診所

診所職場事 寶豬趣聞 正氣大叔 上回

職場

廣告

有日有位叔叔嚟到~

佢冇行埋嚟登記,只係行埋一邊坐低。
我見隔咗幾分鐘佢都未嚟登記,於是我主動問:「先生你係咪睇醫生呀?」
佢望望我,再笑咗一吓:「入嚟一定係睇醫生㗎咩,我天地有正氣駛咩睇醫生?」
咁你入嚟做咩?你入嚟放緊正氣呀?放屁行遠啲喎!

撰文:珍寶豬

原先坐佢隔離嘅姨姨嚇到即刻坐遠幾個身位。
叔叔望到姨姨咁就講:「你望吓!我啲氣彈到佢幾丈遠啦!」
…傻的嗎?
我:「…先生,我哋呢度診所嚟㗎,入得嚟嘅都係睇醫生㗎啦,如果你唔係睇醫生嘅,咁你喺度做咩呀?」
佢:「我嚟同你講道理」
走啦好冇呀?
我冇出聲。
佢行埋嚟:「我同你講個故仔,以前有個人打開門口做生意,係咪唔歡迎人入嚟?」

你呢個並唔係故仔嚟,好不好…
我:「我哋呢度診所嚟~係嚟睇醫生㗎」
佢:「你隻門打開㗎嘛」
我指指隻門:「我哋門常關,頭先係你自己推開佢…」
佢望望隻門,再望望我:「頭先隻門係打開嘅!係你指示我入嚟。」
我唔同你玩啦。你屈人嘅…

佢望住低頭做自己嘢嘅我:「喂?」
我抬頭以最親切嘅笑容回應:「嗯?做咩事呀?」
佢拎出身分證:「唔好講嘢,而家即刻同我登記」
…你鬼上身呀?頭先又話天地有正氣唔駛睇醫生,轉個頭又嗌我登記?
我邊登記邊同佢講:「麻煩先生你喺紙上寫低電話地址呀~」
佢好大聲咁講:「你抄我牌呀?我都知我呢挺男人唔易做㗎啦」

我望望佢…你死得未呀…隻鬼好猛喎。

下回續。

珍寶豬過往精彩文篇:

【診所職場事】演技的重要 上回

診所職場事 寶豬趣聞  正氣大叔 上回

有日一位先生喺診所門外大嗌:「喂呀喂呀喂呀」
我行出去望吓,問佢:「先生,請問有咩事呀?」
佢:「我行唔到呀」

撰文:珍寶豬

咦,咁神奇?咁你頭先點嚟㗎?你喺個天跌落嚟㗎?
我望住企得不知幾穩嘅佢:「點解行唔到呀你?」
佢即刻坐低俾我睇:「我頭先遇到意外呀!你睇唔到咩?」
我睇到就唔駛問你啦~
我:「咩意外呢?」
佢:「我俾架的士撞呀!」

你唔好同我講鬼故呀下!我搵人打到你魂飛魄散㗎!
我:「咁大件事?咁要去醫院喎」
佢又企返起身:「你哋唔睇㗎咩?」
我:「我哋診所仔嚟咋,你遇到車禍咁大件事梗係去醫院啦」

佢:「我好小問題啫」
我:「咁我哋有咩幫到你呀?如果你係睇醫生嘅就入嚟登記啦」
佢:「我行唔到呀」

你坐低企起身都冇事,又點行唔到法呀?
我:「咁呀?你行唔到可能好大件事喎,你頭先有冇報警呀?」
佢:「哎呀」,又坐低。
我:「做咩呀?」
佢輕撫額頭:「唔好同我提報警呀,一提就頭都痛埋」
我:「你係咪撞親個頭呀?」
佢:「可能係都唔定」

有就有,冇就冇,咩嘢叫可能係啫…
我:「不如我都係幫你打999啦」
佢瞓低喺地下滾地:「哎呀哎呀哎呀…」
開始有路人企喺度望吓佢發生咩事…
佢繼續:「哎呀,我行唔到呀我行唔到呀,醫生救我呀,我啲意外後遺症出晒嚟啦」

上回完!

