唔想成世人只為層樓 就要盡快買多幾層樓 | 供樓 | 租樓 | 財務自由
朋友： 「新年快樂！」
筆者： 「新年快樂！點呀？今年有乜目標？」
朋友： 「未諗呀，屋企人成日叫我買樓。」
筆者： 「而家係貴咗啲，不過搵吓都有筍盤嘅。」
朋友： 「都唔係平貴問題，屋企人話可以幫吓首期。」
筆者： 「咁係咩問題呢？」
朋友： 「我唔想成世人，就係為咗層樓！」
筆者： 「啱！成世人為層樓，人生就冇意義！」
朋友： 「有咩辦法？供樓唔使咁辛苦？」
筆者： 「盡快買多幾層樓！」
朋友： 「痴線！玩咩？」
筆者： 「真架！因為當你得一層樓，層樓要嚟住，係你養佢！」
朋友： 「咁買多幾層呢？」
筆者： 「好明顯你已經識得用磚頭賺錢，就係樓養你！」
朋友： 「又好似係喎…」
筆者： 「都係我哋投親身經歷…」
年紀愈大愈難租樓
轉眼又新一年了，計劃好了嗎？
其實有好多朋友問…唔想成世人為層樓，可以點？
筆者的答案係…盡快買多幾層樓！
每次朋友聽到…都覺得我顛咗！或者玩嘢！
如果你仲未上車…確實現在是比較貴，要多花心思搵筍盤。
居住問題總要面對，總不能一世租樓吧！租金會隨着通脹不斷上升，將來年紀大了，賺錢能力減退，就會越來越吃力，就算租得起，到時都未必有業主肯租給你。點解？
一層自住樓，好過冇！好過租！
年紀大喎！自己諗吓啦！相反供樓不是跟通脹，是跟利息的，只要利息唔加得多，供樓就唔會供多好多，而且總有一天會供完，老了…還可以做逆按揭，著數好多。不過又唔係叫你即刻飛身撲入去！
講真而家樓價真係幾貴，業主、發展商個個都開天價，要多花時間去發掘有潛力的地區、筍盤，將來才能賺錢、換樓、再賺錢…很重要！
如果暫時能力未許可，首期未夠，入息未夠過壓力測試，先評估一下短期內能不做到，如果未得，可以考慮先做其他投資壯大資本，例如先北上買樓走一轉，賺了再回歸！
如果已經上車…是時候要想想如何轉車了，否則只會原地踏步！
如果你只有一層自住樓，好過冇！好過租！
每個月都要供樓 是你養這層樓？
不過在一般用家思維上，這層樓是用來住的，每個月都要供樓，是你養這層樓。如果想層樓養你，就要培養投資者的思維。
舉例，早幾年樓價較便平，我們會不斷加按，多買幾層樓收租。
例如筆者4、5年前買的幾層市區樓，以當時標準的7成按揭計，供7、8千的樓，收租可以收1.3、1.4萬，扣除管理費，每個單位正現金流有5、6千，有幾個單位收租，就夠供埋自住那層了，有得住唔洗錢！如果再多幾間收租，個個月有幾萬元，唔使做添啦！
不過這個如意算盤今天難打響了，因為樓價貴了，回報低了。
賺差價比賺現金流更為重要
所以，要有新的思維，賺差價比賺現金流更為重要。
以上述的市區樓為例，當時約300萬元，現在接近500萬元，賣出之後連同幾年供款本金大約有200萬元，傳統做法，一間可以拆兩間了。
當然現在有15% 辣稅，又有壓力測試，要再多買幾間住宅不易，賺到的錢可以買其他資產，例如買多間海外樓、大陸樓，又例如好似筆者，投資非住宅，例如工廈等。政府定了很多政策，就是不讓人多買住宅收租，要突圍就要想辦法了。
條條大路通羅馬，最重要的是，新一年，做好轉車的計劃！
記住，得一層樓，就係你養層樓！有幾層樓，就係樓養你！
記住，得一層樓，只有花錢，直至供完！有幾層樓，就是賺錢！
很多人認為，樓是住的，不是賺錢的！各有睇法，筆者不反對，但對於筆者來說，很難聽，不過是事實，樓是用來賺錢的。
唔想成世為層樓，就要買多幾層樓，讓層樓為你打工！
作者為1%投資培訓的地產課程總監，著有《買樓上車防中伏》、《上車又住又賺》、《樓。轉命運》、《工商舖小本投資入門》、《50 萬上車》、《投資買樓賺錢筆記》等等，其博客《第一桶金》總瀏覽量逾300萬人次，曾接受多間傳媒專訪及出任電台地產節目嘉賓主持，並擔任TVB節目「有樓萬事足」顧問。2000年科網股爆破，曾欠下近一年薪金卡數。經債務重組後，2004年股樓雙線出擊，短短四年由滿身卡數打工仔，變出六層樓。其後與投資兵團大舉出擊投資物業，並進軍商鋪、工廈市場，以穩健投資策略，成功變出雙位數物業。
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
