每年投資15萬建立股票黃金組合 一半買比亞迪 一半買盈富長建 ｜龔成信箱
撰文：龔成 ｜圖片：新傳媒資料庫
1.股票組合
龔成老師, 你好, 我現時大部分是平穩增值股，其餘為潛力股，餘下小量為劣質股，劣質股我諗住等股價好啲先放
其他股票打算長渣，老師認為需唔需要賣出現時的股票？
現時我比較年輕, 可以承受風險較高,現時我手持5成現金, 5成股票,想改變到3成現金, 7成股票
5成潛力股和5成平穩增長股
所以現時打算用15萬分注買入比亞迪, 分5 注買入
策略是現價買入, 每跌5%就入一次, 如果3個月內冇跌5%, 都係5X, 會再入一次
另外, 我每個月可以儲18000, 7成投資股票, 一年可用15萬投資
7.5萬投資比亞迪, 策略不變
餘下7.5萬想分別投資盈富基金&長江基建
由於本金太少, 做不到分注買入盈富基金&長江基建, 其實會唔會月供會比較好？
龔成老師：
我地持有股票，最重要是考慮企業的質素，以及前景，只要這方面過關的話，你可以繼續持有，長線持有絕對可以。下一步就是因應自己的投資目標，決定各類別股票的比例，相信這方面你都明白。
你改變比例，是可以的，但潛力股都要有適合的分配，比亞迪（1211）當然可以成為其中一員，分注買入是很好的策略，但如果更好的話，分配成一個潛力股組合更好。
另外，盈富（2800）、長建（1038）都是可以長線投資，不斷儲貨的股票，月供是最好的做法。
總之，你要改立一個組合，長線持有就可以。（對照龔成信箱：Q6385）
2.長線投資
你好，龔先生，我來緊30歲，有係Facebook 留意你的動態，作為一個剛剛開始識小小股票，我有月供以下幾隻股票
2800盈富.941中國移動.700騰訊.006電能（全部岩岩開始供，全部都係供緊2000蚊）我有幾個問題想請教：
1.如果我想供埋003煤氣，同埋1211比亞迪，如果你都建議，你覺得我金額應該點分配，如果唔建議，其實我想供003.，（因為我覺得佢10股送1股好吸引，）你覺得如果我選擇003放棄邊隻？而1211就係睇到你之前話呢隻有潛力，想試下
2.因為我對股票認識都係岩岩開始，我而家係恆生月供緊，有聽朋友講證卷行手續費會便宜啲，你覺得作為新手既我應該繼續用恆生定去證卷行開新戶（講緊一手手買入，因為我知得銀行會做月供）如果證卷行，你會建議邊間？
3.而家我月供700騰訊，2000蚊得幾股，你覺得我應該繼續供佢定轉第二隻？因為供十年後都可能得5-6手（若以400價不變的話）
4.請問你覺得長線投資（約十年）你會建議邊幾隻股票？
麻煩晒，因為新手關係，問題多左，請見諒
龔成老師：
1）以你的年齡，兩隻都供晒是最好的，因為增值力較大，但如果只能2選1，就選比亞迪（1211）。
2）證券行一般都會較平的，但所有野都有利有弊，證券行就無咁方便。但無論你選邊間都好，月供股票比起一手手買入，是較適合新手的。
你選較大型的證券行就得。
3）所有月供股票，都要以長年期，甚至超長年期去進行，所以，你最好想清楚供邊隻。因為這是長年期去累積的。
決定我地供邊一隻，一定是企業的質素、長遠發展，入場費，多少股數，都不是關鍵位。當你以金額的回報率計，你就明白手數少不是問題。
4）盈富（2800）、港鐵（0066）、中銀（2388）、金沙（1928）、銀娛（0027）、領展（0823）、比亞迪（1211）、中生製（1177）。
你所選的電能（0006）、中移動（0941）、騰訊（0700）都可以，但未必是我最首選的。（對照龔成信箱：Q6388）
3.中國擎天軟件（1297）
老師想問幾條問題
1.中國擎天軟件如何?現價合理?
2.德林國際如何?現價合理?
3.北控水務現價便宜?
謝謝.
