農曆新年又快到

月入$14,000就新年 又要俾親戚揶揄

社會熱話

廣告

文:Purple弟弟

農曆新年又快到,仲有唔夠兩星期就農曆初一啦,不過唔好以為有假放有利是收就好開心,因為家家都有難頂嘅親戚,要應付佢哋真係分分鐘仲辛苦過返工。

新年拜年如上戰場

正所謂人比人比死人,呢句說話一啲都無錯,可惜拜年嘅席上就係一個戰場!打得仗,當然就唔係你死就我亡,所以你廢?就預咗俾人「比到死為止」!幸好我哋華人最明白咩叫長幼有序,通常都係大人嘅一輪廝殺先到我哋呢班後生仔。當大人吹完自己過去一年賺幾多幾多,開始冷場之際,熱心嘅姨媽姑姐就會嚟料啦!

「你依家讀緊書定做嘢啊?」
「做緊嘢囉!」
「一定搵好多啦你咁叻仔,話比姨媽知搵幾多…」

「………萬四。」
「我個仔今年畢業第一份工都係呢個價,佢仲要唔係讀大學喎!係咪搵錯工啊。」

雖然佢把口係安慰我,但揚起嘅嘴角已經暴露咗佢內心自以為勝利者嘅醜陋心態。

後生仔戰場告一段落,就到小朋友啦,晚晚補習加興趣班嘅成果就要係拜年展現出嚟,為咗滿足呢班鬼父虎媽嘅虛榮心,唔少小朋友都要黑住面口咁去跳舞唱歌、表演小才

藝娛賓,望到都覺得慘。

完場各自歸家嘅路上,就係每個家庭嘅成果回顧大會。

老豆會講下自己今年搵得多個邊個邊個,老媽子又會讚原來我搵得多錢過邊個邊個個仔,然後我就會笑笑口咁同佢哋講:

「係啦係啦,快啲搭車返去我哋個400呎公屋啦!」

其實香港人呢種要將人比下去嚟獲取優越感嘅心態已經唔係咩新鮮事,原因不外乎大家都接受唔到自己現況,只能從生活差過自己嘅人身上取得一絲慰藉嚟催眠自己其實我

過得很好!

生活唔係透過比較就會改善,希望今年親戚之間係真正互相慰問關心,而唔係開一年一度嘅吹水認叻大會啦!

延伸閱讀

隔離飯香心態 跳槽新同事人工高我$5,000 但唔加我人工