網民熱話 40呎超迷你套房 洗手盤廁所梳化床兼備 月租$2,900

網民熱話 40呎超迷你套房 洗手盤廁所梳化床兼備 月租$2,900

文:浩德

香港家居環境出名狹窄,當大家都概嘆自己屋企細、唔夠位擺嘢嘅同時,地球已經愈來愈危險,香港更加愈來愈多變態,包括行為同思想!

雖然一直都知道香港好多劏房,一家幾口住在劏房的大有人在,之但係「一日唔死,一日都有新聞!」今日就發現有個最新租盤出現,相信會令大家對「套房」嘅認知又有一個全新嘅概念。

迷你套房麻雀雖小、五臟俱全?

呢個實用面積40呎嘅「溫馨套房」最新租盤位於油麻地,業主以油麻地地鐵B出口3分鐘到達、交通非常便利作賣點,雖然講明唔可以明火煮食,但勝在「麻雀雖小、五臟俱全」。

你如果想話:「40呎?咪即係一個普通洗手間咁大?點住呀?」少年,你太年輕了!喺呢個40呎嘅「溫馨超迷你套房」裡面,原來有電視、冷氣、熱水爐、座廁,而最貼心嘅係座廁隔離就正正擺放咗一張單人梳化床,可以畀你呢頭去完廁所、轉個身就可以坐返低休息,啱晒講求效率嘅香港都市人。業主仲好細心咁註明:「白天收起,可作小廳。」