龔成問答信箱(Q201-Q240)

龔成問答信箱(Q201-Q240)

Q201:澳門賭業好似差不多見底,成哥你有咩睇法?

龔成:對澳門賭業來說,呢個冬天相信是尾聲,如果是長線投資的,其實一直都無驚過。

我近一年一直話金沙(01928)可入,這是賭業的冬天,我會分析一點:金沙會否過唔到冬天?當然唔會。係賺多與賺少的問題。冬天總會過,春天總會來,好正常。

識投資的人,一定係冬天入貨,同埋會慢慢入,雖然唔會估冬天幾時完,但啲貨一定係平,只要有耐性等收成就得。入咗貨之後可能再跌,同埋有好多壞消息,但長線投資根本唔會驚。你可睇我的舊文,詳細分析了金沙。

———————————————–

Q202:可以邀請你為我的組合給一點意見嘛?178、388、688、700、939、992、1816、1928、2318、2669(大多帳面蝕10%-30%)

我不打算加入資金,甚至有機會會抽走資金去置業(盡量不抽,如不夠才抽)所以處於滿倉狀態,我已對自己承認這個股市CYCLE處理得錯了步伐,因此原本打算一動不如一靜,靜待市況回升,去到下一個相對熾熱的時間才SELL 70%-100%。

有想過賣出700和688轉2388/6仔OR3仔,另有點猶豫,好不好加345維他奶,你認為應該應該接兵不動,還是換一下倉好?

龔成:記住,唔好用自己的買入價作為何時沽出的指標,不要以回了本才放,或不要以賺了多少就放這心態去投資。

我不建議短炒,所以從長線投資的角度,要分析該股往後是否有前景,以及現股價是否已反映了這因素,即是現價是平或貴。

以騰信控股(00700)來說,有前景,因行業發展仍大,但價格太貴,市盈率過高,同時行業變化大,有潛在風險,所以表面看有前景,但現價卻不平。

又以莎莎(00178)及金沙(01928)來說,早一季壞消息不斷,股價不斷下跌,行業處不景期,但兩間企業都有品牌,有質素,有足夠的現金,不怕寒冬期。中短期投資當然不利,因仍有可能跌,但長期來說,行業總會過寒冬,所以之前的股價會以便宜去形容,因為兩個都是處於賺錢的行業。

坊間經常用買入價為何時沽出的標指,這是十分錯誤的。沽出是由於這股已偏貴,又或沒有前景,質素有問題。因此,建議沽出前景較一般的企業,而維他奶有質素,可考慮。由於你有置業的打算,建議多留現金,因樓市下跌中,有可能買到平貨,但本人不認為樓價會大跌,故這會是一個機會。

———————————————

Q203:成哥,多謝你之前的回覆,謝謝你的建議。我現在做政府文職,唯一好處是穩定和有增薪點,但我當然想找人工好些的政府工,不過競爭好大。

雖然我有學歷,但我能力不高。我不知道應否繼續嘗試考其他政府工,還是花時間學投資。因我要花時間教養2歲的小朋友,所以時間不多。曾經想過放棄唔再買股票,因為我好像沒有這方面的天份,很難透過股票賺錢,但看過你的文章知道每人都要投資。

以往我心急想增加資本,聽人講number就買,結果大都是蝕錢離場。現在買了港交所,中移動,工商銀行,建設銀行,但都是大跌市之前買的,都買貴了。資金有限,每隻股票唔買得多,其實我是否應只集中1,2隻股票?還是分散投資?請問月供股票是怎樣做的?謝謝!

龔成:以你的情況來說,做好份工,提升工作能力,相信比花太多時間去投資可能更好。你有學歷無能力,咁只要提升能力就可以令到你的人工倍升,能力是可以提升,但你說自己無能力,即是你只是潛意識埋藏左自己的能力,只要你多d主動學習,主動做野,我相信總可以發揮得到的。

因為每個人都有能力,但不是每個人都有發揮能力的信心,試下出去上一d提升自信的課程,又或是每天對鏡自我激勵(我每日都會做),你就會發現你可做到好多野。唔好比籍口埋沒左自己。

至於投資方面,其實可能較少時間的穩建投資法,例如月供股票,每月供盈富基金,又或是優質股。以你的能力,是要適當地分散投資的,你所買的都是不差的股票,只是時機問題買貴了,雖然可能要守一段時間,但守到的。不過,你在高位入了貨,證明你未必掌握到捕捉高低的能力,所以就要用剔除這風險的投資策略,分注入,月供股票,就是當中的方法。

———————————————

Q204:其實我都係想相信長線價值投資, 但睇返, BUY AND HOLD 0係HK 好似唔係好WORK, 呢幾年HSI有波幅無升幅…所以我都好猶豫自己應該做一個順勢投資者, 升時執10% PROFIT就走, MINIMIZE D 錢0係STIOCK MARKET 0既時間好, 定係做一個長線價值投資好?

