住大灣區 過千呎賣百幾萬 搭高鐵香港返工 有無得諗 | 樓市入門 | 海外置業
撰文：1%Anthony ｜圖片：新傳媒資料室
同學Ａ： 「上次跟你哋去大灣區睇樓，真係大開眼界！」
同學Ｂ： 「過千呎都係百幾萬，仲要係名牌大屋苑，環境又靚！」
筆者： 「得閒咪多啲一齊上去睇吓樓囉，吃喝玩樂賺嘛！」
同學Ａ： 「話時話，最近馬時亨建議年青人住大灣區喎。」
同學Ｂ： 「見到呀，好似好多網民鬧喎，哈哈！」
筆者： 「梗係啦，香港係自己地方，反而自己冇得住，慘！」
同學Ａ： 「房屋問題邊有咁易解決到丫。」
同學Ｂ： 「其實…返大灣區住又有冇得諗呢？」
同學Ａ： 「樓價又真係平好多，識得揀仲有機會倍升添。」
同學Ｂ： 「但係真係好遠喎。」
同學Ａ： 「馬時亨話可以日日搭高鐵返工，個零鐘頭就到。」
同學Ｂ： 「佢係港鐵主席，梗係想你日日搭高鐵啦。」
同學Ａ： 「佢話好多美國人都係咁喎。」
同學Ｂ： 「我啲美國朋友一日返幾個鐘頭工咋，梗係得啦。」
筆者： 「我都覺得…純投資就好，住就唔係好Work！」
大灣區住香港返工 唔掂！
搬去大灣區住，日日搭高鐵到香港返工，唔掂！
正如同學所講，歐美國家普遍的工時較短，花多些少時間搭車冇乜所謂，然而香港人工作時間長，由朝捱到晚，下班後很多時候還要應酬、秘撈、上課學習，回家的時候，高鐵分分鐘已經關了，怎麼回家呢？如果家在香港，還可以到旺角、銅鑼灣等深宵交通樞紐，搭通宵極速小巴、的士，如果家在大灣區，睇怕要找賓館宿一宵。
如果你習慣較早回家，都未必有著數！
首先，交通費驚人！港鐵的車費其實都幾貴，而且經常加價，高鐵車費相信都唔會益街坊，據運輸及房屋局局長陳帆透露，香港到福田80元，到深圳北90元，到廣州南260元，如果在廣州南住，每日來回車費豈非500多元？
還有接駁車費呢？相信你的居所、辦公室不會都在高鐵上蓋吧！落車之後你不會迫巴士吧，隨時要再坐一程「滴滴」，又多20元，每月車費隨時要1.5、1.6萬，可以租個兩房單位啦！每日來回還要幾個小時，何苦呢？
近近哋住福田？咪玩啦！深圳樓價追到香港啦！最近有同學的福田單位放盤，邀請我們參觀，建築400多呎，一房一廳、殘裝、小屋苑，都要賣240萬人民幣，即是300萬港元，若以實用面積計呎價差不多過萬了！
最多只可以做七成按揭，沒有高成數，首期隨時要俾過百萬，而且按揭利息又高，動輒5%，即使俾你上到會，供樓隨時仲辛苦過買香港樓！
自由工作者 可以考慮
住遠少少得嗎？有平貨！不過香港返工確實遠！據聞大部份高鐵班次只到深圳北、廣州南，福田、深圳北樓價貴，而且在中央大力調控，有調整壓力，不多說了。
廣州南呢？質素較好的新屋苑，大約2.5萬／平方米，100平方米計算，大約250萬人民幣，而且未必借到按揭。其他地方例如惠州、東莞價錢較平，性價比較高，可惜高鐵班次少，甚至要轉車，咁就唔係1小時了，計埋安檢、過關、等車，再計埋落高鐵之後，還要接駁，每程隨時超過2小時！
還要未必一定買到車票！尤其大時大節，國慶、新年、清明等，都要提前撲飛！住珠海走港珠澳大橋得嗎？珠海舊區日日塞車塞到爆，不如試一次先再諗啦。
如果你是自由工作者，大部份時間在家工作，可以考慮！要考慮的是否能融入當地生活，其實在大灣區的二、三線城市生活是挺舒服的，地方夠大，生活指數又低，還可以申請個車牌，自己養部車到處去，大陸即使是二、三線城市，現在家家戶戶都已經有車，買車、泊車又平，爽啊！
從投資角度看 更值得考慮
如果你是從投資角度看，最緊要賺錢，更加值得考慮！
香港樓價升到這個水平，即使可以繼續升，明顯水位已經不多，新界區一個250呎左右的上車盤，已經炒到超過450萬了，難道還可以倍翻？升到900萬？然而大陸不同，很多城市仍在高速增長期，以我們兩年多前買入的珠海、惠州、東莞等大灣區主要二線城市的樓盤為例，都已經升超過一倍了！
升了一倍，呎價仍然只是千多、二千元，倍翻冇難道，只要揀得對，賺錢易好多！與其諗搬返大灣區住，不如在香港平平哋自己租個地方，又或者幾個朋友、同事共居，留番啲錢來買大陸樓，賺錢好過啦！
編按：作者為1%投資培訓的地產課程總監，著有《買樓上車防中伏》、《上車又住又賺》、《樓。轉命運》、《工商舖小本投資入門》、《50 萬上車》、《投資買樓賺錢筆記》等等，其博客《第一桶金》總瀏覽量逾300萬人次，曾接受多間傳媒專訪及出任電台地產節目嘉賓主持，並擔任TVB節目「有樓萬事足」顧問。2000年科網股爆破，曾欠下近一年薪金卡數。經債務重組後，2004年股樓雙線出擊，短短四年由滿身卡數打工仔，變出六層樓。其後與投資兵團大舉出擊投資物業，並進軍商鋪、工廈市場，以穩健投資策略，成功變出雙位數物業。
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
