點解要辭職 11個要走訊號 +15個公司惡規矩

點解要辭職 11個要走訊號 +15個公司惡規矩

「繼續撈?唔撈?撈?唔撈?撈?⋯⋯」花瓣已摘晒,下一朵⋯⋯

有錢任性,可惜無錢⋯⋯要選擇「合理」的離職時間,的確要度度。職業諮詢公司Resume Strategists的創辦人Alyssa Gelbard在《Inc.》雜誌網站上提到了11個,可以給你「無錢都可任性離職」的訊號。

文:K.K.

01|公司搬家,而你不想去新地點工作

如新地點真的離你家很遠,需要消耗你的大量時間和花費,為你造成不便,那麼便可以開始找新工作了。

這訊號或對大多人而言並不常遇到,尤其是香港地,彈丸之地,公司地點遠極有限。但你若是將需被調往某個遙遠外地工作,而又無法拒絕時,那麼便是時候堅定離職的想法了。

02|遇到無理惡頂的上司

據研究顯示,上司的好壞,是大多數人離職的原因。若你發現上司惡頂後,未能透過良好溝通解決問題,而你又無法轉任其他部門時,這就是一個你該注意的訊號。

一個糟糕的上司會令你的成長停滯,更壞的是「功勞都係佢自己,而有鑊就要你嚟揹」!若不幸地,你的上司「如有雷同」,還是早走早著好啊。

03|你的工種將被科技取代

人工智能的高速發展近在眼前,若你正在做的工作,已很明顯會被科技取代,那麼真的要「攝高枕頭」,想想轉職、參加培訓為自己增值的安排了。因為不論你現在做得多麼好,很可能都是在浪費寶貴的時間。

04|公司專注發展的領域不再是你的專長

「你擁有豐富的活動營銷經驗,然而,你的公司已悄然轉型至數字營銷,並專注發展社交平台的市場營銷」Gelbard舉例說,那麼就該另覓出路了。因為大多部門或公司並不會將資源放在你想學習的技能上,除非你夠幸運,而又有心轉型。

05|你被逼調職

某天,你被上司告知調職,因「軍令如山」,你無法拒絕。然而,新職位與你個人的職業生涯規劃沒有絲毫關係,那麼此時就該好好考慮是否要離職了。

06|你無法認同公司的新方向

老細所做的每一個影響公司的重大決定,你幾乎一個都不認同時,就該考慮是否要say goodbye了。因為,待在一家無法認同的公司,只會增加自己的痛苦,而表現出來的態度和成效,不多不少會受內心的質疑所變得負面。

07|部門資源被大幅削減

不論是甚麼原因(多半是部門不再被重視),當資源被大幅削減,意味著你和你的團隊將不能像以往般,付出同樣的精力,達到相同的成果。

08|公司裁員,令你無償背負更多

Gelbard認為,若你的公司裁員了,而你卻被告知要在沒有任何的加薪或升遷,以及公司沒有繼續招募的計劃下,背負更多的工作與責任,那麼你便該堅定地離職了。

09|你不再是核心成員

你不再被獲邀參與重要會議或共同做出重要決定時,這意味著你在公司裡的角色發生了變化,甚至會有被請離職的危險。是該另求出路的訊號。

10|你表現優異,卻久未升遷或加薪

若你一直以來工作表現「無得頂」,團隊的KPI數字屢屢大幅上升,然而卻久久未獲升遷,該給的獎金、加薪都不見蹤影,再加上上司給予的理由又實在是牽強時,那麼就該尋找其他更好的機會了。

Gelbard更強調,這種現象多發生在一些成立年期悠久的公司,例如公司有許多表現一般,但卻比你資深的員工。對,正是因為他們資深,所以升遷、加薪就總也輪不到你。

11|「這些好機會」總不是你的

公司總將具挑戰性的新工作安排給別人,總把你排除在外(當然,也要自省為何會不是自己?),而你也對於目前工作感到厭倦時,那麼便是時候離開了。

查實,再深一層想,員工會走,大抵還是離不開某大名人所說的兩個原因:錢給的不夠、心受委屈了。

資料來源:Inc.

公司15個惡規矩

公司規矩定出來總有原因,但是否合理見仁見智。老細多數覺得自已想出來規矩是「有根有據」,可以提高員工效率,公司業務一定蒸蒸日上!作為打工仔,你無權無勢、又遇著不肯聽意見的老闆,除了轉工外,唯一可以做是「硬食」!以下15條令人崩潰的公司規矩,睇完最多都是呻一呻,接著只有繼續做。是否令人崩潰呢?

01 | 每次去廁所唔可以超過 X 分鐘

網上曾瘋傳咗張員工守則,每日只可以去廁所 4 次,夾埋仲唔可以超過 15 分鐘。求神拜佛唔好食錯嘢,搞到個肚唔舒服啊,唔係你幫自己包片算啦!

