診所職場事 寶豬趣聞 Mandy|珍寶豬

診所職場事 寶豬趣聞 Mandy|珍寶豬

【診所職場事】電話響起~
我:「你好,乜乜診所」

佢一聲喝令:「配藥!轉頭拎!」

嘟。我已被CUT線…
你是阿誰啊?

撰文:珍寶豬

隔咗半個鐘左右,有位女士入到嚟診所淨係企喺度,完全冇意欲行埋嚟登記…
於是我問佢:「小姐?係咪睇醫生呀?係嘅我同你登記先呀?」
佢:「我等人呀!」
哦?你等邊個呀?房入面得醫生咋喎,你等佢收工仲有耐喎?企返幾個鐘先啦下~
我:「醫生房入面冇人睇緊醫生喎?」
佢好唔耐煩:「我都話我等人囉!你咪理我得唔得呀?」
好啦,唔理你啦。

佢企呀企等呀等,等咗成五分鐘,佢仰天大嗌:「Mandy~~~」
我望住佢大嗌,之後諗起佢叫我唔好理佢,我就由得佢繼續自已嗌。

『Mandy~Mandy~我嚟咗啦』
…日光日白有啲心寒喎我,我想化寒:「小姐呀?呢度冇人叫Mandy喎…」
佢目露兇光:「點解你咁鍾意理我嘅啫?」
一定係暗戀你啦我:「我見你搵人咁呀嘛,我哋呢度冇Mandy呀」
佢:「我頭先同咗佢講要配藥㗎」
我恍然大悟:「啊!原來頭先係你!你一講完配藥就收線嘛?」

佢:「係呀!Mandy知㗎!我配開㗎!」
好遺憾,你口中嘅Mandy已經離開咗你,佢居然連GOODBYE都唔同你講句就捨你而去。我:「哦~你講嘅應該係以前喺度做嘅姑娘?已經冇做啦,你想配咩藥呀?登記電話幾多號呀?我CHECK返你紀錄先呀~」

佢好堅持:「Mandy知㗎喎」
我:「我哋而家呢度已經冇Mandy啦~你想配藥嘅不如就等我幫你啦好冇?」
佢:「你問佢啦,得佢先知我食開咩㗎,我都唔知自己食開啲咩」
我:「你講個電話號碼我知就得㗎啦~我哋排版有紀錄㗎嘛」
佢:「你問佢啦」
Mandy,你返嚟做罷啦。

珍寶豬過往精彩文篇:

診所職場事 寶豬趣聞 忍尿|珍寶豬

診所職場事 寶豬趣聞 珍寶豬

診所職場事 寶豬趣聞 姨姨要身體檢查 下回

診所職場事 寶豬趣聞 珍寶豬

關鍵詞
經一專欄