30歲月入37K 儲錢還60萬債 月供股票好過儲現金嗎｜龔成信箱
撰文：龔成 ｜圖片：新傳媒資料庫、visualhunt
1.月供股票
老師你好，我係上完你股票班既學生，最後發覺月供最岩自己性格。想請教我未來要面對既財務問題，感謝你既回覆。
今年我30 歲， 月入37000， 預計一年加人工大約3%，最近買左樓， 月供13000， 不用比家用， 但因向親人借了600000， 要限2020 年全部還清。
想問我應唔應該一個月月供6000 蚊潛力股， 我供2000 蚊銀娛， 2000蚊比亞迪， 2000 蚊hsbc 。 搏佢未來兩年有些增長好過我淨草現金還款？ 雖然都應該未必足夠，感謝回覆
龔成老師：
潛力股要較長時間才可發揮到效果，我擔心2年時間未必夠，因為中短期總會有市場上的波動。
另外，匯豐（0005）的增長力已不及從前，你只能當佢係一隻收息股，有少少增長的能力。因此，較平衡的做法，你可以將$3000月供盈富（2800），餘下就$1500供比亞迪（1211）$1500供銀娛（0027），相信效果更好。
但2年時間，真的唔知到時的情況，但我相信這計劃都可以進行。（對照龔成信箱：Q5811）
2.彩星玩具（0869）
老師我有睇你fb同埋50穩健收息管本書,投資觀念改變左,現持有中電,電能,香港電訊SS等收息股,盈富。以上都係睇左你本書後入的。
以前聽人炒作買左隻彩星玩具係13年 3.75買入一直持貨到而家都唔捨得放 今年三月 業績公佈 後,股價跌到得返一蚊
我想請教我可唔可以繼續持有等佢升番啲先放,咁可以蝕少啲？
龔成老師：
我地持有一隻股票與否，重點是企業質素，以及前景，買入價只是一個心理因素。
彩星玩具（0869）本質不太好，你睇翻佢的財務數據，生意每年下跌，不斷減少，盈利由幾億，變到而家得翻一億。整個市場環境的確有好大改變，相信長遠的發展都不大。
要上翻你的買入價，就要佢盈利翻到過去的水平，但以現時環壞，的確不易。理性點說，要上翻去好難，你最好見到有明顯反彈時，先減持一部分。
然後將資金投資其他項目，你的財富會有更大的增值效果。（對照龔成信箱：Q5583）
3.易鑫集團（2858）
老師您好！我係抽新股時抽到一手易鑫，股價不斷向下滑，當時亦沒有諗過止蝕，未知能否回本，但是否應該到某個價位放？請賜教，謝謝！
龔成老師：
易鑫集團（2858）比上市價跌了不少，現時的情況比較麻煩，好彩你持貨不多。
如果你有留意我的分析，都知我不建議買入上市不夠2年的股票，原因是估值好難，股價一定會好波動，加上新股上市，一定造靚盤數，以較高價上市，所以，小股車好難買到平貨。
易鑫過往處於虧損狀態，但現時市值有幾百億，企業沒有實質價值，只有市場預佢將來的價值，而這個價值多少，無人知，根本是大家估估下，所以，佢股價會好大的波動。
不過，這股不是完全無潛力，但真的無人知點估值，無人知佢之後的升跌，只有等佢的業務發展。如果一手對你來說，不是大數目的話，那就持有，不要再理佢，然後等佢業務由虧轉盈，先開始有機會令股價上升。（對照龔成信箱：Q5584）
4.越秀房託
見你之前分析越秀房託嘅，但現時處史高位，請問到什麼價位可以買入呢？
龔成老師：
高與貴是兩個不同的概念，過往的$4可以貴過今天的$5，好多人都唔明，但要解釋相信要較長時間，股票班會講的。
這股處於現水平，不算貴，佢股息有成6%，以佢持有的資產質素，以及風險來計算，現時處於合理價，當然，以分注買入會有更好的平均較果。
如果你想回少少先買，無可以，大約跌5%，已經可以考慮。（對照龔成信箱：Q5585）
5.綠色動力環保 (1330)
龔Sir你好！有睇過你的大作，其中有推介北控水務 (371)，近幾個月跌了不少 … 什麼原因呢？
是否基本因素有改變？本人都看好 371 前景，計劃長期持有，現 $4.85 有3手，繼續低位吸納你認為如何？
另外，我同時持有綠色動力環保 (1330)，$4 左右持有三手，你覺得 1330 潛力如何？
是否值得繼續吸納長期持有呢？還有其他環保 / 再生能源股你認為都值得長期持有呢？謝謝。
龔成老師：
北控水務集團（0371）本質不算差的，但增長的確有所減慢，同市場之前預期較高速增長有變。
業績其實太差，但說到尾，無市場預期咁好，所以股價受壓，這股仍有一定的質素，但增長力就比以前略有減弱，但現時估值合理，長線仍有投資價值。
但你唔可以當佢好有潛力咁，佢只會平穩發展，起碼這刻見到的情況就是。你增持可以，但不要太大注。
