買新樓即供定建期好?

樓市

廣告

朋友A:「有專家話而家咁多新樓,透支晒購買力喎!」

朋友B:「仲話將來樓會無以為繼,爆爆爆添呀…」
筆者:「似乎淨係睇一邊唔睇第二邊喎!」
朋友A:「點解呢?」
筆者:「新樓樓花期咁長,既透支購買力,同時又透支供應!」
朋友A:「咁又係呀,而家啲新樓樓花期近三年!」
朋友B:「以前我哋成日話…爛地盤一個就賣樓,離譜!」
朋友A:「而家…收購嗰幢舊樓都未拆,就賣啦!」
朋友B:「其實咁長樓花期,有乜嘢要留意呢?」
朋友A:「係囉…會唔會爛尾呢?建築期付款會唔會好啲呢?」
朋友B:「但係即供平好多喎!」
筆者:「咁長樓花期,真係唔着數…」

網友問:發展商賣遠期樓花,係咪即係睇淡後市?

未必!單憑一個動作就下定論,大孖沙咁易俾你估到架咩?!

老老實實…如果俾我,除非睇得好好,否則都會照賣!

呢個係機會成本問題!舉例你中咗1,000萬元六合彩,你可以即時攞呢1,000萬元,或者三年後攞1,100萬元,你點揀?

唔係個個發展商都幾百億、幾千億元根底,與其擺多幾年等賣貴少少,不如早啲套現發展另一個項目啦。

至於係咪睇淡?要睇佢攞番錢後會唔會有新項目。

就算佢睇淡又點?係咪代表樓市要跌?其他發展商呢?

網友問:即供付款好?還是建期付款好?

所謂即供付款,可以理解為盡快成交…

優點:平!

缺點:即時供樓,白供群英!

買家簽約及繳付訂金後,即時申請按揭,大約 60 日,待按揭批出,銀行會即時找埋樓價尾數俾發展商,等同於已經成交,即使只是爛地盤一個,買家都要即時開始供樓。

由於發展商可以先收錢,優惠亦最多,通常樓花期愈長,折扣率愈高。以環島東岸為例, 有8%優惠,以樓價 500萬元計,便可節省40萬元!

所謂建期付款,可以理解為入伙才成交。

優點:唔使俾錢住!

缺點:無折!加上承受可能下跌,及估唔到價的風險!

買家簽約及繳付訂金之後,通常要在指定時間內多付一些訂金,例如半年內多付 10%,合共 20%,直到入伙前才申請按揭,待發展商發出入伙通知書後才找樓價尾數,屆時才開始供樓,即是說俾完兩成就唔使俾錢住。由於發展商遲收錢,通常都無乜優惠。

同時,買家亦要承受樓市風險,樓市上升當然沒有問題,但如果樓市下跌,假如三年後樓價跌咗 20%,銀行估價都會隨時跌 20%,換句話說估唔足價,借唔足錢,到時就需要額外多付首期。

揀邊樣真係要睇吓折扣有幾多,抵唔抵?視乎個個盤唔同。

樓花期愈長愈唔着數

問:三年樓花期,有乜嘢要考慮?

如果你有自住需要,呢幾年住邊呢?

租住先?一邊供樓一邊租樓?咁咪好辛苦?除非無即時自住需要,否則無理由買新樓。如果諗住投資收租,以市區一房單位月租約 15,000元計,三年租金就是 54 萬元,如果三年後賣樓,你會發現一蚊租金都無收過!

今年筆者買入一個樓齡只有幾年的新樓單位,價錢比一手新樓略為便宜,呎價不到 15,000萬元。朋友問:「爭少少,點解唔買一手樓?」最主要就是可以即時收租,年期愈長,愈唔着數,筆者唔鍾意做白供群英!

太古城上月最新放盤叫價是多少?

太古城上月最新放盤叫價大約…各區樓市買賣詳情請看

九龍區有哪些大型屋苑放盤呎價最低?

九龍區不少受歡迎的大型屋苑呎價對比上月都有回落…各區樓市買賣詳情請看