講遲半個鐘先開飯,削減生活時間去遷就上司突如其來嘅「時間觀失調」,亦令你生活時間都慢慢失調…

其實工作固然重要,但生活同樣重要。

每個人嘅時間都係平等,希望上司唔好一個Order,就浪費員工時間。