$40萬積蓄月儲$5,000  3年內要變$150萬做首期買樓 真係得? |龔成信箱

$40萬積蓄月儲$5,000 3年內要變$150萬做首期買樓 真係得? |龔成信箱

【首期】今日龔成信箱,不少讀者想為未來作打算,應如何實行投資計劃,亦提及熱門的股票以及投資心態等問題,當中包括內地樓、公司價值、月供股票、 代理投資、投資組合 ,以及行業分析。

撰文:龔成 |圖片:新傳媒資料庫

1.內地樓

Hi 有事想請教

我今年25歲,工作快3年,月入35k,現儲約40萬,未試過投資,只買了儲蓄保險和年金,每月共5千,想問問除了月供股票仲有咩其實途徑投資?

每月要儲多少和投資的分佈呢?另外又想問買工廈/內地樓做投資又好唔好呢?

目標想3年內儲有150萬作首期買樓

 

龔成老師:

如果你投資經驗不多,最好先投資一些入門的方法。月供股票的原理是每月儲股票,由於有多個買入價,因此能減少一次過在高位買入的風險,因此對新手來說是最適合的。

如果你每月能將部分資金,例如$1萬,用於月供股票,最簡單就是月供盈富(2800),對你的長遠財富是最好的。

當然,你亦可以用儲一筆錢投資的模式進行,但最好選擇較穩健的股票,例如收息股,這樣能有助你減少風險。當然,你投資時可以將一筆資金,分成多注,每隔一段時間才買入一次,同樣可以將價格平均,減少風險。

你持有$40萬,其實可以將部分資金,用於投資股市,但由於你未有經驗,暫時只可動用$10萬-$20萬,用作分注買入股票,投資盈富及收息股類別,對你較好。

至於工廈,部分都有投資價值,但你要有一定的知識才可投資,因為這是比住宅更進階的。而內地樓,你一定要分析租金回報率,評估一下是否吸引,不要單憑概念因素就盲目入市。(對照龔成信箱:Q6559)

積蓄 首期 買樓  龔成信箱
買內地樓前要分析租金回報率,評估一下是否吸引。

2.首期買樓

龔成老師您好,我今28歲 想幾年後有筆首期買樓
我而家月儲一萬, 另外銀行有十萬現金同股票如下:

富力2777 兩手 買入價22.9
碧桂2007 兩手 買入價14.2
電能0006 一手 買入價58.9
建行939 四手 買入價6.4
平安好醫生1833 一手 買入價 54.8
新秀麗1910 一手 買入價27

我覺得自己個portfolio好似有啲散亂, 初步想賣左富力先, 再買或者加碼一啲有質素的股票, 想請教下老師意見同應該買邊隻股票好

 

龔成老師:

組合中,都是有質素的股票,不算太散。但要注意翻,內房股的風險較高,因為佢地憑中國物業市場興旺,生意不斷向好,但中國樓市有少少泡沫,加上這些內房股,都是高負債的企業。

因此,內房股不是無質素,但要明白背後的風險,小注可以。而你想賣出富力(2777),可以的。

另外,平安好醫生(1833)不是無質素,但現時的估值不低,太多概念價值在當中,以至令股價波動較大,這點都要注意。

如果你想買入更高質素的股票,你可以考慮金沙(1928)、港鐵(0066)、領展(0823)、中銀(2388),都可以。

現時你有$10萬現金,可以動用部分(例如$5萬)作投資股票,餘下就持有現金等大跌市機會。你可投資盈富(2800)及上近優質股,分注買入就可以。

至於你現時可月儲$10000,可以將其中的$6000作月供股票,當中$4000供平穩增長型,以是上述的股票,餘下的$2000供潛力股,例如比亞迪(1211),已經能建立一個不錯的組合。(對照龔成信箱:Q6558)

3.信義玻璃(0868)

龔sir: 想請教下你點睇0868 信義玻璃 現價值得入手嗎?

我睇你書建議小注入場 請問現在想法是否相同?

