診所職場事 寶豬趣聞 雀仔的腸
我：「你好，乜乜診所」
佢大嗌：「大件事啦！」
撰文：珍寶豬
我塊膜要穿了：「先生你冷靜啲～有咩事？」
佢：「我條腸直咗呀！」
…你做咩咁百厭拉堆腸出嚟玩呀？乖～趁未乾快啲塞返入去啦。
我：「你發生咩事呀…」
佢：「我肚屙呀！」
【寶豬趣聞】我嘗試理解佢
即係屙屙吓成堆腸撻咗喺屎坑入面，喺堆屎上面咁呀？諗起都覺得有風味…
我嘗試理解佢：「先生你肚屙嘅又點解會知道條腸直咗呢？」
佢：「平時我屙嘅係要出吓力呀，即係點衰都好，多多少少力都緊會有啲。我頭先一坐低就知道今次唔嘢少啦！一坐就『HER』一聲出晒，成個瀑布咁」
我：「咁…你肚屙嘛，屙水嘅咪有機會咁囉～睇咗醫生未呀？未嘅好快啲嚟睇啦～」
佢：「已經唔係肚唔肚屙問題啦，係我條腸直咗呀，我有上網睇人體圖，腸唔係直㗎嘛！係扭埋一堆㗎嘛！我唔想做雀仔呀！你有冇得搞返佢做扭埋一齊呀？」
可以點搞呀？
我：「…不如你嚟睇醫生，同醫生傾呀」
佢：「你哋有冇得搞先？」
我：「我哋呢…就冇做手術嘅，不過如果到時檢查完，發現真係有需要嘅，都會轉介你去專科～」
佢：「入去『發』兩嘢咋嘛？唔係咩？」
用咩『發』呀？打蛋器呀？先生，你唔好咁啦，講講吓我條腸都有啲作動啦！
我：「我哋冇工具可以『發』到喎…」
嘟。
我被CUT線了～我都係去大個便先…
【診所職場事】先生的上司 上＋下回
有日一位先生嚟到～佢行埋嚟登記處同我講：「你哋算係點呀？」
撰文：珍寶豬 ｜圖片：電視截圖
我：「咩事呀先生～」
佢：「我噚日嚟睇過㗎！」
我：「係～咁有啲咩事？」
佢：「我今朝交咗張假紙上去，佢哋頭先收工前同我講，懷疑我張假紙係假呀！」
我：「吓？」
佢：「而家又要我嚟多轉，算係點呀？」
我：「你俾張假紙我睇先啦～同埋俾埋你覆診卡號碼我呀」
我睇睇排版，的確係噚日寫嘅病假紙嚟喎…
我：「張病假紙冇問題呀～佢哋有冇同你講邊度覺得有問題呀？」
佢指住診斷一項：「呢度呀！」
我：「URTI上呼吸道感染？有咩問題呀？」
佢：「佢哋話打過嚟問你㗎！」
我回想…今日食晏前的確有人打過嚟問～
電話響起。
我：「你好，乜乜診所」
佢：「我係上司」
邊個上司呀？我阿頭坐咗喺房喎！
我：「請問係邊位呀？」
佢：「我打嚟係要查詢我其中一名下屬嘅病情」
我：「啊？如果你想問關於病人嘅嘢，你要由病人授權咗先啊，可以用書面方式問。我哋唔可以喺電話同其他人透露關於病人嘅嘢啊。」
佢：「我唔問關於佢嘅嘢，淨係問你咩叫URTI！」
我：「上呼吸道感染」
佢：「佢有冇發燒呀？」
我：「我唔可以答病人嘅病情」
佢：「咁個上呼吸道感染有冇發燒呀？」
我：「上呼吸道感染有分好多種，每人反應都唔同，我答你唔到呀小姐」
佢：「咁個上呼吸道感染係咪要放假呀？」
我：「有病嘅最好多休息」
佢：「咁你寫咗幾多日假紙俾我個下屬呀」
我：「關於病人嘅嘢，我真係唔可以答㗎小姐，你手上如果係拎住張病假紙嘅，其實上面已經寫得好清楚。」
佢：「咁個上呼吸道感染要放幾多日假呀？」
我：「其實你咁不停轉位問都係冇咩意思嘅…」
佢：「問你咩都唔知唔答，你唔好答啦！」
嘟。
先生你所講嘅『佢哋話打過嚟問你㗎』應該係呢單啦？
上回講到先生話上司打過嚟問關於佢嘅嘢～但基於病人私隱條例，我哋係唔可以向第三者答關於病人嘅任何問題。而且電話內，你話你係劉德華都得啦～
撰文：珍寶豬 ｜圖片：電視截圖
我同先生講：「啊？今日係有人打過電話嚟問關於病假紙上嘅問題嘅～」
佢：「係呀！你做咩唔答佢呀？」
我：「因為呢啲係先生你嘅私隱，我唔會隨便喺電話度同其他人講呀～」
佢：「我唔需要咩私隱呀！」
我：「你唔需要我唔知㗎嘛」
佢：「我個樣似係咁保守嗰啲咩？我唔需要咁秘密呀！」
咁你不如話埋銀行密碼俾我知呀，咁你就真係夠開放啦～YEAH～
我：「私隱嘅嘢又唔關保唔保守事嘅…係用嚟保障返你哋啲個人資料同私隱啫」
佢：「我唔駛你做埋啲懶好心懶秘密嘅嘢㗎啦！我唔該你啦！」
我：「咁我而家有咩幫到你？」
佢遞出一張卡片：「你同我打電話去呢度」
我：「做咩呢？」
佢：「你打去耍個冧，同我氹返掂我上司！」
我：「點解我要打去講對唔住呢？」
佢：「係你今朝得罪咗個女人㗎嘛！」
我：「我都係做份內事啫？佢如果係HR嘅，佢應該知道咩係私隱㗎？佢可以上網查吓咩叫病人私隱呀～而且我同佢講過可以由你授權再以書面方式問啊。電話入面我連佢係代表咩公司都唔知～」
佢：「佢會講道理嘅就唔係女人啦！」
咁你又講得好有道理。
我：「如果你要我而家打電話去同佢講返你張病假紙係真嘅，冇問題」
佢：「加句誠懇啲嘅對唔住得唔得呀？」
加戲加對白位位五舊好冇？
我：「我只可以做到打電話同佢講返張病假紙係由我哋診所發出～」
佢：「打呀打呀打呀！」
電話接通。
我：「喂？小姐你好，我哋係乜乜診所嘅，Ｘ先生親自嚟到診所希望我哋可以打返俾你講關於佢張病假紙嘅問題，佢嗰張病假紙係由我哋診所發出嘅。」
小姐：「你是但搵個女人打嚟就當係姑娘呀！」
嘟。
先生焦急問我：「點呀？」
我重覆返小姐嘅最後一句：「佢話『你是但搵個女人打嚟就當係姑娘呀！』，之後就CUT咗我線」
佢：「死得啦！今舖真係死得人多啦！我仲可以點證明我真係嚟睇過醫生呀？」
我：「一係寫埋張到診紙俾你啦～」
佢：「真係死得啦死得啦死得啦」
我：「寫埋俾你先啦…」
佢：「死得啦死得啦死得啦，個女人變態㗎」
返工遇著變態同咩都懷疑嘅阿頭，又真係好慘嘅…
