診所職場事 寶豬趣聞 舊事已變|珍寶豬

診所職場事 寶豬趣聞 舊事已變|珍寶豬

診所職場事】電話響起~
我:「你好,乜乜診所~」

佢:「今日收幾點呀?」
我:「七點~」
佢:「聽日呢?」
我:「聽日都係收七點,星期一至五都係收七點嘅,星期六日就收早~」

撰文:珍寶豬

佢:「吓?收早?」
我:「係呀,星期六日都會收四點」
佢:「你哋以前唔係咁㗎」
你以前夠十八廿二肌膚緊緻。
我:「你睇醫生嘅留意返時間啊,仲有冇其他嘢幫到你?」
佢:「星期六我嚟嘅話,一定要四點前嚟到呀?」
梗係唔係啦,你可以三點前嚟,兩點前嚟,或者三點五十九分前嚟到~淨係你先可以㗎咋。

我:「四點前嚟到就有得睇,四點後冇醫生喺度㗎啦」
佢:「係㗎咩?以前你哋都唔係咁㗎喎,我記得以前收晏啲㗎,好似全日都開㗎喎」

係得你一百年不變嘅啫~智商上。
我:「可能以前係啦,可能時間上有改動過嘅,我唔係咁清楚以前時間係點啊,因為我都係返咗呢度幾個月」
佢:「係啦,我記得以前一定唔係咁嘅時間收工㗎!點解而家收早咗咁多㗎?唔可以收晏啲咩?」
我點知啫,你不如自己嚟問醫生啦,我唔知醫生會唔會笑住答你『關你蛋事』。

我:「我哋星期六日係收四點㗎啦,冇得晏㗎啦」
佢:「唉~以前好,以前好,以前啲時間好好多,以前都唔係咁早收」
你講完未啫?你自轉完未呀?轉木取火呀你?
我:「咁…冇其他問題啦嘛?我收線㗎啦~你要嚟睇醫生嘅就留意返時間啦吓~」

佢:「收四點呀?」
我:「係~呀~」

佢:「晏啲唔得呀?」
我:「唔得呀~」
佢:「哦,唉,好啦好啦,以前咁嘅時間咪好囉,我都唔知嚟唔嚟到啦,嚟到就嚟啦」
我:「好呀,byebye」
嘟。
今次係我收線。

延伸閱讀:

診所職場事 寶豬趣聞 冚家太太|珍寶豬

診所職場事 寶豬趣聞 珍寶豬

診所職場事 寶豬趣聞 旅遊保險|珍寶豬

診所職場事 寶豬趣聞 珍寶豬

相關文章