診所職場事 寶豬趣聞 現實與市儈

診所職場事 寶豬趣聞 現實與市儈

有日一位小姐嚟到診所~
佢行埋嚟望望我個登記位:「你喺呢度做㗎?」

唔係呀,我路過見呢度個位幾風涼水冷咪試吓喺度爆石囉。

撰文:珍寶豬

我:「係咪睇醫生呀小姐?」
佢:「唔駛住,我問多少少嘢先」
我:「咩嘢呢?」
佢:「第一呢度收費幾多呀?」
我:「三百蚊有三日藥嘅」
佢好大反應:「三舊水?三舊水我可以做到好多嘢啦!」
哦?係呀?咁你拎去做嘢啦。
我冇出聲,只送上一個微笑~

佢:「真係三舊水呀?我去對面茶餐廳食到好多餐啦喎?我駛唔駛俾三舊水去睇個咁嘅爛鬼醫生呀?你啲藥好靚㗎?」
你不如試吓拎晒三百蚊去食乾炒牛河呀,或者將六碟乾炒牛河煲幾一碗水再乾咗佢,你可能唔駛嚟睇醫生㗎啦~

我:「小姐,咁你係咪唔駛睇醫生啦?我呢度係幫你登記㗎咋」
佢:「我問你嘢呀嘛」
我:「問我冇用㗎,我登記咋嘛,入去睇醫生問醫生啦」

佢:「我都要首先知道值唔值得俾呢三舊水呀!三舊水我真係可以做到好多嘢㗎啦」
我:「你需要睇醫生嘅話,就都要俾嘅…係睇你需唔需要嘅啫」
佢:「我個世界唔需要啲咩,更加唔係特別需要啲咩」
你知唔知自己講緊咩?
我:「如果你睇嘅,我就同你登記啦」

佢:「醫生係咪一定要搵錢㗎啫?係咪一定要搞到咁市儈㗎?」
醫生寒窗苦讀多年,仲要俾你話市儈…小姐,你份人一定最唔市懀啦。
我:「你睇咗醫生嘅,我哋係一定會收你錢」

佢:「啲爛鬼醫生淨係識講錢㗎咋,冇責任心㗎!見到啲良好市民生活喺水深火熱之中都可以無所動容㗎!」

小姐舉舉中指走了。我哋普通科都幫唔到你啲咩㗎啦…

珍寶豬過往精彩文篇:

診所職場事 寶豬趣聞 神秘顧客

診所職場事 寶豬趣聞 現實與市儈

電話響起~
我:「你好,乜乜診所」
佢係位先生:「登記呀」
我:「我哋冇得電話預約同登記嘅,你嚟到診所先登記啊」
佢:「唔係呀?咁落後?」
我:「嚟到排隊得㗎啦」
佢:「你當我企咗喺你前面唔得咩?」

我前面的確有人,係一位大媽…我而家個感覺好複雜。
我:「…唔得呀,如果個個都咁嘅就唔駛嚟登記啦,個個電話預約咪得囉」
佢:「你串我呀?」

我:「我咁講你知啫」
佢:「你而家即刻轉去客戶滿意服務評分呀」
乜檸嘢客戶滿意呀…
我:「先生我唔明你講咩啊?」
佢:「評分系統呀!俾我嘟你㗎!」
唔駛轉去咩系統啦,你而家嘟都得㗎~
我:「我哋冇呢啲嘢㗎…」
佢:「咩都冇咁落後?你扮嘢呀?」
我:「我哋真係冇㗎~」
佢靜咗十秒左右:「我係你哋公司派嚟嘅神秘顧客」
你一講完,你就即刻唔神秘啦…
我:「哦…係呀」
佢:「喺電話度你都要滿足我所有嘅慾望,你知唔知你只要講錯一句嘢,你而家可以即刻執包袱走?」
我:「先生呀?我哋診所好忙㗎,你有咩嘅都嚟到診所再講啦,我哋冇電話預約冇電話登記,呢個係我哋醫生規定嘅~」

佢:「我係神秘顧客呀!」
我:「所以我更加應該展現出我有幾一視同仁,絕對唔會幫你電話登記。」

嘟。
睇嚟我合格了,醫生都冇叫我執包袱…

診所職場事 寶豬趣聞 正氣大叔 上回

診所職場事 寶豬趣聞 現實與市儈

有日有位叔叔嚟到~
佢冇行埋嚟登記,只係行埋一邊坐低。
我見隔咗幾分鐘佢都未嚟登記,於是我主動問:「先生你係咪睇醫生呀?」
佢望望我,再笑咗一吓:「入嚟一定係睇醫生㗎咩,我天地有正氣駛咩睇醫生?」
咁你入嚟做咩?你入嚟放緊正氣呀?放屁行遠啲喎!

原先坐佢隔離嘅姨姨嚇到即刻坐遠幾個身位。
叔叔望到姨姨咁就講:「你望吓!我啲氣彈到佢幾丈遠啦!」
…傻的嗎?
我:「…先生,我哋呢度診所嚟㗎,入得嚟嘅都係睇醫生㗎啦,如果你唔係睇醫生嘅,咁你喺度做咩呀?」

佢:「我嚟同你講道理」
走啦好冇呀?
我冇出聲。
佢行埋嚟:「我同你講個故仔,以前有個人打開門口做生意,係咪唔歡迎人入嚟?」
你呢個並唔係故仔嚟,好不好…
我:「我哋呢度診所嚟~係嚟睇醫生㗎」
佢:「你隻門打開㗎嘛」
我指指隻門:「我哋門常關,頭先係你自己推開佢…」
佢望望隻門,再望望我:「頭先隻門係打開嘅!係你指示我入嚟。」
我唔同你玩啦。你屈人嘅…

佢望住低頭做自己嘢嘅我:「喂?」
我抬頭以最親切嘅笑容回應:「嗯?做咩事呀?」
佢拎出身分證:「唔好講嘢,而家即刻同我登記」
…你鬼上身呀?頭先又話天地有正氣唔駛睇醫生,轉個頭又嗌我登記?

