新盤低價開售  業主要跟住劈價?

新盤低價開售 業主要跟住劈價?

朋友:「嘩!乜賣到咁平呀?」
筆者:「邊度有筍盤?」

朋友:「將軍澳個新盤囉,個名好長唔識讀嗰個呀。」
筆者:「有幾平呀?」
朋友:「折實平均呎價11,680元咋,平過晒同區一、二手。」
筆者:「舊年同區新盤好似賣到13,000至14,000元喎。」
朋友:「咪係囉,舊年買咗嗰啲咪好蝕?」
筆者:「咁如果舊年買咗同區新盤,難免唔開心。」
朋友:「點好呀?新盤愈賣愈平,係唔係樓市凶兆?」
筆者:「咁又唔一定。」
朋友:「好多專家都話遲啲會穿10,000元呀。」
筆者:「咁誇張?」
朋友:「係呀,報導仲話有好多區內買家即時大劈價。」
筆者:「乜你好似咁肉緊咁,想買咩?」

朋友:「唔係,外母喺將軍澳有個單位,問我劈唔劈價放盤好。」
筆者:「唔使咁驚青,可能係銷售策略,睇埋落去先知。」

市場氣氛仍然未好轉,開高價無著數!之前何文田大戰,部分新盤銷情慘淡,其中一個原因就是減價。

雖然發展商的開價不算貴,但市場氣氛疲弱,個個買家都期望會有驚喜價,開價不吸引,再加上同區有其他新盤截擊,推出市場之後,發現反應未如理想,發展商於是加推優惠,被傳媒渲染成銷情慘淡,被迫劈價,之前買入的業主即買即蝕,自然心有不甘。

減價是無助於提高銷量

坊間有不少專家分析,銷情差,就應該減價促銷。這是一般人的想法,事實上,並非如此,尤其是賣樓,愈是減價,就愈沒有人買,因為個個都覺得遲啲買會平啲,而家買咪好蝕底?

相反,當樓市暢旺的時候,不斷破頂創新高,買家反而會爭相入市,因為個個都覺得遲啲買會貴啲,而家唔買咪執輸?

經過上次何文田大戰,相信發展商應該掌握到市場節奏。想賣得好,就不能減價,甚至要加價。

現時市場氣氛疲弱,如何可以做到加價呢?最好的方法,莫過於首批定一個低價,一個平過晒附近一、二手的低價,吸引傳媒爭相報導,買家見到咁筍,一傳十、十傳百,免費幫你宣傳,銷情自然會相對好。

只要開盤的時候氣氛好,現場人頭湧湧,收票理想,第二批再推出的時候就可以削減優惠,甚至加價,刺激起購買慾。

例如市場價是12,000元,第一批開售11,000元,吸引市場注意,第二批加到12,000元,最後一批唔覺唔覺加到13,000元,平均呎價差唔多亦是12,000元。之前買的買家又開心,又賣得好,何樂而不為?

別心急劈價賣樓

如果你有樓在手,附近新盤低開,先別自亂陣腳。新盤都未開賣,就自動投降,大幅劈價,代理、買家知道你心理質素唔夠,只會進一步試你底線。

例如你一見新盤低開,就由400萬元減到370萬元,如果我是買家,怎會不乘勝追擊,試你350萬元或更低呢?先看看銷情,如果銷情好,新盤加你又跟加,低價可以不變;如果銷情唔好,冇計!唯有待新盤賣晒之後,再從長計議。

事先聲明,純粹經驗分享,冇包生仔,哈哈!

(相片:何柏基攝)