龔成問答信箱12

投資

廣告

問:成哥你好,想問,當你買入一隻股票,你會點計算目標價呢?你不會永永遠遠去持有一隻股票,總有需要賣出的時候,您會用乜計算方法?或如何洞悉正確的時間賣出呢?

龔成:我不會有明確的目標價。我沽出基於幾個原因:

由於我買入的是優質股,若買入後發現自己犯錯,這股不是優質股,又或這股核心的質素轉差,變成非優質股,這時無論賺蝕都要走。

又或是市況過熱,市場處「牛三」的狂熱狀態,例如去年復活節後的狂熱時,我便用沽多於入的策略,但當時的市況不是極度狂熱,所以我亦只是沽了一部分的貨,不太多。

股價處over value,例如狂熱市,或自身的原因令股價爆上,都有可能放。

其實,如果你無法掌握到上述的,可用升一倍放一半的原則,等同收回成本,餘下的貨就不用再理會,長期或永遠持有。

——————————————

問:多謝成哥協助,我現在是一名咖啡師,今年17歲,現有120,000元資金在手,因為我打算用長線價值投資法置富,所以打算邊做嘢邊儲蓄,慢慢學習尋找優質股再買入,不心急,而我的目標是26歲賺100萬元。多謝你本書!

龔成:加油!意念成就事實,只要你訂出26歲有100萬元,而你真心向這目標進發,你就一定能做到。

我23歲定28歲有100萬元,因為我肯定目標,同埋我真係去做,所以做到。我個朋友在19歲定25歲有100萬元,因為佢肯定目標,同埋佢真係去做,所以做到。

100萬元真係唔多,所以只要你肯定目標,就無理由做唔到。到你有100萬元流動資金在手時,你到時運用資金就方便好多,條路會好順,加油!

——————————————-

問:成哥,細佬係80後讀者,明白投資的重點,但我之前未接觸過股票,睇到你的股票分析文章,同埋公司年報,細佬完全睇唔明,更加唔好講去做獨立分析,因此已無哂置富的信心。因為個人睇完《80後》,認為最重要同最困難的是尋找同分析優質股。

龔成:係,因為《80後百萬富翁》只係基礎,而我平日post好多文都係實戰,有啲地方可能會有啲深。其實我已經寫緊第三本書講財務自由,同第四本書講投資股票,令到讀者可以一步步學習。不過仲要啲時間。

我諗你目前情況,應睇多啲致富書,投資股票只係致富的其中一個方法,你睇多啲書會開到個眼光。另外亦要睇多啲畢菲特的書,你睇睇吓就會掌握到啲野。

呢個時候,你唔好太心急去找倍升股、優質股,反而投資盈富基金、收息股一類較低風險的股票,同時要分段吸納,打好個底先,一邊有實戰經驗,一邊再睇書增加投資知識。

———————————————

問:成哥,想請教一下,債券是否避險的產品?經濟差,債券價值是否會上升?

龔成:債券分好多,好難全部講。不過在加息期,要注意一般的債券價格會下跌,因為債券的利息不變,在吸引力減少的前提下,價格自然下跌。

——————————————

問:成哥,我是你的讀者 先後閱了《80後百萬富翁》的著作 但仍不知該如何入手去分析。本人應如何起步去學多啲投資知識?坊間的投資班可取嗎?同埋未知閣下會否開班給予投資新手報讀?

龔成:你可睇多啲投資書(係書,唔係雜誌),雜誌只是資訊的參考,書先係真正的知識。

你可到坊間上堂,有好多投資班,但建議你睇多啲書,知道咩先係真正的投資先,因為坊間有好多錯誤的投資方法。

你可留意facebook,我有課程時會post上facebook話比大家知。不過facebook好麻煩,一個post唔係所有人都睇到。所以如果你唔想錯過,你可whatsapp 55415588去我助手,你話要新課程資料。咁到時有新課程就會send畀你。

——————————————–

問:龔成兄,小弟日前接觸到技術分析股票走勢和買賣時機。但你話過不會用到。咁價值投資法,用技術分析是否不太適用呢?

龔成:雖然有唔少人會將這兩套方法配合用,但個人則唔會這樣做。而我所用的是純價值投資法。

其實係十幾年前,我勁鍾情於技術分析,好鐘意分析圖表(或者我數學科攞A,對啲圖特別like),於是有一段好長日子不斷研究啲圖,同埋將過往股價程式化,去嘗試預測將來走勢,可惜最終都係唔work。其後完全放棄技術分析,就開始持續賺錢。

如果你研究下啲投資真係賺錢果的人,你會發覺無人用技術分析。憑投資賺最多錢的畢菲特,都話技術分析唔work。

———————————————

問:成,最近個經濟環境唔好,你會怎樣面對?

龔成:經濟唔好?其實唔多覺。我自己各方面進度都好理想,呢啲經濟環境同金融海嘯的差法無得比,更可況,金融海嘯時我都完全無事。加油啦!心態決定一切!

