診所職場事 寶豬趣聞 有效日期|珍寶豬

診所職場事 寶豬趣聞 有效日期|珍寶豬

【診所職場事】電話響起~
我:「你好,乜乜診所」

對方係一位女士:「你之前係咪開過啲藥俾我嘅?」
我:「唔好意思呀小姐,麻煩你俾你嘅覆診卡號碼我呀,我拎你排版睇睇先」
佢:「吓?好耐冇嚟過啦我,仲邊記得個NUMBER呀?」
你係打嚟問好耐之前嘅藥呀?

撰文:珍寶豬

我:「你問我藥方面嘅嘢,我都要拎你排版睇咗先嘅,主要我要睇你食緊啲咩藥嘛」
佢:「我冇食㗎,擺咗喺度好耐㗎啦」
我:「…咁你想問啲咩呀?」
佢:「我今日有少少唔舒服,喺雪櫃搵到你哋啲藥,可唔可以食呀?食唔食得㗎?」
我:「唔好啦,啲藥你都識話好耐之前,唔好自己亂咁食啦,嚟睇醫生啦」

佢:「但係你上面冇寫expiry date㗎喎」

我:「有效日期喺藥樽上嘅,醫生處方俾你嘅時候都係預你一星期內服用,唔會預你擺好耐㗎~」
佢:「吓?嗰時你又唔講?一係你唔好開咁多俾我呀嘛!」
我:「我哋一般都係開兩三日藥啫,一個傷風感冒差唔多㗎啦」
佢:「咁我而家嗰啲幾時到期呀?」
我:「我連你手上拎住嘅係咩藥都唔知啊~一係你俾覆診卡號碼或者身分證號碼,我同你睇睇啦」
佢:「我淨係想知幾時過期咋喎?」
深呼吸,深呼吸~

我:「我知呀,我哋啲藥樽樽都唔同日子嘅,真係要CHECK返先知㗎」
佢:「我問一句食唔食得啫,都要搞咁多嘢」

嚟睇醫生咪唔駛煩~
我:「藥嘅嘢都係清楚啲好~」
佢:「係你唔清楚咋嘛,仲好講?」

嘟。
我想搞清楚都要發我爛渣~呢個世界空氣真係清新…

珍寶豬過往精彩文篇:

診所職場事 寶豬趣聞 魚 Mandy|珍寶豬

診所職場事 寶豬趣聞 珍寶豬

診所職場事 寶豬趣聞 忍尿|珍寶豬

診所職場事 寶豬趣聞 珍寶豬

關鍵詞
經一專欄