澳洲留學後唔留低   返香港捱騾仔係咪好傻

澳洲留學後唔留低 返香港捱騾仔係咪好傻

【澳洲留學】『前往墨爾本航班QFxxx嘅乘客請於5號閘口登機。』

俾張機票空姐嘅時候,我滴眼淚咁啱滴咗喺上面。

『Safe Flight! 快啲識返個鬼仔男朋友,然後唔好返嚟啦!』

我望住啲msg,喺我心情咁灰暗嘅時候收到,真係唔知笑定喊好。

好快咁喺鍵盤上hea覆咗句:『多謝晒喎。』

澳洲留學練膽量

相信好多90後有出國讀書嘅經驗,尤其是我讀嘅中學,因為係間直資學校,好多人家底其實唔錯。基本上入唔到大學,就會去外國,而其中美國係大熱門,受歡迎程度謹次於英國。

『就去澳洲留學啦,學校都冇咩人去。』

點知講講吓就真係去咗。

澳洲留學
喺澳洲留學嘅生活可以話係好多姿多彩 唔同種族嘅人都可以融合相處

唔好誤會,我絕對唔係逃兵,我有完成DSE架,亦都唔介意捱咗asso chur到盡嘅生活,但咁大個人,都想去見識一下,同埋出國讀書唔多唔少都可以學習獨立。

話就話出身於英中,但當你生活完全就只有英文,基本上已然唔再只係練英文,而係綀你膽量。一開始由每日都倒數緊仲有幾多日返香港,到慢慢已經開始投入到新生活。你喺香港嘅朋友話部電腦lag咗,reg唔到科逼住上天地堂好痛苦。

但喺外國讀嘅我,有天地堂嘅時候我會喺課室出面塊草地飲住酒瞓陣先。當我同喺香港讀緊大學嘅朋友講永遠喺鬼佬教授眼中係’No stupid Questions’ ,佢地基本上好鼓勵學生問問題,亦好照顧亞洲人。其實佢地都表示幻想唔到,好欣賞呢種教學方式,我開始感受到外國生活有幾美好。

澳洲留學
墨爾本連續好幾年被譽為『全球最宜居城市』亦是香港人喜愛嘅留學熱門地點之一

有種想快啲自己賺錢嘅感覺

雖然係好鐘意外國,但不時都要回港探吓親。其間做過一兩份internship。唔知點解個個都以為我係個00後嘅妹妹 (已經解釋咗好多次我唔係。)基本上對我愛護有加,當時真係有一刻完全推翻咗『現實社會係十分冷酷』嘅講法同『老細必定黑面』嘅定律,有種想快啲自己賺錢嘅感覺。

快樂嘅時光過得特別快,唔經唔覺已經到咗戴上四方帽嘅日子。其實拎住張畢業證書,又代表到啲咩?我開始覺得好迷惘,眼見身邊嘅大學同學都話唔想做野住,讀埋個master先,有啲就下定決心話要讀移民科,把心一橫要攞居留權。

我曾經有諗過不如讀nursing,趁住做護士仲係算容易移民既職業。但身為文科人嘅我,諗起讀中三生物堂解剖老鼠嘅經驗,到依加仲係心有餘悸,我就知興趣嘅野係冇得逼,於是幫自己買咗張返香港機票。

澳洲留學
喺澳洲讀書時最鐘意就係得閒又可以同朋友去下郊外散散心 欣賞下大自然風景 攝於塔斯馬尼亞州

我想做自己想做嘅嘢

其實冇一個決定係錯,好多人會覺得喺澳洲留學咗3年都唔繼續留喺嗰邊係好傻。但我覺得人各有志,而且人生苦短,我想做自己想做嘅嘢。魚與熊掌不可兼得,人哋點講唔緊要,最緊要你要為自己嘅決定負責任。只有你自己先知咩決定先係最好。同埋做決定係唔可以拖,一定要盡早定好自己方向,咁就算你喺咩國家,你都會成功。

當然,喺外國努力緊攞PR嘅你地,梗係祝你地早日攞到手啦!而同我一樣決定返香港做野嘅同學仔,又唔洗話覺得好唔習慣喺香港工作,掛住外國嘅時候咪一齊買張機票返去囉!

澳洲留學
悉尼係澳洲著名嘅海港城市 繁華程度絕不輸蝕比墨爾本 亦係好多在墨爾本留學嘅學生都會自駕遊到嘅城市之一

延伸閱讀

港人4大移民熱門地 門檻逐個講