診所職場事

診所職場事 寶豬趣聞 姨姨要身體檢查 下回

職場

廣告

【診所職場事 寶豬趣聞 姨姨要身體檢查 下回】上回講到姨姨尿道口大過小便樽口,所以好難留到小便。

撰文:珍寶豬

我:「都唔駛打去問㗎啦,個小便咁嘅佢哋都唔會收㗎,你再留過啦,我俾多個樽你啦」
佢:「少少廁紙咋喎」
我望住塞滿廁紙嘅樽:「都唔少㗎啦,都塞爆晒啦,而且我哋係要液體,明唔明?」
佢:「哦哦哦」
我:「呢度俾多個樽你,你下次連埋大便嗰個一齊拎去化驗所啦知道未?」
佢:「哦哦哦」
我:「小便要液體嘅,大便你就拎個樽蓋嗰枝捧刮少少,再扭返埋個蓋就得㗎啦」
佢:「知啦知啦」
我:「咁你記得拎去化驗所啦喎」

當日晚上,姨姨又嚟到。
佢:「我屙咗屎啦!」
姨姨有便便,恭喜夫人呀!
我望望鐘:「化驗所收咗工啦喎,今日嘅冇人嚟收㗎啦」

佢:「吓?我拎咗過嚟啦喎」
我:「聽日啦」
佢:「唔係嘛?咁好嘥嘢喎?」
想唔嘥呀?即場啪咗佢呀!

我:「你可以留返聽朝再拎過去嘅~化驗紙上面咪有化驗所開工收工嘅時間囉~你冇睇到咩?」
佢:「隔咗夜仲得唔得㗎?」
我:「大便就冇咩問題嘅,你聽朝再拎過去啦」
佢:「間化驗所咁垃圾嘅,寫幾點收工就真係幾點收工㗎?」
原來咁就會令人覺得係垃圾,我真係見識少啦…
佢:「你可唔可以幫我KEEP住呀?」
我:「唔好意思呀阿姨,你聽日自己拎過去啦,我唔會同你KEEP㗎」
佢邊講邊離開:「哎!而家啲人都唔知做咩㗎!我咁辛苦屙啲屎出嚟個個都唔要嘅!咁冷漠嘅!」

有人熱情地主動要你啲屎嘅話,你應該要驚先啱喎?

珍寶豬過往精彩文篇:

診所職場事 寶豬趣聞 姨姨要身體檢查 上回

診所職場事 寶豬趣聞 珍寶豬