28歲初哥揸滙豐煤氣盈富 另持$10,000現金 加注買乜好 | 龔成信箱
撰文：龔成 ｜圖片：新傳媒資料庫
1．碎股
你好，龔sir，我28歲，今年先開始學投資，睇完你本財務自由行。早幾年想收下息，所以買左滙豐(0005)，而家大約有1100股([email protected])，碎股主要係收息要實物。
1. 0005 應唔應該賣一手換其他股？利息我應該要現金定實物？ 我本身打算唔理0005,每次收息要實物等佢滾大。
2. 我3月先開始月供股票 共$4000 ($3000 2800, $1000 0003),過幾個月可以加多$4000 月供，你認為我應該供咩股同埋0003 需唔需要供多啲？
3. 我有現金大約10000,係咪keep住等個市落番再入貨？如果係，有咩股可以留意下？
龔成老師：
1）如果滙豐（0005）佔你的總股票組合太多，咁你就要賣出部分，將資金有效分散。我地買股票，係要建立一個平衡的財富組合，長期有效增值。
滙豐這股都有投資價值，但就唔算最優質，長線持有都可以。
2）月供股票是很好的累積財富方法，只要你長期進行就可以了，盈富（2800）及煤氣（0003）都可以月供，如果你想加強組合的增長力，就加多$1000月供比亞迪（1211）。
3）你現金數目不算多，最好暫時先持有，作備用或等大跌時作投資之用。（對照龔成信箱：Q5054）
2．月供股票
老師你好，本人26歲，有穩定職業。今年1月開始月供股票,每月5千。
0066、823、1038、1211、2388，各供$1000。請問我這樣分配是否適合？
龔成老師：
這5隻股票，都是有質素的股票，絕對可以每月，只要你不斷月供，時間夠長就可以，不要供幾個月就停，要長期。
以你的年紀，這個分配是適合的，穩中求勝。（對照龔成信箱：Q5044）
3．資本策略地產（0497）
其實2017年4月上你堂時1211$4x,想等$40以下分段入，後來不停升。請問下半年有機會嗎？
另外，我想問下隻497，我已有50%獲利，此股本質ok嗎？
我繼續等還是沽少量？
因持有已一段時間，thx
龔成老師：
比亞迪（1211）雖然比之前推介升左唔少，但仍然未算貴，不如你分注入左小小先啦，我地好難用「等跌」的策略入到的，你亦可以用月供股票的模式進行。雖然你心裡覺得買貴左，但係如果長遠的總回報不差，都要理性進行。
資本策略地產（0497）從事物業買賣、策略投資及證券投資業務，其實這股唔易玩的，本質不過不失，這股未必適合長線投資，反映你有獲利賣出，會是較好的方法。（對照龔成信箱：Q5045）
4．長線月供
你好，龔生。之前月供2300同823各供3000, 供左3個月左右, 最近兩個月變成
2800- 2000823-2000
66-2000
3-1000
1928-1000
月入大概二萬, 扣除支出每月儲到10000-11000, 我投資經驗好少, 所以我偏向想投放落收息,平穩股
宜家有17萬可動用資金, 我有意欲分注買入2638/0004/6823, 但係唔知有冇更好選擇, 因為月供幾隻又再買入好似搞到個portfolio 好散太多咁. 現時總資產約25萬左右, 打算3年後有約75萬左右預算結婚用
龔成老師：
你現時月供這5隻股，都是有質素的股票，可以長線月供，不要再變了。
如果你現時股票有$25萬，現金$17萬，你仍可以動用部分現金，但要剩下$10萬現金作備用，同埋等機會之用，因為現時市況始終唔算平，所以點都要有資金，如果大跌市時可把握機會入市。
港燈（2638）、香港電訊（6823）都可投資，九倉（0004）的資產而轉左落九龍倉置業（1997），你投資1997啦。這3隻都可投資，只要你分注，同埋唔好用盡$17萬就得。
就算你投資後，持有的貨都不足10隻，唔會太散，無問題的。