龔成老師：
1）中國擎天軟件（1297）有質素的，近年的生意與盈利都有理想增長，但始終未到十分有規模的狀態，但整體來說，正面的。比起不少科網類股票，這股現價算是合理。
2）德林國際（1126）主要業務活動為設計、發展、製造及銷售毛絨玩具及金屬和塑膠玩具。雖然近年生意有增長，但大環境對佢長遠發展，未必有利。
較吸引力，就是現時處於平宜水平，但考慮到佢的長期發展，投資價值只屬中等。
3）北控水務集團（0371）現時估值合理，市場對佢之前有過高期望，以為佢會高速增長，但佢只是平穩增長，所以之前股價有少少高，現時處合理水平。（對照龔成信箱：Q6376）
4.美圖公司（1357）
你好老師 我想請問1357值得投資嗎？
現價7、8左右徘徊
會否有望重返12-13蚊水平？
龔成老師：
美圖公司（1357）係有潛力，但同時有風險的公司，就算最近回落了好多，但現時市盈率仍去到60倍的水平，從基本因素分析，一點都不平。
但這股有潛力，市地認為佢的概念有價值，因此比佢一個好高的概念價值，但這個價值幾多，其實無人知。所以，佢之後的股價，可以爆上去，又或再跌都得，因為支持佢現時的股價，只是「概念」。
因此，要睇你自己博唔博，如果你小注的話，博下都可以，但太大注，就最好減持一部分先。（對照龔成信箱：Q6375）
5.入市
本人投資新手 30歲
在2017暑假入手股票
經朋友介紹下看到老師專頁
早幾個月上了老師的股票班,亦讀老師其中5本著作(尚欠百萬富翁2未買到）
現月儲$25,000，月供$5,000
(5隻股票-1211/66/823/27/2800)
尚餘$8000 作家用洗費
資產組合如下:::
-流動資金 ~$90,000
-Ibond $40,000 (各2手分別於本年暑假 和下年暑假到期)
-月供股票: ~$35,000
-股票組合: 市值~$580k-$590k
**Q1) 可以麻煩老師替我望望現有股票組合需加減調整嗎？
好像好鬆散的
本人未有供樓/置業/家庭/健康負擔
現有股票組合如下: (市值~$580k-$590k)
0003 煤氣 1手
0006 電能 4手。應減少持股數量?
0011 恆生 1手。可加入月供？
0052 大快活 1手
0054 合和實業 1手。可考慮剔除嗎？
0066 MTR 2手 **呢隻亦有在另一銀行月供
0285 BYD 電子 1手
0700 騰訊 1手 。應繼續持有？
737 合和公路 6手 。應減少持股數量?
1038 長江基建 1手 。應增持？月供 或逐手買好？
1211 BYD 2手 *呢隻亦有在另一銀行月供$1k*
1448 褔壽園 1手 。呢隻建議列入月供嗎？
1928 金沙 2手
2388 BOChk 3手
2800 盈富 1手**呢隻亦有在另一銀行月供$1k**
如果2388 vs 2800 哪隻放月供會好一點？
6823 HKT 1手
另外月供$1000 @ 0027銀娛& 823 領展
(因見呢幾隻入1手都幾貴)
**Q2) 上完堂後,早前趁跌市幫母親大人入手
1. 0002 中電 1手
2. 823 領展 1手
3. 6823 HKT 1手 作收息用
以上組合正確嗎？
讀完老師著作後
才發覺應趁年輕多儲蓄現金 的重要性
有點後悔為何之前工作那5年儲那麼少！
現在都努力發掘一切合法賺取現金的part time Eg: 補習/sales/ freelance 教書 etc
Q3) 來緊數個月後 本人會收到一筆約滿酬金~$100k
應如何運用才恰當？作現金流 or 入市投資？謝謝
龔成老師：
1）組合的確是較多股票，同時有少少亂，其實，只要你持有盈富（2800），組合已經有適當的平衡效果，你唔洗持有太多股票。有些只有一手手的，不如減持佢。
你可以減持以下股票：煤氣（0003）、大快活（0052）、合和（0054）、香港電訊（6823）。
如果有較多的資金，就增持翻盈富（2800）。
2）可以的，但如果你母親已到退休的年齡，可以更集中在收息股類別，增長力較少的股票，例如港燈（2638）。
你30歲，仍年輕，應該盡力儲更多初期資金，兼職是一個好方法，這刻雖然會忙少少，但在這段累積時期，是絕對值得的。
3）等機會入市是較好的，除非你持有的現金已過多，否則不用心急，就算入市都只要分注慢慢入。（對照龔成信箱：Q6377）