我邊登記邊同佢講:「麻煩先生你喺紙上寫低電話地址呀~」
佢好大聲咁講:「你抄我牌呀?我都知我呢挺男人唔易做㗎啦」
我望望佢…你死得未呀…隻鬼好猛喎。

診所職場事 寶豬趣聞 正氣大叔 下回

診所職場事 寶豬趣聞 現實與市儈

上回講到有位天地有正氣嘅叔叔嚟診所話自己唔駛睇醫生,點知轉個頭就鬼鬼祟祟咁行埋嚟登記…
登記後,我同佢講:「好啦,登記完㗎啦,你坐低等嗌名啦」
佢又好大聲講:「醫生邀請我入去同佢商討大事!好!你哋咁有誠意!OK!」
佢昂首闊步擘大對肶坐返低…

 

坐喺出面嘅姨姨望住佢,佢:「我同醫生有嘢斟斟!」
姨姨一臉疑惑。
佢再講:「我呢啲成功人士嚟,你今日好彩呀,咁都見到我一面。頭先個姑娘都忍唔住抄我牌」

冤枉呀大人,你唔好亂咁散播虛假消息呀!我會俾醫生挾去眼科㗎!
姨姨:「係真唔係呀?」
佢:「梗係啦,唔信你問姑娘啦」
佢同姨姨望住我,好望唔望之際剛剛我忍唔住翻咗個白眼…
佢:「哎哎哎!我一望佢,佢就暈得一陣陣啦」
…翻白眼都可以被曲解成咁,厲害!
姨姨問我:「姑娘,你睇中佢呀?」
我耍手擰頭:「冇呀!」
姨姨:「你唔係拎佢電話咩?」
我:「姨姨,我都有拎你電話㗎~呢度個個排版,我都有拎電話號碼㗎」
叔叔發惡企喺身大嗌:「濫交!係濫交!收聲!濫交嘅人唔俾出聲!」
姨姨向我投以疑惑眼光…
叔叔向我打眼色…並將食指放在咀上,做出『噓』動作。

我啲同事笑到趴咗喺枱…

其實睇醫生又有咩好怕喎~個個入得嚟都係睇醫生,喺出面嘅人又唔會知你嚟睇啲咩…唔駛搞咁多花臣先登記啦~

診所職場事 寶豬趣聞 小妹妹育成

診所職場事 寶豬趣聞 現實與市儈

一位小姐嚟到診所~
佢問我:「你哋有冇做啲咩檢查呀?」
我:「身體檢查?你可以登記完入去見醫生,同醫生講你有咩係需要檢查同想知嘅,等醫生幫你睇吓需要驗啲咩~或者你可以睇吓我哋呢幾個基本身體檢查PLAN。」
佢:「小妹妹檢查有冇呀?」
我:「小朋友檢查?小朋友有冇嚟?」
佢:「我呀」

小姐,你牛高馬大仲自稱自己係小妹妹呀?你指嘅小妹妹係咪你嘅…
我:「哦~婦科檢查呀?我哋都有做呀」

佢:「唔係呀,係啲FOR我呢類小妹妹嘅檢查呀」
人嚟~同我拖個小妹妹出去。十歲以下先係小妹妹呀!你仲小咩妹妹呀?
我:「或者我同你登記咗先,你入到醫生房再向醫生了解吓各項檢查啊?」
佢:「好啦」

我:「麻煩你身分證登記呀~」
佢:「我要叫媽咪拎俾我,你等唔等到呀?」
小妹妹唔帶身分證出街係好合理嘅事。
我:「…冇問題呀~我想請問小姐你幾歲呀?」
佢:「二十一囉」
小你老….
我:「咁你唔好周圍走啦,你而家打電話俾媽咪,嗌媽咪拎身分證過嚟啦~」
佢喺我面前拎起電話:「喂?媽咪呀?我而家喺乜乜診所呀,姑娘話我張身分證今日要用呀」

等咗半個鐘左右,佢媽嚟到~一嚟到並唔係俾身分證我。
而係開口:「你做咩拎個女嘅身分證呀?」
我:「因為要同佢登記啊~佢想做身體檢查…」
媽:「我個女駛咩做咩嘢身體檢查呀?」
唔係我話要做,係你個女想做…

我:「係佢自己話要做…」
媽:「咁細個駛咩做呀?唔做唔做!」
唔做就門口嗰邊,謝謝。
我:「哦?唔做嘅可以走㗎啦」
媽捉住個女隻手,拉佢離開診所:「好學唔學學壞晒!好哋哋做咩檢查呀?你唔知啲醫生全部都係謀人嘢㗎咩?你一驗就上當㗎啦!」

小妹妹原來係咁教育出嚟嘅,我有啲可憐佢…

體驗1分鐘貸款批核 隨時提款話咁易

平遊東京不是夢!最平住宿喺晒呢到

去大阪想搵住宿?識睇一定睇呢到!

去首爾掃貨住邊好?入嚟幫你格價搵至抵住酒店!

短trip遊台北叉叉電,即訂平、靚、正住宿出發!

去旅遊想搵住宿?識睇一定睇呢到!

延伸閱讀:

【診所職場事 寶豬趣聞 懶熟 下回

診所職場事 寶豬趣聞 現實與市儈

診所職場事 寶豬趣聞 懶熟 上回

診所職場事 寶豬趣聞 現實與市儈