診所

診所職場事 寶豬趣聞 小姐對嘢|珍寶豬

職場

廣告

有日有位女士嚟到診所~

佢成個驚恐樣同我講:「姑娘,我有輪狀病毒呀!」
咁大鑊!咁你都仲可以咁好氣好力企喺度嘅?

撰文:珍寶豬

我:「你驗咗?喺邊驗呀?」
佢:「我睇到呀!唔駛驗!」
你望篤屎都知自己中咗咩咁勁?唔通你對眼…
我:「咁呀…一係我同你登記先,你入到醫生房再同醫生講啊」
佢:「你哋醫生男定女呀?」
我:「男醫生啊」
佢:「吓!咁我咪要俾對嘢佢睇囉?」
對~對咩呀?你個屎忽一對㗎?

我:「你指PATPAT?醫生未必需要睇你PATPAT嘅,會了解咗你情況先,有需要先再檢查」
佢:「咩PATPAT呀?我冇話我PATPAT有事喎…」

我:「你頭先唔係講俾對嘢醫生睇咩?」
佢指住自己胸部:「對嘢呀!姑娘!」
你對波瀨屎呀?唔係卦?

我:「頭先你講輪狀病毒呀嘛?我冇聽錯呀可?」
佢:「係呀」
我:「輪狀病毒係嘔屙喎…咁你心口…」
佢:「咩呀!我冇屙冇嘔呀!我係甩皮咋喎!」
…我哋係咪喺唔同嘅時空呀?哎!唔理呀!反正我係登記咋嘛!

我:「哦~咁呀~我同你登記先啦」
佢:「你哋冇女醫生喺度㗎?」
我:「冇呀,我哋得男醫生」
佢:「輪狀病毒佢識唔識睇㗎?女人嘢喎!」
我已經再忍唔到了:「小姐,你介唔介意寫你講嘅輪狀病毒喺紙上呀?」
佢寫完之後…

『鱗狀病毒』…

我:「你唔好介意呀,可能你錯咗少少嘢~如果你係呢個鱗嘅話,係咪講鱗狀細胞癌呀?但係呢個一定要驗㗎喎,你頭先話一睇就知?」
佢嘆一口氣:「我都唔知係咪我自己識太多嘢,所以覺得姑娘你有啲無知,我乳頭甩皮甩到一塊塊,唔係鱗狀咁係咩呀?你哋個醫生識唔識㗎?女人嘢喎」

小姐,乳頭呢…男人都有㗎~人人都有兩粒。

珍寶豬過往精彩文篇:

診所職場事 寶豬趣聞 慶祝清明|珍寶豬

診所職場事 寶豬趣聞 小姐對嘢|珍寶豬

電話響起~
我:「你好,乜乜診所」
佢:「呀!診所呀嘛?」
我:「係呀」
佢:「聽日紅日喎」
多謝你專登打嚟提我,BYE。

撰文:珍寶豬

我:「嗯,係呀」
佢:「紅日唔開呀?」
我:「係呀,紅日唔開呀」
佢:「咁我可唔可以拎嚟聽日後日假紙呀?」
我:「病假紙由醫生決定寫咩日子俾你嘅,你都要親自過嚟睇醫生啊」

佢:「就咁嘅,咁聽日個個都要拜山㗎啦,唔會呢頭拜完山,嗰頭就散水㗎嘛,一家人呀」
你想講你家族有幾溫馨嗎?播緊真情嗎?
我:「哦?咁點呢?」
佢:「所以就咁嘅,我哋BOOK咗場去BBQ慶祝㗎啦」

清明慶祝什麼啊?先人走咗,點解要BBQ慶祝呀?係咪BBQ嗰時順便燒埋衣呀?

