診所職場事【寶豬趣聞】疑心｜珍寶豬

佢行埋嚟揮手SAY HI：「HI，認唔認得我呀？」
登記請俾身分證，嚴拿白撞。

撰文：珍寶豬

我：「係咪睇醫生啊？係嘅麻煩你俾身分證我啊」
佢耍手：「唔係呀，我噚日陪我男朋友嚟睇嘅呢，你認唔認得呀？」
你係想問我認唔認得你男朋友，定認唔認得你？老實講，我對你哋兩個都冇咩興趣。
我：「唔認得啊～請問有咩事啊？」
佢：「我想問你少少嘢㗎，關於我男朋友嘅」
男朋友的事找男朋友問，唔好搵個連你男朋友叫咩名都唔知嘅人問…
我：「你男朋友啲嘢做咩走到嚟診所問呀？病人私隱我哋唔答得㗎～你要知嘅最好問返你男朋友啦～」

佢：「應該都唔係啲咩私隱嚟嘅，姑娘你唔駛咁驚起晒槓咁」
我：「咁你想問咩啊？」
佢：「我想問佢噚日登記個地址係邊度呀？」

我：「吓？地址？」
佢：「係啊，佢登記用邊個地址呀？」
我：「做咩咁問呀？你怕佢用咗你地址登記呀？我哋登記地址冇咩用㗎咋，唔會寄嘢啊」
佢：「我想睇吓個地址係咪佢講我知住邊嗰個地址」
我：「…會有分別嗎？」
佢：「佢話佢住乜乜豪園嘅，我想睇吓係咪啫」
我：「唔好意思呀，病人地址都係私隱嚟～我都唔可以講你知㗎」
佢：「我係佢女朋友喎」
佢阿媽嚟到話係佢阿媽都一樣唔講呀！

我：「除咗病人，我哋係唔會向第三者講～」

佢：「你淨係話我知係咪乜乜豪園得㗎啦，我驚我落錯注呀，如果佢唔係住貴樓嘅，早飛早著嘛」
可能係你俾人飛呢。
我：「唔好意思，我哋係絕對唔會透露」
佢：「嘖，大家都係女人，你都唔想睇住我跟錯人㗎，你都想我嫁得好好睇睇㗎」
我又冇份去飲你嗰餐…我用天眼睇你嫁呀？
我：「呢啲係你哋兩個嘅事，我覺得你真係想知嘅要問返你男朋友啦」
佢留低咗一個『嘖』離開診所了。

 

體驗1分鐘貸款批核，隨時提款話咁易！

申請DBS Black Card簽賬滿$5,000，即換取台灣來回機票!

延伸閱讀：

診所職場事【寶豬趣聞】靠唔住嘅樣

診所職場事【寶豬趣聞】 經期小姐