樓

24歲有樓已升值 放租定沽出好 | 理財入門 | 龔成信箱

投資

廣告

24歲有樓已升值,放租定沽出好?有讀者來信向龔成請教以下問題。另外,也有讀者向龔成請教其他投資股票如月供股票等問題,龔成一一作答。

撰文 : 龔成 |圖片:新傳媒資料室

24歲有樓已升值 放租定沽出好

問1:

龔sir,你好,想請教你:

1)我今年24歲,係2年前到同屋企人合資買左馬頭圍附近的開放式單位(近地鐵站),大約萬9至2萬呎,來緊8月就收樓。

我大約睇過附近既地段現時市價約萬5至萬9,而租金大約萬1至萬3到。我地屋企人猶豫緊放租定話賣出去?

因為考慮到果區未來有唔錯發展(近西九、地鐵站、香港市中心等等);同時都覺得依幾年樓市過熱,擔心樓價下滑。所以希望你比少少意見。

2)另外,我自己都有月供開股票,用$5000,分別每月投放$1000,係以下5隻股票:00002、00003、00066、01211、02800。

依個組合會唔會太分散?或者需唔需要作調整?

3)因為最近都研究緊龔sir你本書,對3隻潛力股相對有興趣01448、01177、01431,你會相對推介我投資邊一隻?同埋現時又值唔值得投資/係咩價位買入依3隻股票會比較好?

龔成老師答:

1)比起預期樓市升跌,你地本身的財富組合,其實更加影響投資決定。如果你地本身有3個以上的物業,那就可考慮賣出,再將財富轉到其他類別。

否則,都可考慮持有該單位,先收租。因為你家人本身有自住的需要,而你將來都有自住的需要,這是作基本「住」的需要考慮。

同時,這單位的地點不錯,相信長遠不會太差。雖然我個人一向對一手樓有保留(因為大多不平),但你持有都無問題的。

至於樓市過熱問題,樓市的確有點貴,但太多人以「預期」樓市作投資決策,最後卻估錯,所以,比起預期,我會建議你用「你地的財富分配」,作為出發點。

2)組合不算散,你只要保持長期月供就可以了,就算短期股價上落,你也不用理會,一直供就得。

3)福壽園(1448)及中生製藥(1177)都好有質素,同時有潛力,但現價不平,你可先小注投資,到回落才正式買入。原生態(1431)有質素下跌的情況,雖然長期仍有潛力,但暫時觀察下先。

另外,這些潛力股,不能佔你組合的太多,你以小注及分注模式投資最適合。(對照龔成信箱Q4391)

中國鐵建點睇

問 2:

龔成兄,想資詢一下1186中鐵建茌回調了大半年,並到達年線287天,見到在周K也有支持。

我看到它的RSI已經開始底背馳及反彈,MACD也為正數,這基建股能吸嗎?不知中、長線能重拾升勢嗎?

龔成老師答:

抱歉,我不用技術分析,亦不認同。

所以未能提供意見。我不預期股價走勢的,只分析企業質素,以及現價平貴。

中國鐵建(1186)有質素的,同時現價不貴,前景正面的。(對照龔成信箱Q4390)

50穩健收息股

問 3:

你好,成哥,機緣巧合見到你網上既分享,我覺得你好有心機去幫助同鼓勵年青人,你既成功例子真係好勵志!

岩岩睇完你既<80後既2百萬富翁>

另外,都買左<財務自由行>,<50穩健收息股>同埋<大富翁致富藍圖>,我會努力拜讀你既著作,同埋好好吸收你既知識,好多謝你分享。

另外,有少少關於股票既問題想請教你,我父親因為唔識,所以聽朋友既建議之前

$10.68 同$7.98 各買左10手(1988)民生銀行,

$0.85 買左4手8311圓美光電

$3.71 買左10手3988中國銀行

請教成哥,以上股票應該咩時間減持或者咩價位止蝕呢? 我依家開始研究股票,所以打算幫父親處理左呢d唔優質既股票,然後幫父親再購入一d穩陣收息同平穩增長股!

龔成老師答:

是否持有一隻股票,關鍵位不是買入價,是股票質素,買入價只是心理影響。

民生銀行(1988)質素中等,雖然都有投資價值,但不用持有太多,始終這企業的增長力不足,收息都算可以,但長遠會令組合跑輸大市。暫時守住先都可以。

圓美光電(8311)比較麻煩,每年的生意都在倒退,近年的跌幅就更明顯,本身的賺錢能力已經不強,近年更出現虧損

佢做顯示面板、光學產品及相關電子部件之貿易,在近年這類業務發展的情況下,理論上應該唔差,但最後卻出現虧損,可財經營上有d問題。我對這股有保留,如有較大的反彈,最好還是賣出這股。

中國銀行(3988)有質素的,可以長線持有,但增長力不會強,可作為收息股的一員。

但要留意,組合中的內銀股,佔了相當大的部分,這會引至集中風險情況,最好增加其他版塊的佔比,同時減少集中內銀。(對照龔成信箱Q4392)

累積財富是長期過程

問 4:

老師,看你的書,每次都想,如果早D識你就好了。

龔成老師答:

哈哈,我每本書的角度,都是長期,所以之後仍適用的。累積財富是長期過程,加油!(對照龔成信箱Q4393)

資金有限想投資

問 5:

你好,我想問一些問題,是關於投資,因為我是新手

我資金亦有限,如果係想選擇月供股票的形式,我應該要考慮到甚麼因素,而我每月的預算大約是2000-3000會否太少?