我:「所以呢?關我哋診所咩事呢先生?」
佢:「BBQ唔會咁早放人㗎嘛!一玩就玩到好夜啦!第二日都返唔到工㗎啦!」
我:「唔好意思呀,你去玩你去燒嘢食嘅關我哋咩事呀?」
佢:「我要放假呀!聽日後日假紙就係咁簡單!係咪好簡單先?」

我:「哦~請問先生你有冇喺度睇過呀?」
佢:「有呀有呀有呀!我係乜乜乜呀!」
我:「哦,好呀,我已經MARK低先生你個名㗎啦。咁到時你嚟到診所睇醫生嘅話,我都會照返頭先你講嘅傳達返俾醫生知。到時醫生寫唔寫病假俾你,就由醫生決定啦~」

電話另一邊靜咗十幾秒,之後佢講:「八婆,你陰我!」
嘟。
係你自己情不自禁咁講我知咋…

診所職場事 寶豬趣聞 油脂粒|珍寶豬

診所職場事 寶豬趣聞 小姐對嘢|珍寶豬

一位小姐嚟到診所。
佢行埋嚟登記處問我:「係咪可以寫轉介信呀?」

撰文:珍寶豬

我:「見咗醫生先~醫生了解咗你情況之後就會寫去相關專科」
佢指住隻眼:「咁樣睇唔睇呀?」
隻眼睇落好正常啊,外觀色澤都冇問題,係有少少熱氣有啲眼屎,去執劑五花茶得啦~
我:「隻眼?隻眼有事?」
佢:「你望唔望到下面有粒嘢?」
我:「我望唔到呀,我同你登記先啦,你入到醫生房再同醫生講啦~」

佢繼續指住隻眼:「呢粒油脂粒喎」
我:「油脂粒轉介去專科?私家呀?」
佢:「唔係有政府眼科㗎咩?」
我:「油脂粒唔駛去政府㗎喎,而且呢啲唔係去眼科啦」

佢:「生喺隻眼度喎!」
你隻眼跌咗出嚟嗎?跌到去鼻樑附近呀?

我:「你呢個唔算係眼位啦,只係附近啲皮膚啫,就算你要睇,都唔駛去公立醫院嘅,有耐排呀」
佢:「排幾耐呀?」
我:「呢啲CASE分分鐘以年計…因為冇急切性嘅影響嘛,佢肯睇嘅話都已經好好。」
佢:「吓?我過幾個月影婚紗相喎!你可唔可以寫埋落封信度話我好急切呀?」
…你知唔知咩叫急切呀…你淨係諗到好心急咁切咗佢呀嘛?

我:「你自己去私家皮膚科做咗佢會快好多喎」
佢:「我有錢就唔駛嚟叫你寫啦,我係俾到幾十蚊你去寫封信㗎咋,如果你唔收錢我會好多謝你囉」

你個腦都好似好多油脂粒。
我:「我哋醫生診金係二百蚊,唔係幾十蚊啦」
佢:「哇,乜咁㗎?值唔值呀?」
你都覺得你嗰粒油脂粒唔值呢?

佢:「我walk in去政府得唔得㗎?」
我:「佢哋專科冇walk in㗎…」
佢:「急症囉!」
我:「急症都要俾一百八十蚊..」
佢:「咁又唔得咁又唔得,咁點先得呀!」
我:「P圖唔駛錢,自己用電話P咪得囉…何況你嗰粒嘢咁細粒,你影結婚相唔會張張大頭相卦,遠一遠都睇唔到啦」
佢悟出真理離開了,我又成功趕客了。

診所職場事 寶豬趣聞 姑娘姨姨|珍寶豬

診所職場事 寶豬趣聞 小姐對嘢|珍寶豬

有日一位後生仔嚟到診所。
講真呀~又真係幾靚仔嘅…
佢行埋嚟問我:「姑娘姨姨呀?」
其實你可以唔嗌我姨姨嘅,我:「係咪睇醫生?」

撰文:珍寶豬

佢:「應該算係呀」
係就係,唔係就唔係,點樣應該算係呀,你屙尿屙屎又會唔會應該算係咁屙呀?我:「睇醫生嘅就俾身分證我登記先啊」
佢:「我想問…」
哎呀!出事啦!十個有十個用開場白『我想問』嘅都係運桔嘅。

我:「嗯?咩嘢?」
佢:「你可唔可以當我上星期三嚟咗呀?」
如果我可以穿越時空嘅,我一定會將自己變返做一粒純潔嘅卵子,咁我就可以擁有無限個青春十八歲,不過就辛苦豬媽啦!