——————————————–

問:龔先生,感謝你用心寫書出書,雖然我已30歲,最近才買你的書,獲益良多。現在苦惱人工低,卻又要應付自己小朋友的開支,儲不到錢。

雖然我有學歷,但我能力不高。我不知道應否繼續嘗試考其他政府工。因我要花時間教養2歲的小朋友,所以時間不多。

關於能力,我有很多迷思,有些人好像天生聰明些,我先生認為我蠢,所以睇死我,叫我認命,安守本份,但我不甘心。請問是否肯努力,能力便可提升不少?可是我就缺少了恆心,決心和信心。你是如何做到的?

龔成:你先生在限制你的成長,但你唔好同佢爭辯,只需做畀佢睇就得。

每個人的潛能根本好巨大,但問題係有無心去開發,我出咗書後,有幸接觸到好多成功人士,佢地共通點係好有自信,相信自己做到,相信自己會開展到某種能力。

根本好多嘢,每個人都做到,問題係我哋有無心去做,太多人未做就睇死自己唔得,但唔試過又點知。

當然,好多事唔係做一次就得,所以恆心就係當中的關鍵,如果你認為人哋做到係一下子就得,咁你就錯,我見唔少創業者都係失敗好多次先成功。你估佢day 1識創業咩?一樣唔識,仲做多好多白癡嘢,但有咩問題呀?佢錯,佢肯修正,失敗了唔會放棄,只係一心向前,一心想成功。

所以,我見你有「唔甘心」特質,我先同你講咁多來激勵你,因為我知你想做,但唔敢去做,你只係唔夠相信自己,同唔敢去做。你有好好的背景,點解唔好好運用?多啲主動學習,開發能力,唔怕你錯,最怕你唔敢去試,能力真的可以開發,我見得太多,你加油啦!

———————————————

問:成哥,我正月供數隻股票,但本小,怕成效未能短時間見,要半年、一年才有。月供中華煤氣(00003)、恒生銀行(00011)及港鐵公司(00066)。平均一年才有一手。本金小,供三隻股票攤分了本金。但這進度自己一直懷疑效率,成哥,可給予意見嗎?

龔成:組合是可以的,而每個人按自己的情況做到最好,而你已做到這部分。另一問題是本金較少,這只有從找尋其他收入方面著手,因我不會建議人靠投機炒賣去增加本金,而是建議合理增值。

由於月供股票模式已是自動化的模式,你已不用為投資太花時間,所以餘下的時間可思考其他賺錢方法,以增加額外收入,相信這對你來說是最理想的。

——————————————–

問:想問自己住緊的樓是否叫資產?現在話有逆接揭,是否能產生cash flow呢?我衰心急,在高位6.5元入咗10萬元港燈(02638)!派息是幾多?10萬元的5%?

龔成:從現金流上,自住樓不是資產,但供到咁上下,因為可以利用按揭套現等方法,故亦可視為儲錢,並利用逆接揭創造現金流,但不是每個人都適合。

港燈一年派兩次息,兩次合共計有6、7厘,不理短期股價,收息概念,相信是理想的。其實很難捉高低,所以我先強調要用策略,例如設計投資組合,分注買入股票等。

——————————————–

問:成哥你好,我是你的讀者,你的書像同我說話一樣,而更是從來都無人跟我講這些說話,很欣賞你咁用心去幫人,謝謝你。

聽你一席話,原來每人都有無限可能,我要努力,謝謝你!!支持你繼續出書,惠及更多有心人,也希望你各方面順順利利!

龔成:我出書後有幸接觸到好多成功人士,發覺佢地不是天才,卻是相信自己得、堅持、好努力的人,所以你繼續加油啦,我相信有心睇我書的讀者,都是想進步、想成功的人。問題是有啲未踏出這一步,add oil!

——————————————–

問:其實儲蓄理念方面,我同你已經好相似,不過我係投資方面出現好大問題。我簡單講出重點,我試過兩次借錢炒股,第一次仲讀緊書,輸50k(還完錢之後結餘係0)。過咗幾年到今年第二次借,再輸多100k,假設還晒錢,只係得返70k,我對投資好似已經冇晒信心,我想問有咩正確的方便去重拾信心,然後再作出一些理性的投資。我會追實你個page,慢慢覆;)

龔成:我係十幾年前,都試過三次接近Total Loss的經驗,好彩呢啲在我後生時經歷,令我明白咩叫正確投資。另外,如果一個人到中年先經歷「遲來的Total Loss」,由於已有一定的生活負擔,所以殺傷力會好大。如果從汲取經驗的角度來看,你是有賺的。

其實,無論做人定投資,心態先係最重要,我唔係叫人死守錯誤的投資,而係明白投資總有得失,只要我哋保持正確積極的心態,不斷吸收教訓,進步,學習正確的投資,錢總會賺返來的。

我十幾年前好鍾意投資炒賣,可惜幾年來輸多贏少。之後狂睇投資書,發現憑投資真正賺錢的人(不只吹水果班),而係真正靠投資賺到過十億元那一班,都係以平穩增值去致富,即係視買股票如買公司,做足功課,耐心等入才買入,並持有多年,獲取高回報。

之後我就一直跟呢套方法,將財富合理增值,十年間贏多輸少。投資是一場馬拉松,不要著眼短期得失,而要建立一套長期能助你真正獲利的方法,而你的兩次錯誤經歷,已是助你明白真正投資的基礎。

——————————————-

問:成哥你好,之前有機會拜讀你兩本書,獲益良多。由於呢排為未來計劃中遇到一啲問題,所以想請教下你。

其實我想問,真正有錢人會係咩時候買樓?我明白係睇時機,但我所謂既「時候」,係指當財富去到幾多,先係考慮買樓好時間?

