辦公室管理學 下屬眼中係好上司 就做唔到老闆眼中嘅好上司

辦公室管理學 下屬眼中係好上司 就做唔到老闆眼中嘅好上司

辦公室管理學】唔知大家有冇記憶,以前喺學校遇到嘅老師,如果你覺得佢「好好人」。咁好大機會佢教嗰一科嘅成績都係比較差。以我個人為例,當年讀者唯一一科合格,就係最惡嗰個老師教嗰科。咪以為小朋友先會有呢種犯賤心態,其實上班族亦都係一樣。做廚房大佬夠惡,先管得住下面班細嘅。
撰文:藍橘子 | 圖片:網上圖片

好上司管唔住下屬

辦公室亦都一樣,上司愈好人,代表下屬可以愈放肆,愈無威脅性。不過唔好以為做上司可以隨便鬧人,一定好爽。

我朋友喺一間規模唔算大嘅公司做高層,老闆之下有5條Team,朋友喺公司做咗十幾年,現時負責管其中一條。

我朋友本來個性比較和善,唔鍾意鬧人,連催促下屬做嘢都好少。

不過佢發現咁樣根本管唔住班下屬,無人聽佢講嘢,好多時要朋友自己執手尾,下屬有錯好聲好氣教佢,結果下次都係錯,完全無改進。

工作能力, 管理能力,下屬, 好上司, 老闆, 辦公室, 辦公室管理學

辦公室管理學 VS 工作能力

另一方面老闆又向朋友施壓,拉佢入老闆房訓話:

「其實我睇好你工作能力,但你管理能力令我好擔心。不過你喺公司搏殺咁多年,唔通我唔升你咩,不過你真係要做好啲,唔好凡事都親力親為,有咩事就畀下屬去做。你係上司,乜都由你做晒,咁我請佢哋返嚟做乜?」

聽完呢番說話,朋友決定做一個嚴格嘅上司,炒走幾個唔聽話嘅下屬,實行大革新。

半年過後,朋友成功轉型,下屬聽聽話話,不過…佢一樣做得唔開心。

工作能力, 管理能力,下屬, 好上司, 老闆, 辦公室, 辦公室管理學

針係兩頭利 有得必有失

佢話每日返到公司,下屬唔會同佢傾計食飯,背後仲講佢壞話,其他Team嘅Manager更加睇佢唔順眼,視佢為眼中釘。

朋友話每日返工都好大壓力,根本無朋友可以傾到計。

唔似得以前,去後樓梯食煙,邊個同事入黎都可以吹兩句水,而家佢係神憎鬼厭嘅存在。

呢個可能就係做上司嘅宿命,你決定做一個老闆眼中做得嘢嘅Manager,就必然會係當你出去開會,下屬會鬆一口氣振臂歡呼嘅上司。

關鍵詞
經一專欄