補習名師挖角戰  買樓投資易得多

補習名師挖角戰 買樓投資易得多

朋友: 「嘩!好堅!8,500萬!!」
筆者: 「又有金多寶咩?重陽有金多寶咩?」

朋友: 「唔係買六合彩呀,係重金挖角呀。」
筆者: 「邊個歌星咁值錢?」
朋友: 「唔係歌星,係補習天王,現代挖角遵理中文名師。」
筆者: 「中文名師?現代自己都好似有幾個好出名架。」
朋友: 「登全版報紙廣告,挖角公開信。」
筆者: 「嘩…真係好誇張!」

今個星期最多朋友談論的,已經唔再係劈價,而係呢單挖角廣告。睇過好幾篇不同報導,又睇過好幾位高手的分析,上了寶貴一課。

綜合各界分析,除了求才若渴,還是一個精彩的商業策略,話說遵理申請上市,作為主要競爭對手,現時補習界唯一的上市公司現代教育(01082,現改名為香港教育國際)當然要出招。

據說遵理的上市文件曾描述業務風險,是其一位頂級名師的教學團隊,過去幾年貢獻的收入,佔集團收入超過40%,並指出如果無法挽留這位名師,可能會嚴重影響收益。

有位網友分析得很精彩,今次高調挖角的商業效益極高。如果挖角成功,固然可以打亂對手的上市計劃,即使挖角不成功,遵理亦要高價留人,將來的盈利亦會大受影響,處於兩難困局。

買樓比創業容易

再加上事件高調曝光,有關部門審核這宗上市申請的時候,不得不重新評估有關風險,一般小市民亦看到利潤過分集中的情況,或多或少都會擔心將來會再出現類似的挖角,影響信心,厲害!厲害!商業世界的競爭策略果然令人讚嘆!

閒來幻想,如果是我又會如何面對呢?當然唔可以咁容易就認輸,仲有一招,就係邀請這位補習名師加入成為合作夥伴,就算加咗一倍人工,過到去都係打工,倒不如更上一層樓,自己做埋上市公司股東。區區幾千萬元,上市之後在股票市場隨時賺得仲多,純粹白日夢,唔好當真,哈哈!

咁呢單新聞又同樓市有乜關係呢?

講真又無直接關係,不過就令到筆者想想過去十年的創業生涯,有血有汗。今天,很多年青人都想創業,很多年青人都埋怨高樓價,如果要買樓,就得花所有積蓄做首期,那裏有資本創業?還有將來又要個個月供樓,要做樓奴,那裏有勇氣辭職創業?

筆者想分享的是,創業並不是想像中那麼簡單。即使你有好的點子,亦未必有足夠的經驗與人脈,就算有,開業順順利利,將來還要面對很多突如其來的商業競爭。

計好借貸 風險有限

今次這場挖角戰是精彩教材,筆者亦遇過很多惡性競爭,預備創業的朋友要有心理準備,只要你做得好,惡性競爭就會找上門來!挖角經常有,其他常見招數亦包括抄襲你的產品及服務,山寨你的品牌混水摸魚,混入你的網絡盜取粉絲客戶,亦有朋友的店試過,對手扮客人投訴,甚至出律師信提出訴訟等等,層出不窮。

總結多年經驗,發覺買樓收租、投資,其實是最穩健的生意。即使今天樓價高企,即使有多少下行風險,其實相對其他生意來說仍然是相對簡單、風險低的投資。

只要計好自己條數,唔好過分借貸就好,況且累積物業可以有升值,有現金流,將來就是你做生意的本錢,如果連買樓投資都驚,仲想在商場大展拳腳?

相關文章