因為當選擇咗買樓,原本可以用來投資的資金,就會放咗落首期,達唔到「錢滾錢」。但如果要單靠被動現金就儲夠首期,雖然唔係唔可能,但需時較長。謝謝。

龔成:物業是其中一種錢搵錢的資產,所以當你將資金投入物業中,其實都是進行增值的過程。另外,物業有借貸作用,只要借貸成本(息率)少於物業升值及租金回報,這部分借來的資金,就是在創造利潤。

有錢人視物業為資產,以儲的心態,以累積的心態,除狂市時的高樓價不買外,其他時間有錢都會入一啲,但不會一次過入。其實佢哋做既野,是將現金轉成資產,不打算賺買賣差價,著重長期持有。

最理想當然是在低價時買入,因低價時買入不止有好的回報,升值的部分更可作財富的套現(如加按),將資產套出的資金去創造財富。不過,要捕捉到低位其實好難。所以,以平均成本法,每隔某年期便買一層樓,買入價格細的單位,這可減少一次過高位買入的風險,當然在樓市高的年代,並不易做到。

—————————————–

問:你好,小弟於拜讀 閣下一書後甚感敬佩。但不懂投資,亦無甚專業知識。惟憶起 閣下一書提及盈富基金(02800)。故現著手研究,小弟想問此基金現時價值19元,請問還有下跌空間嗎?何時才是入市時機?希望 閣下能不吝嗇賜教,謝謝。

龔成:其實在20元以下已可買入,但你經驗少,因此不宜太大注,建議用分注或月供股票的策略,並要長線投資。另外注意近期股市波動,要先預留防守的現金,而當買入後若股價再跌,不要恐慌,因長期持有不在乎。

——————————————-

問:成哥,之前聽你講話買盈富不錯,但其實我有點猶豫,因為佢跟恒生指數(HSI)走,但如果我係因應HSI而去訂立出入策略,其實可以考慮另一隻優質股港交所(00388)去進行,一來BETA大啲,二來每日HSI成交量可以為我哋提供價格預期,你點睇呢?

龔成:我唔會做中短期的價格預期,所以我不用這套。簡單來說,盈富風險較低,股價波動較低,預期回報較低;港交所風險比盈富高,股價波動較大,預期回報較大。

兩隻都唔差,但如果你對價位的捕捉能力較強,就港交所,但若然風險承受能力較低,就盈富,其實好睇個人的能力及風險偏好。

——————————————-

問:龔成,我在書店找不到你的《80後2百萬富翁》,是否已賣晒?

龔成:坊間仍有的,其實已再版,但部分書店賣完後未必立刻會補貨,我聽讀者講大眾書店《80後百萬富翁》及《80後2百萬富翁》都有充足貨源,你可找找。

——————————————–

問:你好,請問你對IMAX CHINA(01970)有何睇法?我在45元入,打算長放,因為IMAX電影愈來愈多,而且屬半新股,根據美股IMAX亦有盈利增長,在低位買入長放會否不智?

龔成:IMAX CHINA是IMAX品牌的獨佔性許可人,及上映IMAX格式影片的唯一商業平台,品牌及市場令佢點都有價值,問題係呢啲同娛樂有關的行業,一般都比較波動,盈利未必穩定,雖然有潛力,但不建議大注。

另外,佢上市不久,本人一般都不會投資上市未夠兩年的股票,因為要合法地修飾上市時的帳目,等上市可以賣貴啲,是很自然的事。佢上市不久,未有市盈率出到,但以過往的盈利,以及現時的市值推算,是處於高市盈率水平。

——————————————–

問:成,個市跌得咁勁,現實真係咁差嗎?

龔成:股市反映將來,所以遲啲會見到,不過根據過往的歷史,每一次金融市場都是過度反映的,無論好壞都是。

——————————————-

多謝各位提問,若然你有問題想向本人發問,可在本人的facebook專頁中(www.facebook.com/80shing)inbox我,但要注意如無特別聲明,我有可能將問答放上網,當然,我會將發問者的身份,以及有關個人的部分刪去。

另外,由於提問人數眾多,見諒我無法即日回覆,如果是普通的提問,預我起碼要三天以上才能回覆,若然是較複雜的提問,起碼要一星期才能回覆,希望各位能諒解。