人哋話十八年後一條好漢,豬媽就每十八年都要生我一鑊。

我:「點解要咁做呢?」
佢:「我上星期三放咗假,但係唔記得拎病假紙,咁公司話要…」
我:「哦?咁咋嘛~簡單啦」
佢BLING BLING眼笑了:「係?」
我:「係呀,去返你上星期三睇醫生嘅診所,態度誠懇咁問佢可唔可以補返張病假就可以~不過都要睇吓佢俾唔俾,因為都隔咗成個星期啦嘛」

佢:「我上星期三冇睇醫生」
啊~咁你等住俾HR打屎忽都得啦!
我:「咁冇㗎啦,你上星期三都冇睇過嘅,邊有人寫得返俾你呀~」
佢:「你囉?唔得咩?」
靚仔唔係大晒嘅。

我:「我寫冇用㗎,你公司都淨係接受由註冊醫生寫嘅病假紙㗎咋」
佢:「唔該你呀姨姨,我真係唔記得咗嚟睇醫生咋,我唔想㗎姨姨」
咁重要嘅嘢你都唔記得,仲要係咁嗌姨姨,靚仔又點呀~送客!

診所職場事 寶豬趣聞 肚痛原因 下回|珍寶豬

診所職場事 寶豬趣聞 小姐對嘢|珍寶豬

上回講到一心想搵出肚痛兇手嘅先生,佢追查兇手嘅精神已經掩蓋咗佢嘅痛楚!仲不惜一切都要飛奔去『交貨』俾我。

望住奔馳已去嘅先生,留喺登記位內戇居居嘅我就不停喺度諗『佢唔係真係去屙屎俾我呀嘛?』。

撰文:珍寶豬

不安情緒維持咗半個鐘左右,終於佢返嚟了。
佢將一個發泡膠飯盒擺上登記枱面…
我爭啲講咗單字粗口,立即退後兩步:「哇,先生,咩嚟㗎?」
佢:「我啲DNA」
D你老…屎就屎啦!我明明聞到成陣味!

我:「先生,麻煩你帶走佢呀,你去洗手間處理咗佢呀,你咁樣好唔衛生㗎,張枱仲再用㗎」
佢:「我都拎咗嚟,你就唔爭在同我驗埋係咩嘢搞到我咁肚痛啦,至少知係咩引起,我咪以後唔去食囉,你有報告俾埋我嘅,我又可以去嗰度告佢。」

你會唔會諗得太理想啊?
我:「我哋唔會驗呢啲㗎,你有唔舒服就睇醫生,醫生就俾藥你食咁㗎咋」
佢:「我要搵真相,暫時HOLD住啲毒都得呀」
….咁你可能要忍屎忍一世。

我:「我哋呢度係診所嚟㗎,係睇醫生嘅地方,有病就食藥…」
佢:「唔係你嘅範疇嘅話,咁係邊個呀?」
我:「呢個我真係唔清楚呀,其實一日入面都可能食咗兩三間餐廳嘅嘢,都係睇吓邊間最大機會㗎咋,例如你可能去咗打邊爐,生同熟嘅嘢食你冇好好注意,又或者你去咗食自助餐,啲生蠔刺身咁…甚至可能係你腸胃比較敏感嘅,其他食嘅人冇事,得你有事都唔出奇㗎」

佢數數手指:「我噚日食咗六間…」
說好的冇咩點食過嘢呢?

佢望望我:「我係咪應該CALL食環呀?」
我:「吓?」
佢:「我真係太聰明啦,應該CALL食環㗎嘛,食環管㗎嘛,我俾佢CHECK咪得囉!」

佢自己好滿意自己咁拎住個飯盒離開了。

 

體驗1分鐘貸款批核 隨時提款話咁易

平遊東京不是夢!最平住宿喺晒呢到

去大阪想搵住宿?識睇一定睇呢到!

去首爾掃貨住邊好?入嚟幫你格價搵至抵住酒店!

短trip遊台北叉叉電,即訂平、靚、正住宿出發!

去旅遊想搵住宿?識睇一定睇呢到!

診所職場事 寶豬趣聞 正氣大叔 下回

診所職場事 寶豬趣聞 小姐對嘢|珍寶豬