龔成老師答:

作為投資初階者,月供股票是適合的,因為買入價會平均。

月供股是長期累積股票的過程,所以你一定要選優質股,同時長期進行,就算短期股價上落,亦不用理會。如果你不懂選股,就供盈富(2800)。

每供$2000的確較少,我擔心手續費佔了你不少部分,所以你最好比較下坊間的銀行月供,選較平手續費的。(對照龔成信箱Q4394)

中國信達點睇

問 6:

想請教你,1359信達,風險高嗎?

龔成老師答:

中國信達(1359)的業務有風險。但不是無投資價值。

佢業務包拾不良資產經營,例如收購及受託管理、投資及處置金融及非金融機構的不良資產經營、債轉股資產經營、破產管理等。

佢從金融機構同非金融企業收購不良債權資產,然後對其進行管理並通過多種方式進行處置,最終實現資產升值及最大化回收現金。

佢主要採取兩種經營模式以開展不良資產經營業務,包括按原值打折收購,並擇機進行處置以回收現金,以及在收購同時即確定債權重組協議的附重組條件類不良資產經營模式。

所以,佢存有風險,但近年的盈利的確有唔錯升幅,加上現時的市盈率只有5倍,反映了不少業務風險。

所以,這股有投資價值,但不能太大注,你要明白這股,有些我地難以預期的風險出現,這必然會令股價波動。(對照龔成信箱Q4395)

耀才證券金融點睇

問 7:

1428點睇?

龔成老師答:

耀才證券金融(1428)不過不失,但業務波動。佢之前的盈利都有一定的上落,因為股市的興旺與否,係佢的主要收入來源,而股市一定有週期,呢個唔單止令佢業務波動,同時令佢股價波動。

現時市盈率15倍,仍然唔算好貴,但這類股有週期性,最好分注買入較好。(對照龔成信箱Q4396)

A股ETF值得買入嗎

問 8:

龔sir,大市不停升,幾乎無股票屬於便宜,想問下現時咁既環境,係唔係只可以觀望同儲錢,無其他野可以做?

呢排既心態就係想等待股市大跌,因為我起步較遲,識買既時候已經過左有平貨執既時間!

請問現時A股ETF值得買入嗎?

龔成老師答:

要睇你的貨夠唔夠。如果你已持有一定的貨,其實可以乜都唔做,以我自己為例,我的貨已夠,所以近半年無買過野,又無賣過野,長線投資,等資產升值。

如果你唔夠貨,點都要買翻少少,因為大市雖然升左唔少,但未到狂熱期,你要有少少貨。所以,可以將部分資金,去做月供票,南方A50(2822)可月供的。(對照龔成信箱Q4397)

做P定H按

問 9:

老師你好,想問下你會建議做p定h按?

(另外,我已報了你的課程)

龔成老師答:

H按比較好,雖然短期的供款會有波動,但從長期的總金額支出計,H按仍是比較著數,同埋,H按有封頂,所以不用擔心。

好,課程見!(對照龔成信箱Q4398)

財務自由行點先做得到

問 10:

龔先生,一連看了閣下五本作品,對我最大啟發是《財務自由行》對資產的定義。謝謝。

渣左幾隻股票10年,有賺有蝕。其中有國航753已有1.5倍回報,正考慮應否換馬到其他優質股如金沙,比亞迪或媒氣。你對國航有可睇法?可否長渣?

另外,兩年前入左長和及長實,因其業務多對外發展,可以對沖中國經濟,就算中國向下行也不受影響。

多見你分析同系其他公司,卻少提001及1113,你覺得這兩公司有質素嗎?可否長線投資?謝謝。

龔成老師答:

多謝支持!《財務自由行》對不少人來說,都是十分新的概念,佢地會發現「原本財富是這樣的」。

一隻股票持有與否,應該轉其他,同原本買入價,賺了多少,其本上無關。

中國國航(0753)正面的,賺錢能力不差,只是企業有週期,所以股價會較為波動,可以考慮在股價略貴時,賣出一部分或全部。

金沙(1928)、比亞迪(1211)、煤氣(0003)都可投資,但現價都不平,轉到這些股可以,但不要太急去入,最好分注。

長和(0001)及長實(1113)其實都正面的,兩隻都有一定的質素,不過增長的潛力,就不算太大,只能平穩增長。你有貨的,可長線持有。(對照龔成信箱Q4399)

多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。

另外,由於提問人數眾多,見諒無法即日回覆,如果是普通的提問,預起碼要3天以上才能回覆,若然是較複雜的提問,起碼要7天才能回覆,希望各位能諒解。

編按:龔成是於公屋長大的80後青年,畢業後於銀行從事投資相關工作,雖然月薪僅萬多元,但因為理財及投資有道,只花五年時間,於28歲已累積到100萬元資產,目前淨流動資產有數百萬元。著有暢銷書《80後百萬富翁》、《80後2百萬富翁》及《財務自由行》,並出任創富課程導師。

facebook專頁:facebook.com/80shing

個人網站:80shing.skx.io/