佛系零風險投資 乜都唔做輕鬆賺2500蚊?

佛系零風險投資 乜都唔做輕鬆賺2500蚊?

搵錢除左返工、秘撈外,不外乎就係投資,香港人最鐘意嘅投資不外乎炒股、炒樓,甚至炒虛擬貨幣bitcoin等等。不過,話明投資梗係有風險,唔係人人都靠投資賺到錢架。
圖片:新傳媒資料室、網上圖片

其實香港都有啲零風險必賺嘅「投資」,就係港元定期存款喇。唔係亂介紹,美國加息步伐持續,香港雖然未跟加息,但唔少銀行已經靜靜雞加左定存嘅利息。

滙豐銀行早前公布,上調港元定期存款年利率,一年期息率高達2厘。半年期定存年息都升至1.8厘;18個月期息率仲高達2.2厘。而且滙豐唔似其它銀行咁要擺幾十萬先可享有高息率,入場門檻只需存入新資金10,000元。假如打工仔敍造10萬元一年期定存,到期後將可獲得2,000元利息。

恒生喺大行之中算比較進擊,一年期港元定存息率高達2.1厘,高滙豐一個馬鼻。三個月期港元定存都有1.7厘,六個月期定存年息則有1.85厘。假如同樣以10萬元存款嚟計,喺恒生敍造一年期港元定存較喺滙豐敍造一年期定存可多收100元。


中銀定存係大行喺最進擊,可謂睇住恒生嚟打,三個月期定存1.8厘;半年期定存年息1.85厘;一年期息率同樣高達2.1厘。不過,入埸費就高過滙豐同恒生,需要5萬元起。

除左三大行外,其它細行為左搶錢定存息率仲進取。

南商一年期定存息率2.18厘;兩年期定存息率做到2.28厘;入場費就由5萬元起,同樣以10萬元計,擺一年就有得收2,180元利息,較匯豐多180元,較恒生及中銀多80元。

最進取嘅細行非信銀國際莫屬,最近推出3個月期定存,年利率達3.8厘。由於年利率比較高,所以信銀國際設咗存款上限10萬元。假如有10萬蚊閒錢,擺喺信銀國際三個月,咩都唔使做就可以賺936元。同中銀嘅三個月期定存相比,同樣金額10萬元,可以賺多492元。而信銀國際新資金一年期定存最高息率達2.55厘,即10萬元本唔使任何操作,擺一年後可賺2,550元。

資料只作參考