5年前買錯投資產品 供25年每月$2,000 應否斬纜|龔成信箱

5年前買錯投資產品 供25年每月$2,000 應否斬纜|龔成信箱

【投資】今日龔成信箱,不少讀者想為未來作打算,應如何實行投資計劃,亦提及熱門的股票以及投資心態等問題。

撰文:龔成 |圖片:新傳媒資料庫

1.應否斬纜?

龔成你好!很高與認識你的著作!多謝你的書為我帶來希望!我現在也有定期看你的經濟一週信箱!

本人今年已32歲了,但一直沒有理財觀念,還身有欠債,不過現在看完你的著作後充滿正能量,雖然年紀已不算少,但我相信有心唔怕遲,現在努力都總好過40歲才正視財務觀念的問題!

本人有一些問題想請問你:

1) 我現時可以每月儲$6000, 期望整理財務後,今年內可增至每月$10000, 亦打算月供股,但我見現在應該都是牛尾了,我應該現在開始月供還是待熊市才月供?

2) 月供的話,XX證券行好嗎?

3) 我的月供投資比例應是增值股68%, 收息股32%?

4) 最後一個問題,亦困擾了我一段時間

我在13年在朋友游說下購買了XX產品,月供$2000, 供25年。本來我都是不理這些的,但最近認真了解過這計劃後,發現當中極多手續費!

根本就不是合適的儲蓄計劃!我上網亦搜尋了很多資料,發現如果現在退保會有很多賠償,隨時「渣都無得剩」!請問你對這些計劃有認識嗎?是我了解錯誤還是這些計劃真的不好?我應該忍痛退保還是繼續供?

龔成老師:

有心唔怕遲,作為一個作者,最高興就是見到書本能影響讀者,對讀者有正面的影響。只要你保持這股能量,你就能累積到相當的財富,你只有32歲,仍有好大的本錢!

1)現時股市雖然唔平,但亦不算貴,你可以進行月供,但就不是用盡資金,例如你每月可儲$6000,就用其中的$4000月供股票,餘下的儲現金。

2)銀行同證券行都可以的,只要你找不太細的證券行就得,這間可以的。

3)比例可以,你只要長期進行就可以。

4)我沒有仔細認識該產品,但我知道,坊間不少產品的手續費都十分貴,所以點解我成日叫人簡單供盈富(2800),就是佢各方費用都最平。

你最好問下銷售你的朋友,仔細的了解產品的特性,該產品不一定無用,但要清楚。我地進行理財,攻與守都要,該產品相信是防守性,如果能發揮到作用,可繼續,但如果你發現對幫助不大,就要停止了。(對照龔成信箱:Q5128)

2 .60K買股

Hi 龔老師,我老公已報你啲股票班,而家等緊上堂,想問我地之前幫XX買基金,供咗10年,共18萬,查過而家cut 單可能有21萬(要睇真正賣出時價格),我想預備d錢等上完堂後學識分析股票之後用黎買股票,你覺得如何?

現金有60萬,都可用嚟買股,我覺得買咗基金10年,只升16%,實在太少,買晒盈富都好過買基金

龔成老師:

係咪取消果個基金,要睇好多因素,過往回報是其中一個,但不是唯一一個,因為我們要睇佢裡面的投資類別、策略,現時持貨情況等,要知點解出面個投資市場升了不少,但該基金升幅不明顯,要知當中的原因,先知是否繼續持有。

不如咁,你叫你先生股票班時,叫佢帶埋基金的相關資料,我課堂同佢睇一睇,到時再決定仲好。

至於現時持有$60萬,可以小小買住d股票先,優質股小注無問題。而大部分資金留作上完堂後先決定,到上完堂後,你地會有較大的方向知道點運用d錢。(對照龔成信箱:Q5116)

3.瑞聲科技及舜宇光學科技

龔成老師,你好。請教你關於2018 及 2382的看法。買入2千股 [email protected] and3千股 2382 @142 。

請問現時仍應繼續持有嗎?謝了

龔成老師:

記住,持有一隻股票與否的關鍵位,不是買入價、不是賺蝕數(這只是心理因素),最重要是企業質素,以及企業的前景。

瑞聲科技(2018)正面的,佢擁一定的技術,以及規模網絡,加上行業正面,發展正面的,你的買入價有少少貴,但都唔算太誇張,所以不用太擔心,你現時持有得就,佢發展正面的。

舜宇光學科技(2382)都是正面的,這股同樣有質素,但現時的價格比較貴,如果持有數量不多,問題就不大。

不過,你持有的兩隻股票,都是手機相關股,同時都是近期的焦點股,這會令你有較大的集中風險。如果這兩股佔你財富比例不太大,仍可以接受。但如果較多的話,應該將部分轉到其他類別的股票裡,能建立一個更穩健的組合。(對照龔成信箱:Q5120)

4.金斯瑞生物科技(1548)

你好!想請問1548金斯瑞生物科技,此股營業額每年均錄得雙位數字升幅,近年ROE:

2012: 20.25

2013: 11.12

2014: 9.77

2015: 11.58

2016: 14.01

股價之前創新高32後顯著回,現正考慮入手此股,但PE仍高,好像太貴。

請問你認為此股具長遠增長潛力嗎,合理的價位會是多少呢?謝謝!

