想賺錢先要熟行情 邊個話睇樓一定要買 | 香港樓市2018
某個週日下午, 收到同學的Whatsapp…
同學： 「睇緊層樓…200幾萬有交易！」
筆者： 「村屋？幾靚喎！」
同學： 「租到8、9千蚊！」
筆者： 「回報幾好喎。」
同學： 「好多都係外國人租添。」
筆者： 「係？邊度？」
同學： 「你估吓~」
撰文：1%Anthony ｜ 圖片：新傳媒資料庫
筆者： 「應該係要轉程小巴先去到嗰啲，粉嶺再入？」
同學： 「唔係，係南丫島。」
筆者： 「嘩！唔使買到咁遠吓話？」
同學： 「睇吓之嘛，又唔係買。」
筆者： 「睇都唔使走到咁遠丫！」
同學： 「約咗朋友嚟BBQ，佢哋透緊爐，我咪週圍睇吓囉。」
筆者： 「哦~~咁又啱喎！」
同學： 「你話嘅，乜都睇吓，先識比較嘛…」
很多朋友都話想買樓、買筍盤，唔通個個識買咩？…
如果你問：「最近有冇睇樓？」個個都話冇！
又話想買樓、買筍盤，又唔去睇樓，咁點買呢？難道筍盤會自己走上門來敲門？跟你說：「等你好耐啦，做乜唔嚟買我呀？」
其中有些朋友，叫佢去睇樓好似叫佢去死咁…
理由多多，又話要開OT，又話約咗人食飯，又話唔舒服，試過有朋友話要返屋企放狗，千奇百趣，總之就係唔想去。想點？又話想買又唔願去睇？點知自己想要乜？
又有些朋友覺得睇樓是人生大事，籌備經年…
總覺得一定要做好心理及生理準備，最好就是在星期六、日，不用上班，推掉節目，約好幾個代理，最好仲要有十個八個匙盤，仲要約埋朋友、家人一齊去，睇完之後大家食飯。想點？現在可不是去日本旅行啊！沒必要大班人一起去吧！想嚇死業主咩？其實睇樓是一件好簡單的事，就好似平時行街見到商店裡有件靚衫，就走進去試試，就這麼簡單。
路過代理行，見到有吸引的放盤，就推門走進去問問行情，有銷匙就上樓睇睇，十幾分鐘睇完，簡單不過！
又有些朋友覺得，樓價好貴，買不起，買得起才去…
首先，邊個話睇樓一定要買先？
等到自己買得起先去？等到幾時？ 幾時先叫買得起呢？個個都話樓價好貴，咁到有幾貴呢？幾多錢呢？到底你係咪真係買唔起呢？會唔會有啲買得起呢？有些朋友擔心代理會死纏爛打，擔心會被不良代理哄騙，說實話，這就要靠平時多留意行情，多睇樓，有經驗就不會那麼容易中伏了。
報章傳媒有講？指數又破頂？那裡那裡又創新高？
單靠這些資訊，你可以有多了解市場呢？報章傳媒需要讀者關注，升市自然集中報道破頂成交，跌市自然集中劈價成交，是否足夠全面呢？個別單位破頂，可能因為質素高、裝修靚，甚至可能是特色單位，代表個個單位都貴嗎？個別屋苑破頂，代表全港都顛貴嗎？一些被遺忘的舊區、單幢樓，其實仍然有不少尋寶機會。
就像同學的情況…
當一般人還躲在家裡，看創新高的報導，埋怨樓價很貴…
睇樓已經成她的興趣，成為她生活一部份！
你估…邊個買到筍盤機會高？
想買樓、想買筍盤，先要踏出門口，不斷睇樓！ 冇？貴？買唔到？睇完50層再講…
實不相瞞…同學已經有幾層樓了！兩層香港、兩層大陸！作者為1%投資培訓的地產課程總監，著有《買樓上車防中伏》、《上車又住又賺》、《樓。轉命運》、《工商舖小本投資入門》、《50 萬上車》、《投資買樓賺錢筆記》等等，其博客《第一桶金》總瀏覽量逾300萬人次，曾接受多間傳媒專訪及出任電台地產節目嘉賓主持，並擔任TVB節目「有樓萬事足」顧問。2000年科網股爆破，曾欠下近一年薪金卡數。經債務重組後，2004年股樓雙線出擊，短短四年由滿身卡數打工仔，變出六層樓。其後與投資兵團大舉出擊投資物業，並進軍商鋪、工廈市場，以穩健投資策略，成功變出雙位數物業。
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