6.耐世特（1316）
成老大 1316呢隻股點睇
龔成老師：
耐世特（1316）都幾麻煩，佢好受中美貿易同政治事件影響，變到十分波動，其實佢本質唔算差，但出口部分令佢面對一個較為被動的情況，只能話佢有危有機。
現時約為10倍市盈率，估值合理，亦反映了相關的風險，都有投資價值，但由於較波動，風險略高，所以就算投資，都不要太大注。（對照龔成信箱：Q6378）
7.內銀股
你好，眾多內銀股之中，可否選出你認為升值潛力最高的？
龔成老師：
如果講穩健得來，又有較有增長力的話，交通銀行（3328）算是其中之一，佢都有一定的規模及穩健度，加上匯豐（0005）係佢其中一個主要股東，質素點都唔會差，穩健程度信得過。
比起4大內行，佢算是較有增長力的，同時現時股息率有近6%，估值不高，從值博率睇是較好的。（對照龔成信箱：Q6379）
8.高回報股票
龔成老師你好，我係一個fresh grad，下個月就會返工，月入15k。想在5年儲到100萬。
我知道你提過可以月儲一萬，然後用15%的年複息回報，買咩股票可以有咁高回報？月供股票做唔做到？ 而且係唔係拎哂所有積蓄去投資先可以達成到個目標？
小妹岩岩先接觸投資既知識，所以好多野都仲未搞清。但睇左你嘅書，覺得好勵志好正面，多謝！
龔成老師：
其實係咁的，15%是一個複息回報率，例如$100如果每年增加15%，第1年就是$115，第2年$132，第3年$152，第4年$175，第5年$201，如此類推。
當然，投資時不會每年都相同得到15%，但如果我最初的$100，5年後有$201，就算中間升升跌跌，但最終是$201，我地就會推算到複息回報，平均計就是每年15%。
月供股票都可以做到，但有可能比我的回報較低，因為我除了懂得選股外，更由於把握了買賣時機（這不是短期的炒賣，而是長期的買賣時機），所以得到了較高的回報。
月供股票的好處是將買入價平均，風險得以減少，但同時間回報有可能減少，因為無法在較平宜時買最多的貨。
所以，要睇你的投資實力，如果你未能掌握選股、買賣時機、企業估值等技巧，簡單地月供是最好。當然，你同時可以開始學股票知識，令你將來的回報提高。
你現時最好將部分資金，例如可儲蓄金額的一半，用於月供股票，同時儲下現金，同時學投資知識嚴到大跌市時就能把握機會。如你不懂選股，就月供盈富（2800）。（對照龔成信箱：Q6381）
9.收息股
你好 我想問現時買入長和收息是不是一個好選擇？
龔成老師：
長和（0001）有一定的投資，可長線投資，但這類發展成熟，以及綜合類型的企業，增長力較少，這點你要明白。
在長和系中，收息的可選擇港燈（2638），平穩增值及收息的，可選長建（1038），而長和可說是兩者之間，所以，都好睇你本身的投資目標。（對照龔成信箱：Q6383）
10.借貸資金投資
你好龔成！我有投資問題想問：
我是做生意的，但開始麻麻，所以想搵番穩陣既投資方式，由於經營生意令我借貸機會大，現在借貸餘額大概300萬分左5間銀行，年利率分別20.99%, 4.67%, 7.2%, 15.97%, 一間月平息0.55%, 但有160萬壞帳（客戶欠款）
我的生意營利平均只有2-5%，現在仲蝕緊錢3萬左右，有一間居屋同我媽一半名未補地價
流動現金3萬，每月開支大概2萬，現在想分開借貸資金投資，只留少部分在生意上，其餘用作投資，請問有什麼意見？
有咩辦法利用140萬在一年賺回160-200萬謝謝！
龔成老師：
你的生意回報不多，但你的借貸成本都幾大，即是你借得愈多，其實就愈蝕，所以如果可以的話，盡快還清貸款。
可能你想利用現金，將資金投資滾大，我地一般都得的投資回報，大約是一年約15%，要將$140萬滾至$160萬以上，可以，但最大的問題，就是你借貸成本都去到十幾厘，與其將錢用作投資，不如將錢用作償還更好。除非你能只集中借一些5%以下的借貸，否則，還款仲好。
另外，你的生意如果回報不高，應該想想有無方法突破，又或想想這是否一盤值得你經營的生意。
至於投資方面，一定要長年期進行，投資股票的原理就是買企業，買入後耐心等企業成長，這往往都要數年時間，因為中短期的股價無人知，但只要是優質股，長期都有不錯的回報。你就算買一些平穩增值股，例如盈富（2800）、港鐵（0066）、中銀（2388）等，長遠都有不錯的回報。（對照龔成信箱：Q6384）