 

龔成老師:

金斯瑞生物科技(1548)係生命科學研究與應用服務及產品供應商,主要經營以下四個業務分部:(1)生命科學研究服務(2)生命科學研究目錄產品(3)臨床前藥物研發服務(4)工業合成生物產品。

佢係中國南京及美國分別設有生產設施,有條生產線,銷售網絡遍及北美洲、歐洲、中國、亞太區及日本逾100個國家。

這股在潛力,以及行業發展上,都正面的,賺錢能力不差。所以前景正面。

但你講出了這股的重點,過百倍的市盈率,怎樣睇也是好貴,就算近期股價有較大的回落,仍然好貴,買唔落手。如果你真係好睇好這股,勉強都可以小注。(對照龔成信箱:Q5122)

5.六福(0590)

Hi!

睇到你分享六福為潛力股,想問多少少,我想問如果去到$25,算是理想的買入價嗎?謝謝:)

龔成老師:

六福(0590)是香港及中國內地主要珠寶零售商之一,佢主要從事各類黃鉑金首飾、黃金飾品及珠寶首飾之採購、設計、批發、商標授權及零售業務。

中國因素是六福長期的潛力所在,現時中國地區所貢獻的收入及盈利,都只佔六福的4分1左右,由於中國不少地區長遠仍有發展空間,故人民追求貴價產品的潛在市場仍在。加上佢不斷增加自營店的比例,長遠發展正面。

如果去到$25,係理想的買入價,就算現時的價都不算貴,但就最好分注買入,現時股息率都有4%,不過不失的。(對照龔成信箱:Q5123)

投資
中國因素是六福長期的潛力所在,現時中國地區所貢獻的收入及盈利,都只佔六福的4分1左右。

6.月供$4000股票收息

龔老師你好 ~

本人因為工作比較忙唔可以經常留意股價所以考慮月供$4000股票收息

  1. 中電(0002) $2000
  2. 盈富(2800) $1000
  3. 港鐵(0066) $1000

想問下呢個組合會唔會太分散同埋老師有咩建議

另外屋企人建議我唔好月供留住d錢等股市大跌後先一手一手買。想問下老師點睇。Thanks!!

龔成老師:

其實,我地根本就唔洗成日留意股價,d散戶以為成日睇股價可以把握機會,但事實剛好相反,我過往做了十年銀行及證券行,見到了大量散戶,愈緊貼市的一群,就係輸得最多的一群,呢個係業界秘密,無人會講。

你用月供的方法,長線投資股票,做法正確。你上述所選都是優質股,都可長期月供,但如果較好的分配方法,是盈富(2800)$2000,其餘兩隻各$1000,你保持長期月供就可。

你家人是典型的散戶思維,如果大市如預期般的下跌,佢的確會正確,但如果不跌反升,就會損失機會成本。除非你家人在過往10年來,有超過7成的機會,成功預測跌市,否則不用理會。

散戶成日以為自己估到大市升跌,但根本做唔到,所以,最好的方法是運用策略,例如以月供方法,慢慢買入,無論升跌都入,策略上會較好。

當然,我地都會分析平貴,但這不是預期升跌。若大市處較平,月供會較多,若處較貴,月供會較少。(對照龔成信箱:Q5124)

7.CFA

你贊成別人考CFA 嗎?

龔成老師:

要睇對工作是否有用,如果有直接的作用就考,即是好確認考左後,薪金同前景都會有明顯上升,否則,不要讀。

如果打算考CFA去學習投資知識,倒不如花時間去睇多幾本投資書,上投資班,同埋自己睇多幾份年份,會有更實際的作用。(對照龔成信箱:Q5125)

8.CWT INT’L(0521)

龔老師~請教下521你會點睇

現在是否入市時候?

龔成老師:

CWT INT’L(0521)主要從事商品貿易、金融服務及物流服務;休閒及旅遊、物業投資、管理與開發業務,以及工程服務。

過往的生意無增長,同埋生意額好細,企業更經常出現虧損,雖然近半年開始有盈利,但對這類企業的興趣不大,現時市值$30億、$40億,估值上亦唔見得特別吸引。

可能你見到這股的某些因素,但就算這些因素正面,最終令你投資這股,都唔好太注投資。(對照龔成信箱:Q5126)

9.投資價值

老師!我係股票班學生請問對信義光能有咩看法?同行裡比較有效率,但又低於同行市盈率低,是屬於效率型企業嗎?有投資價值?

PS 之前研究福萊特發現 信義968 福萊特6865

龔成老師:

信義光能(0968)由信義玻璃(0868)分拆上市,主要從事生產及銷售太陽能玻璃產品,以及發展及經營太陽能發電場。

雖然我只將信義玻璃放入《50優質潛力股》一書中,定義為潛力股,但信義光能其實都有一定的潛力,只是我認為0868較穩陣及較強。

信義光能的效率都不錯,但一般我地要好有證據,明顯見到佢大幅比同行的效率好,先會認為佢係效率型企業,所以這刻未能完全確認。這股有投資價值的,但不確定性比0868較高,所以我無特別寫在書中,但這股都有投資價值,特別在這刻市盈率唔算好高的情況下,只要不太大注就可以了。

福萊特玻璃(6865)其實都正面,但盈利就比較波動,近期盈利下跌,反映行業的不確定性,但佢股價升左唔少,有危有機。(對照龔成信箱:Q5127)

 

10.新興光學(0125)

老師~請問你覺得新興光學125怎樣?

龔成老師:

新興光學(0125)不過不失。佢主要業務為設計、生產及銷售眼鏡產品,呢類生意比較穩定,但就唔會有大增長。

睇翻佢過往的財務數據,近年生意都唔見有增長,盈利平穩,派息保持在$0.25一年左右。基本上,呢類股可集中在收息,對股價唔會有太大期望。

現時市盈率12倍,股息率7%、8%,估值合理。(對照龔成信箱:Q5129)