診所職場事

診所職場事 寶豬趣聞 藥丸唔夠硬|珍寶豬

職場

廣告

【診所職場事】電話響起~

對方都未等我講開場白就已經咆哮:「喂???????聽唔聽到呀?」
我拉遠少少部電話:「聽到…」
佢:「頭先我嚟過㗎,拎咗藥㗎!」
佢把聲實在太易認,我:「係~我知呀,頭先同小朋友嚟㗎嘛?」

撰文:珍寶豬

佢:「係呀係呀,頭先你咪話啲藥要剪半嘅?」
我:「係呀,你話你唔想我哋掂啲藥,自己剪呀嘛,我記得呀」
佢:「係呀,我返到去咪剪囉,粒藥碎晒喎,咁點食呀?啲藥咁易碎㗎咩?」
我:「你用咩剪呀?其實佢中間有條線嘅,你對手用食指同手指公各拎住一邊咁向下壓一壓就分到一半㗎啦,俾少少力得㗎啦喎?」
佢:「我用刀囉」

我:「你對住中間條線切呀?」
佢:「冇喎,我都見唔到有線嘅?條線喺邊呀?我當佢薑咁拍囉」
拍薑即係成把刀壓晒喺藥丸上,運用丹田之力,一『唏』手起!成粒丸碎到粉咁啦…

我:「咁唔得㗎,咁咪碎晒囉~你搵把較剪仔又得,自己手搣都得,真係唔得嘅你就拎返嚟啦,我幫你分啦」
佢:「點解你啲藥咁易碎㗎,散晒喎,係咪有事㗎?」
嚟,你試吓俾我當你薑咁拍,睇吓你頂到幾耐?
我:「你拎落嚟俾我分啦,我幫你啦」
佢:「咁而家嗰粒碎晒嘅點算呀?食一半呀?我冇郁過佢㗎,係咪叫阿仔過嚟奶咗佢呀?」
你唔好咁玩個仔啦。
我:「嗰粒你掉咗佢啦,你過嚟我俾返你啦」

佢:「你真係俾返我㗎嘛?唔會再收錢㗎嘛?係你啲藥有問題呀,咁易碎,唔關我事㗎,咁我轉頭過嚟㗎啦」

係啦係啦,千錯萬錯都係人哋錯啦~

珍寶豬過往精彩文篇:

診所職場事 寶豬趣聞 賺到盡|珍寶豬

診所職場事 寶豬趣聞 珍寶豬