HR面試過程犯低級錯誤    網民:「叫你上司嚟解釋」

HR面試過程犯低級錯誤 網民:「叫你上司嚟解釋」

每年6,7月都係香港搵工旺季,但近日就有巴打係連登大吐苦水,話自己從未遇過一個HR令佢咁激氣。

撰文:Purple弟弟    圖片來源:tvb劇集《愛回家之開心速遞》、visualhunt        資料來源:連登討論區

話說該名巴打最近遭舊公司炒魷,去見新工時,竟然遇到個低能HR,係巴打每份正本工作證明上用筆tick一tick,令到巴打當場大爆發,甚至要求hr上司一齊解釋。

由於巴打最近諸事不順,剛剛俾人炒完,又係見工時遇到個令人無言嘅hr,巴打好想為自己爭取一個公道。可能因為太過嬲的關係,巴打差啲搞到對方要報警來趕走佢。其實,巴打咁嬲都係人之常情,係正本度留remark根本係唔應該犯嘅錯誤。

巴打於連登出post後,迅速有眾巴打力撐,紛紛支持巴打斥責hr的行為。甚至有正氣嘅網友post出相關法例,證明巴打反而可以利用刑事條例,去告該公司毀壞個人財物。

雖然巴打有眾多網民力撐,但巴打最後亦慶幸自己無搞大件事,事關巴打身處嘅行頭十分窄,好容易就會傳開去,影響日後搵工。

見到巴打呢件事,亦都令筆者諗起以前見工嘅一個經歷。當時剛剛大學畢業,見第一份工第一句就問點解某啲科成績咁差,但係重點係份工同筆者讀嘅科目毫無關係。整個見工過程都係咁重覆相似嘅問題,都唔知佢係想請人定係玩人。

塵世間最令人痛苦嘅事莫過於明知對方hr會用盡方法留難你,但最終都要硬著頭皮頂硬上,又要扮自己如何欣嘗該公司嘅文化,又要講到自己乜都識,做咁多辛苦嘢都只係為咗份工。而要搵工嘅原因亦十分簡單,年青人,係窮呀!!

 

 

關鍵詞
網民熱話