但過多一年半後，你就要開始準備結婚相關支出，到時要開始儲下現金，可能減少買入股票的比例。因為投資股票，要長期才有回報，中短期股價可升可跌，萬一你要用錢的一刻，碰到大市回落，就會對你造成不利，所以一年半後要開始計劃。（對照龔成信箱：Q5046）
5．大生農業金融（1103）
老師，我想問問近期對1103睇法, 因為佢跌到0.21時候買入左
龔成老師：
大生農業金融（1103）主要從事路橋建設、農產品及石化產品供應鏈服務、農業金融服務及農業大數據服務。
從過往的財務數據，可以見到佢的增長力不錯，賺錢能力不差，但股價卻十分波動。
我最擔心的，係佢過往經常送股供股，當中有財技手法，我對這股有保留，如你真的想投資，記得只可小注。（對照龔成信箱：Q5047）
6．銀娛（0027）
老師，我62蚊入左27銀娛，你覺得這價是貴嗎
可否將他永遠長擺？
另外，我會向你學習，練習不看股市的。謝謝你
龔成老師：
銀娛（0027）有質素，買入價是合理區的上部，勉強可以，始終這股有前景，我長遠都幾睇好這股。
佢仍然投資在澳門及橫琴地區，長遠的發展正面，我會建議永遠持有這股，我相信回報不錯的。
短期股市好易影響人的情緒，往往會做錯
決定。如果你明白股票就是企業，你根本就唔需要睇往個市，留意企業的基本面發展就可以了。（對照龔成信箱：Q5048）
7．買入吉隆坡物業
成大哥，早前我買入了吉隆坡雙子塔旁的物業，300萬
2017年年尾，那邊銀行按揭最後的35%100萬,要4.2厘。那邊租金，我最保守計，約4厘，(約3年後要按揭，如未來加息，銀行供款照計也要加)
那?，我是否要努力儲錢。一次過比曬，令自己每月有4%收入較好？
龔成老師：
暫時無必必要一次過比晒，租金回報率與利息成本大約相同，即是還唔還錢都無乜所謂。因為你現時的負債水平在可接受範圍，因此不用急著還錢，只需考慮資金運用問題就可以。
你持有現金，可以等其他的投資機會，但不用急著運用現金投資。始終有資金在手，你的彈性會較高。
這刻暫不用還，到果邊銀行加息，同時你又無其他投資機會，到時先還錢會更好。（對照龔成信箱：Q5049）
8．科技股
龔成老師，我都是80後，剛剛看過80後百萬富翁，獲益良多！
上月開始月供700，1211，2318，我準備入生物
科技股，1548你認為前景如何？
呢隻無得月供，唔敢入住。謝謝！
龔成老師：
你月供的3隻股，都是有質素有增長力，可以長期進行月供，不過，當中的騰訊（0700）、比亞迪（1211）都是潛力股類別，這就會令你的組合，較集中在潛力股，會有少少風險（但不算太多）。
如果你本身都可承受風險，那就無問題。如果你風險度只屬一般，可考慮減少當中比例，然後在月供股票中，加入盈富（2800），令組合更平衡。
至於金斯瑞生物科技（1548），雖然有潛力，但股價十分波動，投資這股要十分小心。最好等佢跌多d先考慮，同時一要小注或分注。（對照龔成信箱：Q5050）
9．短期投資
龔sir:你好！有意買入騰訊，請問咩價位買最好？應如何佈處？想作短期投資的，謝謝
龔成老師：
我不讚同任何短線投資的，這是經驗之談。
騰訊控股（0700）現價不平，如果真係要穩陣去入，相信要有較大的回落才可以，但又未必見得到。所以，你都可以考慮跌10%先小注買入。
現時大市不平，但又未算好貴，最好用一邊入貨，一邊儲現金的方法進行。（對照龔成信箱：Q5051）
10．按事情的重要
老師，其實我好上上你的課堂,但只是中學生，時間十分緊拙。
龔成老師：
無論係學生定係在職人士，只要係香港人，基本上都無乜時間，好多人會將一生中大部分時間放在「緊急但不重要」的事情上，對於「重要但不緊急」的事，則完全唔理。
過左好多年，d人就會發現，自己不斷被一d無意義，但好忙的事困住，而所有重要的事，過往多年一直無處理過，所以個人一直無突破。
其實，只要你有心，按事情的重要情安排先後，以「用盡一切方法」，去得到自己想要的，好多野就會唔同。（對照龔成信箱：Q5052）
