新同事

【經一專欄】人蠢無藥醫 新同事碎咗份合約 「影印本當正本咪得囉!」

職場

廣告

經一專欄】「唔識可以慢慢學,但人蠢就係無藥醫!」呢句咁傷人嘅說話,係上司鬧公司最近入職嘅新同事。事源是咁的,公司一名新人由於佢經驗尚淺,好多工作程序都唔識,只可做最簡單嘅Office boy 工作。

撰文:藍橘子 | 圖片:unsplash

新同事將份合約碎咗…

某日上司想新同事影印份客戶合約,本身都無事發生,點知新同事臨放工前錯手將客戶份合約當廢紙咁碎咗。

新同事心知不妙,不過佢諗到一個相當聰明嘅方法!

就係走入上司房,問上司拎張影印版,再影印多一份…

「你影印多一份有咩意思?」上司。
「咁有一份做正本,一份做影印本。」新同事。
「你影印十份廿份都只會係影印本㗎咋!」上司。
「係喎,而家得返你手上呢份,咁你呢份就係正本啦!」新同事。
「唔係啊!呢個世界只會有一份正本合約,而呢份正本,已經畀你碎咗!你到底明唔明啊?」上司。

新同事諗咗一陣…

「唔緊要啦都無人知。你用呢張影印本當係正本咪得囉,反正合約簽咗就無用啦。」

結果上司幾乎被激到爆血管,鬧咗個新同事一餐。

然而,新同事都仲未明白,當遇上法律問題時,究竟一份看似同影印本一樣樣嘅「正本合約」有幾重要。

邏輯思維竹金應變能力

要喺職場生存,撇開學歷、年齡、工作經驗之外…其實一般邏輯思維同應變能力更加重要。

而呢兩樣嘢亦非常受到生活環境影響,簡單舉個例子,唔知大家有冇發現,呢個年代大家都唔再守時,遲到嘅界線愈來愈模糊。

有好多人都認為,只要我預先通知對方,或有一個合理解釋,遲到都唔係問題。

咁點解以前嘅人會更加有守時觀念?

因為以前個年代大家都無手機,約好咗時間地點就一定要準時,否則對方無辦法搵到你行蹤,亦唔知你會遲幾耐,只能白白企喺原地呆等。

為咗避免突發事件,會養成提早出門口呢個習慣。

以前有咩唔識會問人,而家只會問Google同維基,大家唔再需要「記住知識」,只需要「記住點樣查」就足夠。

並唔係話科技進步唔好,但科技令生活愈來愈方便,我哋對嘅環境嘅適應力,就愈來愈退步。