02 | 有限度上網

公司會 Block 咗某啲網站,好似 Facebook 、 YouTube 咁,怕你掛住上網疏忽職守。咁都係啱嘅,你臨瞓前睇 Facebook 都碌碌下碌成個鐘啦,公司咁多嘢等你做,邊有咁多時間俾你碌先?

只不過喺唔睇新聞,齋靠 Facebook 了解世界嘅年代,真係好唔幾方便!(要娛樂,用咩方法都可以,Block得幾多?)

03 | 遲到要扣錢

聽過有啲公司 Policy 係遲到 1 分鐘扣 1 蚊,如果遲到理由唔合理,責任制嚟講扣錢都好正常。有啲朋友住新界西,朝朝要過海返工,已經預 2 個鐘頭搭車,但都撞正巴士塞車、港鐵延誤,咁老細又點睇?

04 | 放工或放假都要即刻覆 MESSAGE

呢點相信大家都唔陌生,有網友仲話加入咗 Whatsapp Group 之後就冇咗放工時間。入得 Whatsapp Group ,即係你同老細嘅距離拉近咗啦,咁佢諗到新 Idea,想你「幫手」跟跟,你冇理由托手踭!你唔應機?老細第 2 日就問你:「我見你 Online ,做乜扮睇我唔到?」

05 | 建議你放棄興趣,將工作放喺第 1 位

一心唔能夠二用,放咁多時間行街睇戲畫畫唱歌做手工………不如後生專心工作先?就咁聽好似好有道理喎!但星期一至日都對住公司嘢,除非你極鍾意你份工,如果唔係有乜可能唔崩潰?

06 | 指定衣著打扮

要俾個好印象服務客人,專業啲斯文啲無可厚非。但點解唔駛見客都規定要化濃妝,唔俾著波鞋?又或者著西裝點解一定要著埋外套?想大家統一衣著打扮,點解唔整套制服就算?

07 | 返工時間要熄電話

原因都係想大家工作期間不受影響啦,雖則員工們都唔希望有咩突發嘢要聽電話,但意外嘅嘢話唔埋,萬一有乜事邊個負責?係咪老細你負責呀?唔係唔係, Sorry ,我自己負責返。

08 | 唔准佈置工作檯

打工仔留喺公司嘅時間仲多過喺屋企,想佈置吓個位等自己返工開心啲?老細就覺得整齊好重要,工作檯最好連 Memo 紙都冇,乖乖哋放工嗰陣擺返晒啲水杯日曆入櫃桶啦。

09 | 唔俾傾偈

一個安靜嘅環境先可以令員工專心完成手頭工作(好似係),所以最好就唔好傾偈啦。你會話:「老細,傾公事咋!」冇㗎,老細分唔到公私事㗎,分到佢就唔會用私人時間搵你做公務啦,係咪咁講啊?

10 | 明明個個都係香港人,內部 E-MAIL 都唔俾用中文

咩呀香港國際大都會嚟㗎,我哋又係國際公司,畀機會員工多啲有英文有乜唔啱?啱嘅,但老細我嘅母語始終唔係英文,你唔介意我用些少 Konglish 或者會錯 Grammar 就得㗎喇!

11 | 要不定期同上司一齊食飯,了解工作進度

呃………老細食件雞吖,個 Project 而家呢就咁咁咁。(嘩,齋諗到個畫面都已經好尷尬)

12 | 開會一定要最少講 1 次嘢

我同意 B 同事嘅講法。同事 A 你覺得呢?經歷完公開考試都仲有小組討論環節,好崩潰啊!

13 | 喺公司範圍唔俾講粗口

可能就要睇你做邊行喇,做傳媒行業呢,點都有幾句旁身,聽聞做教育版嘅同行因為成日要同校長、學者等人見面,所以 1 句粗口都唔講得,一講即炒。

14 | 彩色影印(就算只得 1 張)要老細批准簽咗名先畀印

細公司資源有限,適當地節流好正常。但一張彩色影印都要問准老細,似乎就煩咗啲。老細日理萬機,等佢簽名分分鐘等到2046,小員工可以點?一係唔印,一係屋企印完拎返公司囉……

15 | 買公家嘢一定要用現金俾,用八達通或者信用卡就冇得 CLAIM 錢

比較多出現喺教育界,做老師嘅可能會有多啲共鳴。好似話係因為教育局批公帑,所以唔容許電子貨幣交易,費事又要顧埋啲積分咁話。

係咪愈睇愈不解?但唔好笑啊,真係有人經歷緊!以上規則可能只係冰山一角,更離譜嘅都有,只係未有人爆出嚟咁解。

咁打工仔可以點做?試吓反映囉!如果反映完都冇用?唔…我都唔知啦,你覺得呢?

相關文章:

6種表面風光的職業 實際相當難頂

返工好受氣 7種衰同事令人要辭職

關鍵詞
辭職