綠色動力環保（1330）不過不失，處於行業有前景，但就比較波動，業務略有不穩情況。這企業可以期待，但佢的波動，的確會為佢帶來風險。
如果你用長線眼光投資這股，是可以的，不過不要太大注，因為這公司的規模不算好大。（對照龔成信箱：Q5586）
6.長線投資
龔Sir你好! LIKE 左你個page 幾個月, 初入股市幾個月。
我早排係大約$16買左耐世特1316 做長線投資, 但一出業績同貿易戰令佢股價就大跌。我睇佢年報覺得不算太差, 但銷售增長大跌同佢既大客戶因銷量不好而cut 單。另外佢全球都設有廠房, 貿易戰對佢影響大不大。
想問下佢基本面有無變差同現價是否吸引, 應否加注或減持。還是等中期業績有否改善再作部署。
我現時的平均買入價為$14.68。佔我的股票基金約15%。謝謝
龔成老師：耐世特（1316）雖然本質唔算差，但市場之前對佢有較高的期望，諗住佢有不錯的增長，但最後在業績中，見到佢的生意並無增長，因此市場有反應。
加上貿易戰等因素，雖然部分只是心理上，但都佢做成股價上的影響。
這股長期仍然正面，但相信中短期股價仍然波動，如果你已持有15%，暫時不要加注，除非跌得好勁先再考慮。（對照龔成信箱：
Q5587）
7.收息股
你好，我係股票新手黎
手上暫時持有（因為當時唔識聽朋友講所以買入的）
8448。2手。0.3入
8083。3手。4.9入
0884。2手。6.7入
3319。1手。抽新股時入的
1。我想請問我係米應該全部放哂佢先？定係長放放到回本先？
2。我睇過你的post. 如果我聽日入2800盈富基金？定係應該等佢跌返先入手會比較好？
3。285比亞迪電子同1211比亞迪 邊個會穩定d？可以入
4。我另外想買隻股票收息的。我見你係提過2318中國平安，2638港燈，6823香港電訊，1398工行，0939建行，0778置富，0435陽光，0737合和
但而家嘅價都比較高，會唔會話邊一隻而家入會係比較好？希望你可以幫忙解答
龔成老師：
1）環球印館（8448）、中國創新支付（8083）都是質素較一般的股票，賣出較好。至於其餘兩隻，則不過不失，但未必適合新手，如注碼不多，勉強可以持有。
2）如你資金許可，分注買入較好，即是每隔一段時間買一次。如不可，就直接入，不同等跌，因為你的組合中，沒有優質股。
3）兩隻都是潛力股，都唔會穩定的。比亞迪（1211）的潛力較強。
4）如果想收息，你所講的股票，除了平安（2318）之外，都可以，你選你喜歡的就得。平安有一定的質素，但就不是收息股。香港電訊（6823）、置富（0778）算是當中的，不太貴。（對照龔成信箱：Q5588）
8.平安（2318）
成哥，點睇中國平保？
龔成老師：
平安（2318）正面，這股優質，有長線投資的價值，只是保險企業會利用本身的浮存金作投資，令佢的盈利受投資市場影響，比較波動。
所以，在估值時要較小心，唔好太著重一年的債數據。這股現時在合理區的頂部，如投資，都可分注。（對照龔成信箱：Q5589）
9.升值潛力股
你好老師。關於6823 我於$9.96價位買入
但價位現時長期徘徊於9.6-9.8之間
請問你覺得依隻股票會否有機會重返11-12元高位？
依隻股票應否繼續持有？
最後 想問下有沒有升值潛力股票介紹作短線投資？謝謝老師
龔成老師：
香港電訊（6823）是收息股，本身有質素，但不會預期佢的業務會大增。基本上，收息股的股價，都是平穩的，不會有太大驚喜，投資這股應集中在股息之上，所以，是否持有要睇你的投資目標。
這股基本上「穩定」，因主要業務是收月費，但都有少少增長力，因為佢有部分業務是賣手機，當市場出現一些好勁的手機，好多人買，佢就會得益。
抱歉，不作短線投資，沒有推介。亦建議你不要短線投資。（對照龔成信箱：Q5590）
10.每月供款額
你好,小弟係股壇初哥,想月供中華媒氣及盈富 ,現時有5萬流動資金，可以用來投資股票。如果一手手買入又似乎成本較高，故始以月供方式平分成本。
但是，我的每月供款額應該怎樣設定才合理？每月各供3000？
龔成老師：
要睇你每月可以儲到多少錢，如果你每月能儲到$5000現金，將其中的$3000作月供股票，餘下儲現金，這就是適合的做法。月供是長期進行，不要心急。
你選煤氣（0003）及盈富（2800），兩隻一同月供都可以，這兩隻都是優質股，合初階投資者，適合你的。月供股票都有一定的成本，每間銀行不同，你開始前一定要比較下。