【診所職場事】演技的重要 下回

診所職場事 寶豬趣聞  正氣大叔 上回

上回講到一個自稱遇上交通意外嘅先生拒絕去醫院求醫,寧願喺診所門外碌地沙…

撰文:珍寶豬

佢一路碌一路嗌:「哎…醫生呀…」
我:「先生,你不如入咗去診所先講啦?你頭先都好哋哋嘅」
佢:「出晒嚟呀,意外後遺症呀」
我:「咁我打999㗎啦,你咁樣我哋都幫你唔到㗎,一定要去醫院㗎」
我轉身行返入診所,打算拎電話。
佢追入嚟拍我膊頭:「唏,我又冇事啦」
……你不如訓練吓啲演技先?或者學吓點將個起承轉合位安排得自然啲先好冇?你而家咁太跳脫啦,脫到甩晒TONE。
我:「先生,我其實冇咩時間同你玩㗎咋」
佢:「我冇玩呀」

我:「你一係就正正經經登記睇醫生啦」
佢拎出一堆紙:「我要填呢份嘢」
我望望,意外保險嚟喎:「啊?意外保?填係冇問題嘅,不過我有責任提返你,冇明顯因意外而造成嘅傷痕的話,保險公司有可能係唔受理嘅」
佢:「我頭先喺出面咁喎?」
你碌地沙有冇碌到自己爆晒缸呀?冇咪FAIL囉!嚟~出去再碌過,唔成功唔好入嚟呀。
我:「我頭先淨係見到你喺出面坐低起物坐低起身又瞓吓…你頭先俾車撞有冇整親邊度呀?」
佢摸摸自己嘅身體:「一定要有傷?」
我:「因為份FORM係需要填受傷部位同傷勢嘅…」
佢搶返份表望:「係喎!點解之前我睇唔到㗎?」

因為你醉心於開發自我演技上…

我:「咁….你要唔要重頭嚟過呀?」
佢呆呆的望住我,然後退後離開診所。

下次記得做戲做全套。

【診所職場事】先生的上司 上+下回

診所職場事 寶豬趣聞  正氣大叔 上回

有日一位先生嚟到~佢行埋嚟登記處同我講:「你哋算係點呀?」

撰文:珍寶豬 |圖片:電視截圖

我:「咩事呀先生~」
佢:「我噚日嚟睇過㗎!」
我:「係~咁有啲咩事?」
佢:「我今朝交咗張假紙上去,佢哋頭先收工前同我講,懷疑我張假紙係假呀!」
我:「吓?」
佢:「而家又要我嚟多轉,算係點呀?」
我:「你俾張假紙我睇先啦~同埋俾埋你覆診卡號碼我呀」
我睇睇排版,的確係噚日寫嘅病假紙嚟喎…
我:「張病假紙冇問題呀~佢哋有冇同你講邊度覺得有問題呀?」
佢指住診斷一項:「呢度呀!」
我:「URTI上呼吸道感染?有咩問題呀?」

佢:「佢哋話打過嚟問你㗎!」

我回想…今日食晏前的確有人打過嚟問~
電話響起。
我:「你好,乜乜診所」
佢:「我係上司」
邊個上司呀?我阿頭坐咗喺房喎!
我:「請問係邊位呀?」
佢:「我打嚟係要查詢我其中一名下屬嘅病情」
我:「啊?如果你想問關於病人嘅嘢,你要由病人授權咗先啊,可以用書面方式問。我哋唔可以喺電話同其他人透露關於病人嘅嘢啊。」
佢:「我唔問關於佢嘅嘢,淨係問你咩叫URTI!」
我:「上呼吸道感染」
佢:「佢有冇發燒呀?」
我:「我唔可以答病人嘅病情」
佢:「咁個上呼吸道感染有冇發燒呀?」