另外想問下1211比亞迪 我留意過你話50蚊到係合理水平 但依家1211或汽車股都受中央政策被睇淡 加上中美貿易談判 有機會令中國需要加開市場 係咁多不利因素下 你仲推薦1211嗎?感謝

 

龔成老師:

信義玻璃(0868)是有質表的股票,雖然這股比我書最初推介時已升了一倍,但現時仍不算貴。

這是一間有潛力的企業,但由於有少少不確定性,因此盈利會較為波動,所以未必適合太大注投資,但以本質,以及前景來說,這股可以長線投資的。

現價可分注買入,無問題的,只要不是訓身就可以了。

至於比亞迪(1211),這股長遠質素仍在,但自身問題,以及政策,都有可能令佢中短期較為不利,但只要你用長線投資買這股,就絕對無問題的。

現時股價合理,可以分注買入,前景正面。(對照龔成信箱:Q6556)

 

4.投資分配

龔老師, 你好。我現時係一個全職實習生(同時係個投資初哥),但黎緊九月又再次成為兩年既全職碩士學生。

到八月離職既時候,積蓄會有十五萬。如果我五萬做投資,十萬作未來兩年流動資金及洗費,咁分配合唔合理?

前題係我讀既科目可以係相對忙碌,我暫時當自己冇機會做兼職。而五萬投資方面想請教一下點分配比較好?

比如月供盈富每月二千?又或是每月一千月供盈富加買入港鐵?或者請教一下你有咩更好既投資建議?多謝解答。

唔好意思,希望你可以suggest 入市價位

 

龔成老師:

我地投資,一定要閒錢,這筆錢中短期都不打算用,因為投資要長期才能見到回報。

所以,你一定要計清楚自己將要的洗費,我認為留$10萬投資$5萬是可以的,但具體情況,要問你自己。

利用月供股票是較好的投資方法,你可以月供$2000,長期進行就得,選股最好集中在盈富(2800),因為你金額不多,再分做不同的股票,會好散。

已經可以開始,月供是長期進行的,價格能有效平均,所以就算這刻大市不算平,也不用擔心。(對照龔成信箱:Q6560)

5.月供股票

龔成先生 你好,
我是買股票的新手,你不少文章都介紹月供股票適合新手嘗試。以下有些問題想請教一下:

1. 我對盈富基金 及 電能實業均有興趣,請問後者現階段合適買入嗎?

2。現時計劃用三萬元來投資股票,有想過買入一手盈富基金,再月供電能實業(因為一手有點貴),請問你認為這個方法有效嗎?還是建議兩隻都月供好呢?

3. 我對月供股票有初步的概念,但不大明白當股價升的時候,回報跟買入一手股有何分別?

不好意思,問題有點多,謝謝你!

 

龔成老師:

1)電能(0006)是有質素的股票,但佢在長和系的定位,只是一隻收息股,不斷為長建(1038)提供現金流。所以電能增長不高,你最好當佢是一隻收息股,不要對股價有太大期望。

就長期月供來說,我會建議你供盈富(2800)。

2)月供始終較好,因為買入價能有效分散,你可以避免了一次過在高位買入的風險。

3)月供股票就是每月都買入,假設你月供3年,你就買入了36次,每次都在不同的價位,風險就可以平均。

如果你只在一次買入,風險就較高,當然,如果你能把握在低位一次過買入,回報就大不同了,但這要有一定的技巧與經驗。所以,對新手來說,月供是最好的。(對照龔成信箱:Q6561)

6.學習投資

龔sir你好,我係一個fresh grad,我真係好感激你,你既故事令我覺得好熱血,令我覺得我都可以唔受環境所限,要達到目標!我每日都會諗起你發奮去創當既事,你真係我既偶像,真心。好多謝你。

但我返工就返得好唔開心,覺得自己社交能力好弱, 而且份工限制住唔可以工作時做自己野,每日加班加到7,8點。單次車程又用至少1.5hr。感覺已經冇左自己時間。而份工既收入只係15k.

本身自己找左份parttime,home office嘅,如果每日放工做多啲,一個月可賺3000。

但正職已令我好累,根本好難真係賺到3000。

而且我好擔心自己會唔會冇時間去學投資。我都好想上你堂,但而加先第一個月返工,儲蓄10000都冇。要靠住自己先。

我應該點做好呢?

如果轉工,可能會整花個cv。(而且未必有15k)

如果唔轉,又會有好多問題。
應該點先可以在煩忙既工作中,儲蓄更加嘅現金同學習投資?

