大學畢業

大學畢業人工得$12,000點買樓 供阿仔海外升學已用$100萬|網民熱話

社會熱話

廣告

網民熱話大學畢業人工得$12,000,你話阿仔點買樓?話晒我都大拿拿用$100萬供佢去海外升學,將來又點買樓呢?而家啲細路其實好幸福,就講升學為例,家陣機會大把,叻仔叻女考到9大的當然好事啦。若然考唔到,大把自資學位、副學士、High Dip 任君選擇。先唔講讀咗出來前途如何,總之想讀書,學位就大把。

撰文:不覊  | 圖片:新傳媒資料室、unsplash

只要有錢升學大把機會

當然,大前題係要有錢,有錢交學費,讀咩都得啦。

唔留港讀書,去外國留學啦,總之有錢就可以。

依家啲父母生小朋友都係一個起兩個止,資源集中。

父母搵得到,又點會唔上捨得花在子女身上呢?

負擔得起的話,阿仔阿女又應承肯用功讀書,真係賣埋底衫褲都要供佢哋讀書啦,係咪咁講先?

筆者識得個朋友,兩公婆早結婚,早幾年40多歲時,兩個仔女已經大晒,一個 14歲 、一個 18歲。

大仔考完DSE成績唔係咁好,但又想繼續升學,查實可能係唔想太早出社會工作。咁呢對夫婦朋友都唔想個仔太早出社會工作。

大學畢業希望搵份好工

佢哋話成世人未捱過咩,有能力咪供佢讀多幾年書,話晒放過洋,加埋張沙紙,希望搵份好工咁啦。

朋友個大仔話鍾意設計,去咗澳洲讀咗個咩創意媒體及設計之類課程,聽佢講乜都學吓咁啦,拍片、用 photoshop畫吓嘢做吓圖,樣樣有。

幾年留學生涯,大大話話都使咗朋友成百萬。

返到香港,好似好多 social media 公司都請人,後生仔話搵工唔太難,只係 Starting 低啲啫,而家喺間細公司做,月入 $12,000。

朋友話都知而家啲後生做嘢唔容易,除非你係專科,如果唔係,大把後生畢業每月只搵皮零。

佢亦唔係嫌個仔,為人父母,亦從來冇諗過要個仔還返啲學費過兩老。

何來本錢做首期

只係,辛辛苦苦供完讀大學,家陣朋友又擔心個仔每月搵雞碎,有排望唔到佢升職加人工,過幾年話要結婚生仔時,何來本錢做首期供樓呢?

想話學人哋幫個仔出首期?難啲咯,你估幾千萬未開頭咩?

啱啱先用完過百萬,仲要第二個仔來緊呢?

萬一又係考唔到香港啲大學,為免細仔話兩老偏心,都要預啲錢阿二留學啦,到時又要百幾粒。

你估真係發咗咩,仲邊有錢幫兩個仔做首期呢?

見到朋友家陣呢個樣,真正明白咩叫做「養兒100歲,長憂99」呢個大道理。