好老細 究竟係咪絕種生物? | 職場連載小說 | 有心無默
撰文：有心無默 ｜圖片：網絡圖片
職場難遇好老細
朋友A君曾經遇過一位老細，見工閒談之間講到自己幾咁開明，話呢行用創意搵食嘅，工作模式絕對唔能夠死板。
因此參考咗外國公司嘅管理模式，用開放式辦公室（員工冇固定位置）、入晒最新款嘅遊機、按摩椅、飛鏢機、乒乓波枱，甚至連打邊爐用嘅煲都有。話呢啲設備都係等班員工諗橋諗到頭昏腦脹嘅時候可以拎嚟放鬆下。
開放式辦公室只是表面
講得好聽，實際當然係另一回事。返咗唔夠一星期，A君就知道中晒伏：所謂開放式辦公室，其實員工們都係各自盤踞一個位置，走嚟走去就會被人（包括老細）當成異類。
至於啲所謂放鬆設備，其實根本就忙到冇任何機會用──遊戲機全部封晒塵（對上一次係老細同班客玩）、按摩椅長期冇插電、飛鏢機壞嘅、而乒乓波枱老早就放滿晒文件同物資。至於邊爐煲？有位女員工見過裡面有隻死咗嘅四腳蛇，嚇到差啲魂飛魄散。
方便分享「管理心得」
講到尾，以上所有嘢都係呢位老細嘅表面工程，等佢同客分享「管理心得」嘅時候可以稍微吹噓下。其實骨子裡都係嗰種為業績為錢嘅怪物老細。自己從來都冇帶頭去做示範同榜樣，試問班細嘅又點敢去「脫離死板」？
咁到底今時今日香港係咪冇好老細？經常轉工嘅朋友B表示佢而家呢個就係，所以今次先會喺同一間做咁耐。話說佢係離島居民，因為返火炭嘅緣故，有時即使預早返工都難免會遲到。
成日遲到心知不妙
佢當然知道有問題，見返咗幾年工開始有啲積蓄。本來打算租間市區樓同女友一齊住，無奈搵極都搵唔啱心水。直到有日，佢老細突然叫咗佢入房……
「聽人事部阿姐講，你呢期成日遲到喎。」
聽到老細講呢句嘅時候，朋友B已經心知不妙。當刻又諗唔到咩藉口，唯有如實講返自己嘅情況。最多賴下港鐵成日塞同壞，希望可以加少少同情分。
老闆幫手租平樓
「其實我聽同事講過，話你搵緊樓租。我識人喺黃埔有間仲未有人租，你會唔會有興趣去睇下？」估唔到老細聽完之後居然咁講。
最後B君用市價平少少嘅價錢租咗嗰間屋，冇伏冇古怪，到而家已經住咗兩年有多。幾多錢唔係重點，重點係B君意識到呢位老細真係會關心同事嘅情況。
有次有員工屋企人出咗事，老細二話不說就車佢去醫院，事後仲俾佢請咗成星期假去處理。公司旅行、生日假呢啲已經算係基本嘢，可能因為老細同佢老婆係做義工認識嘅緣故，所以間公司係有「義工假期」呢回事，鼓勵員工去做義工順便結識下新朋友。
老細中嘅奇葩
「雖然有時真係幾忙，但好少見一間公司嘅員工係咁有歸屬感。我呢位老細的確係老細中嘅奇葩。」呢個就係B君最後得出嚟嘅評價。
當然，現實呢種「奇葩」真係萬中無一，可遇不可求。打工仔們，喺有本錢自己做老細之前，繼續頂硬上啦。
編按：筆者是網絡作家，以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。
