凶宅

香港四大最靈異屋苑 網民:凶宅平$200萬我即買!

社會熱話

廣告

香港土地問題嚴重,樓價貴到一個點,長期徘徊高位,就算想排公屋最少都要等5年以上先上到樓,所以好多人都唔驚住凶宅,寧願入住靈異公屋。不過咁又真啊,真係要驚都係驚要瞓街多啲啦。

圖片來源:維基百科、巴打絲打「11靈異怪談」Facebook Club

講起凶宅就一定會諗起鬼故,以前夜晚聽電台講鬼故好過癮架,不過依家好少人聽電台架喇。不過靈異故仔真係長青題材,講極都講唔完。最近有人係facebook group講起「香港邊個屋苑最邪」,引起一班靈異迷講出自己個屋苑嘅故仔。

柴灣 – 漁灣邨

 

試過家姐出咗去無返屋企一段時間,有晚我聽到家姐把聲喺門口嗌我個名,叫我開門,我同老豆講,老豆話無,點都唔肯開門。但我一直聽到家姐叫我開門,最後老豆開門畀我睇,乜人都無,嗰陣我突然好驚,驚到衝上床係咁喊,老豆話唔係家姐,仲話過咗5點(凌晨)就無事㗎啦!

 

有次我返屋企,點知行出升降機開始就覺得有人跟住我,但成條走廊得我一個行,行到一半覺得後面跟得我好近。我擰轉頭望,都未擰哂就望到牆上好似有個黑影攬埋嚟,當時我個人震晒,開始腳軟。但事實係無人,之後我就極速返屋企。

屯門-友愛邨

我住喺最盡頭嗰間屋,打橫一排其他單位,好記得有晚係農曆七月十四,當晚6點幾媽咪煮緊飯,屋企打開木門,當年屋邨個個都係開住木門的。我坐係門口隔離梳化睇電視,突然好大聲「嘭」一聲撞向我鐵閘,就好似有個足球踢過來,我即起身望,無人!鐵閘仲郁緊….. 就算有人由門口跑去樓梯走都有3個單位距離,無可能我一望係咩人都無….

 

有一晚,呢個超驚,我瞓瞓下好似醒左,感覺自己好似成個人慢慢升起左,我好大力想瞓返落床但唔得,之後個人瞓住咁轉圈,轉咗一個圈,又慢慢落返去,仲有把男人聲講好唔好玩,之後感覺到自己瞓返落床,就即郁得返,即刻轉身打側唔敢郁,嚇到天光…

觀塘 – 秀茂坪

我聽我媽講過一件很邪的事件,我父母以前經常去某一座飲茶,識到另外兩公婆,每早必定一起飲茶暢談,但有成個月沒有見到他們,心中覺得奇怪,終於有一朝早只見到老婆沒見到老公,我媽就問她的老公如何,為何他不來飲茶,她很傷心的說她老公死了,他們家住38座16樓,她說有一朝早起床看到有一條好大的蛇在廚房裡打蛇餅,他們很驚,於是煲了一煲滾水倒在蛇上想淥死它,蛇是死了,但到晚上她的老公也死了,我媽說那條蛇是找替身,來索命的,有靈邪附在蛇上,聽完當堂毛管凍。

荃灣 – 綠楊新邨

嗰時我讀緊小學,我係住16樓,但我放學撘返屋企係一個人,我㩒咗16樓返屋企時候,升降機居然停咗喺9樓。開咗門但無人嘅,我以為關咗門會上返16樓,點知落返地下。我再㩒返16樓返屋企,又係喺9樓開門,又係無人嘅,又自動落返地下。嗰陣仲未知咩事嘅,個看更叫我撘第二部,終於返到屋企。返到去同屋企人講我撞鬼,升降機停咗喺9樓上唔到嚟,屋企人唔信我,之後聽返原來9樓有個婆婆過咗身,之後屋企人先信我撞鬼!

上面的屋苑邊個最邪就真係唔知啦,亦都唔想知。不過最尾有巴打突破盲腸話:我怕無樓多過怕住凶宅囉!亦有網民表示:凶宅平$200萬我即買!

亦有人重貼多年前長洲東堤小築94萬的宣傳單張,諷刺香港樓市之荒謬!

你話香港人幾咁可悲?