點解一出社會啲人就變晒 辦公室攻心計
廣告
唔少八、九十後都會認為自己孩童、讀書時期，係人生中最開心嘅階段，原因當然可能有好多，例如細個冇乜經濟負擔，返學都係嘻嘻哈哈就一日。最重要係當時人與人之間嘅相處都好少機心，亦正因如此，唔少人嘅知己老友都係中學同學，但點解一出到社會就咁難再搵返呢種感覺，個個都人前人後一個樣？
而更有唔少職場研究顯示，辦公室嘅人際問題係主要離職原因之一，依家一齊睇下職場常見攻心計例子。
1.擺款/扮大牌
做職場新人最易見識到呢種人嘅可恨之處，有啲嘢係得佢先做到、教到，但佢就一於十問九唔應，死都唔肯做，又或者明明好得閒都唔幫你住。如果你有文件需要俾呢類人審批，點都會要你改返兩、三次先會罷休，即使改到最後其實同你一開頭嗰份冇乜唔同。
2.留一手，等你撞板
隨住AI發展神速，唔少行業都驚會被取代，但原來人最驚唔係AI取代，而係驚俾人取代。所以自己識嘅嘢往往都會留一手唔教有需要嘅同事，等佢撞板就再落井下石！
「唔係咁簡單都要我教啊嘛？/ 呢啲基本嘢我唔講你都應該要識！/ 你真係唔夠細心！」
3.假幫手，真是非
有時叫同事幫手，同事都笑笑口咁講冇問題，心諗工作氣氛都唔錯。點知轉個頭發現佢喺背後就加鹽加醋，明明自己應承幫手，轉頭又抱怨又話人咁都做唔掂要幫手，好麻煩啊，咁其實你唔想咪婉拒人囉。
4.小器到極嘅報復
工作量大想搵人幫手都無可厚非，但你忙人哋都忙，對方俾晒合理解釋你兼且say埋sorry話好忙幫唔到手住，但呢類人都會想得太多，以為人特登同自己過唔去。
除咗一定會講是非唱衰對方之外，會做極多小動作，例如食lunch唔叫埋佢、人哋問嘢就hea答、開會針住佢嚟ban橋。
其實職場生活都佔據咗人生唔少時間，公司做嘢壓力已經大，同事又機關算盡試問又邊個會做得開心，難怪出到社會之後收獲到嘅快樂已經大不如前！
