辦公室管理學 下屬眼中係好上司 就做唔到老闆眼中嘅好上司
好上司管唔住下屬
辦公室亦都一樣，上司愈好人，代表下屬可以愈放肆，愈無威脅性。不過唔好以為做上司可以隨便鬧人，一定好爽。
我朋友喺一間規模唔算大嘅公司做高層，老闆之下有５條Team，朋友喺公司做咗十幾年，現時負責管其中一條。
我朋友本來個性比較和善，唔鍾意鬧人，連催促下屬做嘢都好少。
不過佢發現咁樣根本管唔住班下屬，無人聽佢講嘢，好多時要朋友自己執手尾，下屬有錯好聲好氣教佢，結果下次都係錯，完全無改進。
辦公室管理學 VS 工作能力
另一方面老闆又向朋友施壓，拉佢入老闆房訓話：
「其實我睇好你工作能力，但你管理能力令我好擔心。不過你喺公司搏殺咁多年，唔通我唔升你咩，不過你真係要做好啲，唔好凡事都親力親為，有咩事就畀下屬去做。你係上司，乜都由你做晒，咁我請佢哋返嚟做乜？」
聽完呢番說話，朋友決定做一個嚴格嘅上司，炒走幾個唔聽話嘅下屬，實行大革新。
半年過後，朋友成功轉型，下屬聽聽話話，不過…佢一樣做得唔開心。
針係兩頭利 有得必有失
佢話每日返到公司，下屬唔會同佢傾計食飯，背後仲講佢壞話，其他Team嘅Manager更加睇佢唔順眼，視佢為眼中釘。
朋友話每日返工都好大壓力，根本無朋友可以傾到計。
唔似得以前，去後樓梯食煙，邊個同事入黎都可以吹兩句水，而家佢係神憎鬼厭嘅存在。
呢個可能就係做上司嘅宿命，你決定做一個老闆眼中做得嘢嘅Manager，就必然會係當你出去開會，下屬會鬆一口氣振臂歡呼嘅上司。
延伸閱讀：
打工仔必睇！按摩 夠瞓 食得好 5個方法 克服職業性疲倦
