電腦技術員月薪僅得$7,600　網民：做IT慘過做乞衣

撰文：Purple弟弟 | 圖片來源：勞工署、香港討論區

電腦技術員人工一向都唔低，薪酬市價大約會出到$11,000-$18,000。最近有求職者透過勞工處互動就業服務搵工，搵到一份月薪只有$7,600的電腦技術員空缺，連五位數字都無，求職者於是在香港討論區出帖，表示：「咁既（嘅）人工，我不如去羅（攞）綜援好過啦」。

從刊登於勞工處的職位空缺可見，數碼科技系統有限公司正招聘一名臨時電腦技術員，工作地點位於葵涌。主要負責電腦維修和客戶服務，另需外勤和軟件、硬件安裝。只需要中五學歷，有基本電腦操作知識，懂得讀寫中、英語，即可應徵這份工作。資歷看似要求不多，但待遇就相對低，月薪只有$7,600，每週需工作六天，還要一個月的試工期。

求職者在香港討論區開帖留言：「香港到底搞緊咩？ HK7,600一個月，請問可以羅（攞）黎（嚟）做乜? 咁既（嘅）人工都可以開得出？7,600仲要一個星期返6天, 我真系（係）唔粗口呢間野（嘢）, 都對自己唔住」。

每個月只有$7,600的人工，除非個人本身好節儉，否則都幾難在香港生活。唔少網民身同感受，覺得這份工作有「搵笨」之嫌，亦紛紛留言：「呢啲係唔知乜乜計劃，揾o靚（𡃁）仔笨X嘅。」、「咁都要俾人過到日子架（㗎），10年前IT, 最衰都有8,000, 而家仲衰過之前。」。

有眼利網民仲留意到待遇人工一欄，寫住試工津貼，「仲叫津貼，不是人工」、「低過最低工資，扮津貼請人」，難怪樓主都話「不如攞綜援好過」。

有網民爆seed：「臨時工仲要試有無病呀」、「衰過深圳D（啲）人工」、「痴能線，衰過做乞兒(衣）！」。

有網民食花生，叫樓主不如將錢用來賭波，隨時搵到多過這份人工的價錢：「樓主賭一場波都吾（唔）止呢個數啦」、「打呢份工倒不如賭入球大細好過啦」。

有網民更提議，樓主不如另覓其他工作，工資隨時多過這份工：「仲耍（要）中英都要識，仲衰過洗碗亞（阿）姐」、「去做待應好過」。

樓主會否選擇這份工就不得而知，不過人工太低，「好易做爛個試」，有得揀都係選擇一份人工高的工作！