 

 

龔成老師:

剛剛出來做野,人工不高、儲蓄不多,這是正常的,你有鬥心,已經比不少人強,但要成功,都需要一d時間,好難話一次過突破所有野。

你現時正職雖然只有$15000,但唔洗急著轉工,因為初工作人工不高是正常的,你要把握機會吸收工作經驗,同埋學習。

至於你兼職果度,明白你已經好累,但我都希望你堅持一下。

其實我最初工作,正職人工$8000,逼自己儲$10000,當時逼自己做好多兼職,一個星期返7日,初出來做野頭1、2年我最忙,但我都做到,之後就開始鬆翻少少。

初頭是困難的,但如果你有目標,就會有動力。

我希望你這刻保持這份工職,同時做下兼職,等你可以儲多啲錢,到遲啲先辭去兼職。另外,如果兼職真的佔你太多時間,你都要取平衡,我記得初工作頭兩年,我可以一邊做正職、一邊兼職、同時仲會逼自己睇投資書,這是我人生最忙的2年,但所有野都是逼出來。

我做兼職,都是補習之類的工作,時薪較高,同時時間有少少彈性。

你要在兼職同學投資方面,取一個平衡點。(對照龔成信箱:Q6562)

7.信義光能(0968)

老師你好,近日00968 信義光能股價受壓,是入貨時機嗎?前景正面嗎?已有貨[email protected]

 

龔成老師:

信義光能(0968)之前下跌較大,因為中國發改委、財政部、國家能源局聯合發布最新通知明確,暫不安排2018年普通光伏電站建設規模。

今年僅安排1000萬千瓦(10吉瓦)規模用於分布式光伏項目,並對新投運的光伏電站標桿上網電價每千瓦時統一降低0﹒05元(人民幣.下同)。

這難勉對信義光能有影響,但這股本質其實不差,長遠都算正面,如果你之前的貨,佔你總資產不算多,可以小注買入。

這股前景都正面,現價不貴,但不確定較大,存有風險,所以不應太大注投放這股。(對照龔成信箱:Q6563)

8.行業分析

阿sir,我係股票班學生 一路學一路溫時,發覺方法唔係我想像中那麼難但都幾博大多變。

我發覺我最冇信心的反而系基本的分析上,數字估值上我可以 follow 一個 model, 但在基本分析上,我唔知點樣去增加我對不同行業的深入了解,從而得出有信心的結論。

我可以點樣有效地增加對不同行業分析的知識 ? 謝謝。

 

龔成老師:

你這刻最重要的,是熟習了企業分析、行業分析、估值方法的基本型態先,你要先打好基礎,明白整個分析及估值的運作,下一步就是不斷吸收經驗。

行業分析是較難找資料的,但第2堂其實都提供了不同的途俓,比你找到行業所需的資料。當我地正式分析一間企業時,好多時都會一次過分析佢的行家,當你睇佢的年報、網站,以及行家的年報、網站,其實會睇到好多野,佢地會比左好多行業的資訊你。

另外,上一些行業的網站,其實都有不少資料的。(對照龔成信箱:Q6564)

9.代理投資

老師你點睇代理股票投資既服務?都是騙局還是可以賺取合理回報?老師為什麼不考慮做基金/股票經理?

 

龔成老師:

你所指的代理投資,即是基金一類的服務,這有存在的價值,不過坊間的基金,太多是較一般的。

之前外國做了一個調整,發現有8成的基金,回報是跑輸大市的,即是你簡單地買入盈富(2800),回報已經跑贏了坊間8成的基金,更不用比好貴的認購費、管理費,所以,我會推介人買盈富多d。

至於你問我點解唔做基金經理,其實我在十幾年前,有試過自己細細地,在朋友與家人間集資幫佢地投資,最後雖然有回報,但中間出現了一些不愉快的事件,所以,我不太喜歡幫人投資,亦不想再做這類角色。我認為,自己應該為自己的財富負責。(對照龔成信箱:Q6565)

10.公司價值

老師,737大股東收購小股東股票,呢啲動作是否不影響公司價值?小股東可繼續長期持有該資產嗎?

 

龔成老師:

基本上唔會影響企業價值,因為這只是股權問題,並不涉及運作問題,所以企業價值是不會改變的。

下一步要睇大股東的策略,如果佢上保留上市地位,就會繼續比佢上市,只是大股東增持了持股比例。但如果佢唔想佢上市,就有可能強制收左小股東的股票,例如港機(0044)提出私有化一樣。(對照龔成信箱:Q6566)

延伸閱讀:

手持50萬現金30萬股票 用所有儲蓄買樓 會否太冒險

現金 股票 買樓 龔成信箱

90後建立攻守兼備投資組合 揀滙豐煤氣比亞迪盈富 好嗎

攻守兼備 投資組合 滙豐 煤氣 比亞迪 盈富 龔成信箱