月入$15,000要租樓   公屋富戶都買唔到樓

月入$15,000要租樓 公屋富戶都買唔到樓

文:Purple弟弟

公屋富戶政策上年10月1日已經生效,筆者同家人一直都過住樸素節儉嘅生活,心諗同「富戶」理應扯不上任何關係,於是一直都無留意個政策實際內容係啲咩。

直至最近,屋企人同我講,原來我哋屋企竟然係富戶,如果今年4月審查過唔到,就要遷出現有公屋單位。

公屋富戶:224萬買唔到三人單位

咁我知道咗之後,即刻上網睇睇呢條例究竟係咩料子!原來三人家庭資產超224萬元就叫富戶,換轉喺其他地方,224萬元可以叫做好使好用,但呢度係香港!呢224萬都係我同屋企人工作多年嚟死慳死抵兼投資有少許回報嘅成果。如果我哋一家人被踢出公屋,用呢224萬最多都係買到一個150-200呎單位,點住三個人!

公屋富戶:綠表無著數

退一步,反正層公屋都要畀返人,抽綠表又如何?抽中雖然可以豁免壓力測試,但係個單位係清水樓,裝修費都一筆,仲交管理費!最大問題係香港樓價日日升,供私人樓都叫有得享受升幅回報,綠表居屋冇得出租,升值只是紙上富貴,唔關我事,咁我點解唔住返公屋。

公屋富戶:人工太低過唔到壓力測試

好啦我當呢224萬元畀做首期去私人市場,想買個400呎單位已經唔洗諗,因為實用面積350呎多少少已經叫價接近400萬,以我人工$15,000嚟計,連壓力測試都過唔到!剩低唯一解決方法就係父母除我名,自己出去租又好,搵朋友屈蛇又好,瞓街都好…總之就要自己死掂佢啦。

喺香港想向上流真係好難,當你儲到少少錢果陣,仲要畀人逼出去租屋燒曬你筆錢,你話心唔心嗡!如果唔係一下子中六合彩,都無乜機會可以住到一個居住面積合理少少嘅地方。

延伸閱讀

人工$13,000由劏房搬到去公屋 終於明白香港人無理想係好正常

讀咁多書人工得$13,000 每次聽到都想喊