診所職場事 【寶豬趣聞】 睇醫生唔俾錢   |珍寶豬

診所職場事 【寶豬趣聞】 睇醫生唔俾錢 |珍寶豬

【診所職場事】有日一位女士嚟到診所。
佢行埋嚟登記處細細聲問:「有冇得免費睇醫生呀?」

我:「吓?冇呀~我哋會收診金同藥費啊」

撰文:珍寶豬
佢:「我有病㗎」
我知,嚟得診所嘅個個都係有病先嚟嘅~
我:「我可以同你登記,你睇完醫生之後,我哋都會收返你錢啊,價錢喺張告示度,你可以睇睇個價錢先」
佢:「醫生唔係睇病人㗎咩?」
係呀,所以佢喺度做醫生囉?
我:「係呀~佢睇㗎」
佢:「睇病人唔係幫人㗎咩,幫人做咩要講錢㗎?」
你有咁高尚嘅情操加上有呢世點都用唔晒嘅錢去幫人,坦白講,我真係好羨慕你。
我笑笑:「我哋都要出糧,交租,交水電~做唔到免費㗎」
佢:「我有病㗎」
睇得出,好嚴重嗰隻添~

我:「如果你經濟上有壓力嘅,一係你直接同醫生講,睇吓醫生有冇可能收平你少少~又或者你睇門診,都平㗎」
佢:「我經濟冇問題,係有病咋喎」
…即係你有病你有錢,但係就係唔想俾錢?唔得咁無賴㗎喎~
我:「ER…咁有唔舒服就睇醫生啦」
佢:「你哋會收錢㗎嘛?」
我點頭:「係呀」
佢:「我有病㗎」
我點頭:「我知,你講咗幾次,所以我咪叫你睇醫生,我同你登記囉」
佢:「睇醫生唔駛錢?」
我擰頭:「我都講咗幾次,睇醫生係要錢」
佢:「我死喺門口係唔係都要收錢?」
我:「….如果你有咁嚴重嘅問題會死嘅,我哋呢啲普通診所幫唔到你㗎喎~」

佢:「要錢嘅我咪去死囉」
….咁好啦,你去意已決的話,我都唔想阻你發達啦。我唔會再應你㗎啦~
佢自己重覆問多幾次,見我唔應佢就走咗了。

延伸閱讀:

診所職場事 【寶豬趣聞】 差額

診所職場事 寶豬趣聞 差額 珍寶豬

診所職場事【寶豬趣聞】估估吓

診所職場事 寶豬趣聞 估估吓 珍寶豬

【診所職場事】電話響起~

我:「你好,乜乜診所」

對方係一位小姐:「我早幾日嚟睇過㗎,你記唔記得我呀?」

撰文:珍寶豬

我:「唔好意思呀小姐,我就咁聽聲認唔到你啊~請問有咩事呢?」

佢:「我有啲嘢想麻煩你㗎,真係有啲麻煩到你」

唔好咁麻煩啦,收線啦。

我:「咩事呢?」

佢:「你哋嗰日咪收我三百蚊嘅」

我:「係呀,我哋診金連藥費係三百」

佢:「我老公話我睇貴咗呀」

咁點呀?睇醫生都會睇貴咗㗎?

我:「吓?」

佢:「佢話搭個站去第二度睇平一百蚊呀」

我:「哦?係呀?咁下次去嗰度睇囉」

佢:「我會呀,呢次你可唔可以退返錢俾我呀?我唔駛你退全數,你退返個差額俾我得㗎啦,我都食晒啲藥㗎啦,我知冇得退全數嘅」

你知唔知差額都係冇得退呀?你都識講藥都食晒啦,咁你用咩嚟做『退』?

我:「小姐你已經食晒啲藥,我哋冇得咁退㗎喎」

佢:「我知你唔會退足三百俾我呀,你退返一百俾我得㗎啦,退個差額啫!」

我:「我哋唔會咁退㗎,你睇又睇咗醫生,藥又食晒,過咗幾日話第二間平啲嘅,我哋唔會因為咁而退啊,第二間收費係點唔關我哋事嘅~」

佢:「我知麻煩到你,我都係麻煩埋你呢次咋。你今次退咗俾我,我以後都唔過嚟你度睇㗎啦,我以後會去平啲嗰間㗎啦,你今次退俾我啦」

既然你都唔會再返嚟,我仲需要理你嗎?

我:「我哋唔會退啊」

佢:「點解呀?另一間平一百喎」

我:「其他診所收費係點唔關我哋事嘅~」

佢:「唉,即係財到光棍手啦,做得醫生都咁樣呃人錢嘅,因住呃埋呃埋唔夠錢醫自己呀!」

 

嘟。

你都係棍,搞屎嗰隻啫~

延伸閱讀:

診所職場事【寶豬趣聞】容易感冒

診所職場事 寶豬趣聞 容易感冒 珍寶豬

【診所職場事】有日有位太太嚟到診所~
佢登記後唔願坐低等,一直企喺登記處側邊。

撰文:珍寶豬

一睇佢個樣就知佢好多心事想搵人傾,佢終於忍唔到口:「姑娘呀?平時呢度多唔多人睇呀?」

我望望佢:「都係咁上下啦」

佢:「你哋開咗好多年啦?」

我:「喺度五六年左右啦」

佢:「我聽講我哋呢附近有明星住」

我:「係咩~我唔係住呢頭冇留意」

佢:「咁你哋有冇見過明星入嚟睇醫生呀?」

你記者嚟㗎?
我:「唔好意思呀太太,有咩人嚟睇過我係唔可以講你知㗎」

佢:「你唔駛同我講係邊個㗎,我自己估,你擰頭點頭就得㗎啦,當玩遊戲咁」

我冇興趣同你玩遊戲。

我:「你去坐吓等睇醫生啦,唔好意思,我仲有嘢要做~」
佢:「講幾個嘅事嚟聽吓呀,你唔駛直接講係邊個㗎嘛」

我:「我真係冇料爆你聽呀」

佢:「我聽人講有個嚟睇過婦科㗎」

我冇出聲。

佢:「係咪乜乜乜呀?」

我唔理佢。

佢:「嗰個姐仔呢,佢係咪下面有事呀?你有冇咩講嚟聽吓呀?黑唔黑呀佢?」

我:「太太呀,你咁關心其他人嘅嘢做咩呢?你自己都係唔舒服嚟睇醫生嘅,我係咪又可以貼街招將你啲私事病情講俾其他人知呀?」

佢打個突:「做咩咁惡喎,佢哋明星點同呀,公眾人物嚟嘛」

我:「人哋做明星就要咩都揭晒俾你睇㗎咩~邊個嚟到診所睇醫生嘅,個身份都係一樣,都係病人啫。邊個病都一樣㗎~」
佢:「我又冇叫你直接講係邊個,我估咋嘛」
我:「估嚟做乜呀?」
佢擰轉面慢慢行去坐低:「估咋嘛」

估你條命呀。模稜兩可咁估估吓,估到上火星都得㗎啦~打爆你屁股呀!

延伸閱讀:

診所職場事【寶豬趣聞】成為有錢人 上回