診所職場事【寶豬趣聞】搵工的少女  |珍寶豬

診所職場事【寶豬趣聞】搵工的少女 |珍寶豬

【診所職場事】有日一位少女嚟到診所。
佢指指門外告示問:「係咪請人呀?」

我:「係呀,你係想做全職定兼職?」
佢:「全職人工高啲?」

撰文:珍寶豬

我:「係嘅,不過相對返工嘅時間就長啲囉,我俾份表你,你幫我填咗先呀」
佢望望份表:「人工呢欄係我填㗎?」
我:「係啊,你期望嘅人工嘛」
佢望望我:「你而家幾錢人工呀?」
我冇諗過要話你知我幾錢人工喎…
我:「我幾錢人工同你期望有幾錢人工冇關係㗎~」
佢:「咁…你哋呢行應該有幾錢人工呀?同埋係咪冇咩嘢做㗎?」
冇咩嘢做?你以為我真係日日返嚟坐喺度等收工呀?如果係嘅點解醫生自己唔坐埋一份算呀?
我:「都睇你有冇經驗嘅,如果冇嘅初入職就應該萬零啦~都多嘢做㗎,有時忙起上嚟,我哋可以飯都冇時間食。」

佢打個突:「萬幾?返幾多個鐘呀?」

我:「呢度全職就係朝九晚八,中間有三個鐘休息時間~不過好多時都要OT」
佢:「萬幾蚊全日俾晒份工㗎啦喎!」
我:「…都係呀~咁你仲填唔填表呀?」
佢掉低份表同枝筆:「梗係唔制啦,坐監咁,得萬幾人工要我俾晒份青春出嚟呀?搵快錢好過啦!」
我執返份表同筆:「嗯,咁…希望你搵到份啱心水嘅工啦~」
佢停一停諗一諗:「個醫生好靚仔㗎?」
我認真回答:「叔叔嚟~」
佢:「叔叔冇問題呀,靚仔有錢咪得囉」
我更認真的回答:「好有錢嘅話又點會出萬零蚊糧?靚仔更加唔駛喺度啦~」

少女一臉不屑退後~離開診所了。
醫生我咁答都係為你頭家好咋~

延伸閱讀:

診所職場事【寶豬趣聞】有用的話

診所職場事 寶豬趣聞 有用的話 珍寶豬

診所職場事【寶豬趣聞】相由心生