我:「上呼吸道感染有分好多種,每人反應都唔同,我答你唔到呀小姐」
佢:「咁個上呼吸道感染係咪要放假呀?」
我:「有病嘅最好多休息」
佢:「咁你寫咗幾多日假紙俾我個下屬呀」
我:「關於病人嘅嘢,我真係唔可以答㗎小姐,你手上如果係拎住張病假紙嘅,其實上面已經寫得好清楚。」
佢:「咁個上呼吸道感染要放幾多日假呀?」
我:「其實你咁不停轉位問都係冇咩意思嘅…」
佢:「問你咩都唔知唔答,你唔好答啦!」
嘟。

先生你所講嘅『佢哋話打過嚟問你㗎』應該係呢單啦?

診所職場事 寶豬趣聞  正氣大叔 上回

上回講到先生話上司打過嚟問關於佢嘅嘢~但基於病人私隱條例,我哋係唔可以向第三者答關於病人嘅任何問題。而且電話內,你話你係劉德華都得啦~

撰文:珍寶豬 |圖片:電視截圖

我同先生講:「啊?今日係有人打過電話嚟問關於病假紙上嘅問題嘅~」

佢:「係呀!你做咩唔答佢呀?」
我:「因為呢啲係先生你嘅私隱,我唔會隨便喺電話度同其他人講呀~」
佢:「我唔需要咩私隱呀!」
我:「你唔需要我唔知㗎嘛」
佢:「我個樣似係咁保守嗰啲咩?我唔需要咁秘密呀!」
咁你不如話埋銀行密碼俾我知呀,咁你就真係夠開放啦~YEAH~

我:「私隱嘅嘢又唔關保唔保守事嘅…係用嚟保障返你哋啲個人資料同私隱啫」
佢:「我唔駛你做埋啲懶好心懶秘密嘅嘢㗎啦!我唔該你啦!」
我:「咁我而家有咩幫到你?」

佢遞出一張卡片:「你同我打電話去呢度」
我:「做咩呢?」
佢:「你打去耍個冧,同我氹返掂我上司!」
我:「點解我要打去講對唔住呢?」
佢:「係你今朝得罪咗個女人㗎嘛!」
我:「我都係做份內事啫?佢如果係HR嘅,佢應該知道咩係私隱㗎?佢可以上網查吓咩叫病人私隱呀~而且我同佢講過可以由你授權再以書面方式問啊。電話入面我連佢係代表咩公司都唔知~」

佢:「佢會講道理嘅就唔係女人啦!」
咁你又講得好有道理。
我:「如果你要我而家打電話去同佢講返你張病假紙係真嘅,冇問題」
佢:「加句誠懇啲嘅對唔住得唔得呀?」
加戲加對白位位五舊好冇?
我:「我只可以做到打電話同佢講返張病假紙係由我哋診所發出~」
佢:「打呀打呀打呀!」

電話接通。
我:「喂?小姐你好,我哋係乜乜診所嘅,X先生親自嚟到診所希望我哋可以打返俾你講關於佢張病假紙嘅問題,佢嗰張病假紙係由我哋診所發出嘅。」
小姐:「你是但搵個女人打嚟就當係姑娘呀!」
嘟。

先生焦急問我:「點呀?」
我重覆返小姐嘅最後一句:「佢話『你是但搵個女人打嚟就當係姑娘呀!』,之後就CUT咗我線」

佢:「死得啦!今舖真係死得人多啦!我仲可以點證明我真係嚟睇過醫生呀?」
我:「一係寫埋張到診紙俾你啦~」
佢:「真係死得啦死得啦死得啦」
我:「寫埋俾你先啦…」
佢:「死得啦死得啦死得啦,個女人變態㗎」

返工遇著變態同咩都懷疑嘅阿頭,又真係好慘嘅…

體驗1分鐘貸款批核 隨時提款話咁易

去旅遊想搵住宿?識睇一定睇呢到!

延伸閱讀:

【寶豬趣聞】小妹妹育成

診所職場事 寶豬趣聞  正氣大叔 上回