龔成:巴菲特用左60年時間去證實長線投資有效,我是一個極現實的人,邊個證實到佢的方法賺錢,同時入經歷過多次股市週期都可行的,我就跟佢。坊間有好多方法短期都會賺錢,但過多幾年就唔見晒,信邊個,自己諗。

———————————————

Q205:本人於近年買入了多個物業,2017,2018才到底年期,所以現在根本不知就道如何?因為我也睇到外圍經濟並非咁好,未來更差機會更大,對樓市的壞因素亦不繼增加。

龔成:其實物業只要供得起,基本上已守得到,就算不幸負資產,銀行唔會收樓的。所以,關鍵是供得起,守得到。

因此,除非出現供唔起的情況,又或你預期到經濟下跌會令你供唔起,咁就減持一個,政府3年期都分幾個陛段計%,可放左個已持有較耐的。增加流動資金,又可減輕供樓負擔。

———————————————

Q206:Hi,成。想問下你對2016年,內險股點睇呢?1508中再保前景如何呢?

龔成:內險股因有大量的浮存金,令到該公司有很多錢可以投資去賺取保報,這回報往往影響該年的盈利不少,而他們會將一部分投資於國內股市,2016年國內股市升跌我不懂預測,但就認為仍會波動,因此對其盈利都有影響。

而中國再保險(1508)由於是再保類別,賺錢能力不及其他保險企業,翻查其過往的股本回報率,平均在10%以下,這方面不算吸引,不過其增長中的業務可說是亮點。

——————————————–

Q207:2638同0003比較那隻可取?
0003只看10送1 2638又如何?
2638息高 0003送紅股
長期持有?現等加息期股價回調?

龔成:兩隻都是優質的股票,都有長終持有的價值,但性質有點不同。

港燈(2638)只限香港業務,增長有限。但由於收入來源是電費,而香港用電十分穩定,加上有成本轉嫁的能力,即是港燈的盈利已是保證了。

而港燈是信託,其中定立了條款,規定要將股東盈利全數用於派息,所以港燈的股息很高,過往有7厘幾,可惜近半年港燈股價升了兩成,令息率跌至6厘,吸引力下降。過往我都有幫父母儲這股,平均價$5,但股價升到$6已停了,故現價最好最好用分段吸納。

至於煤氣(0003),由於業務包含香港及中國,因此潛力會較大,當然穩定程度不及港燈,但都是不錯的股票。

煤氣每年都會10送1,這會令長線投資者的股數不斷增加,但在實質股權上,由於當10送1除淨時,股價會自動調整,故沒有真正實在的增加。而股的現金股息都有,但其實不算多,以收息的角度來說只算一般,但由於業務本質不錯,長期不斷增長,以每年複息的10送1,令長線投資者能在不知不覺中累積了這股。

———————————————

Q208:成哥,我之前問了有關市盈率的問題,多謝你的回答。你意思是,某股例如濠賭/零售,現正進入冬眠期,而它現在的市盈率比近5年的平均市盈率低為之平?那同業的龍頭股平均市盈率會否是考試因素?還是,龍頭股之間的率差可以很大,不能作準?

龔成:作為長線投資,不會介意進入寒冬,因寒冬市場會給其較低的市盈率,而這正是入市時機。但入貨後可能再跌,同時仍有很多壞消息,但用分注入,長期持有,待春天來臨就可。而我們關心的是,這只是中短期的不景,還是行業長期不利,若是後者,當然不要投資。

龍頭市盈率比其他的高是正常的,因企業的獨有優勢愈多,可接受的市盈率亦會較高。

———————————————-

Q209:成哥你好,請問一下如果要考證券牌,係唔係等於考晒HKSI既14張卷?仲有冇其他野要考?出面又有冇呢D課程可以讀?定係自修已經可?感謝!

龔成:一般來說,基本的考1、7、8,其他的要視乎你做那類別。自修已可,到圖書館借d考試精讀,又或到坊間買本都得,唔貴的。paper1較難,因好多條文要記,7、8講投資市場、投資知識等,不難的。但要注意,考完合格後,要一年掛證券牌的。

———————————————

Q210:成哥,有朋友叫我去XX公司做直銷,想請教你的意見?

龔成:其實做直銷未必一定差,但業界有太多不良分子,所以你自己要小心評估。

我諗其中一個point係,佢d產品得唔得先,如果佢d產品真係有用,有市場,直銷可令成本減低,令到售價吸引,創造雙贏。但如果佢產品一般或唔好,只想為sell而sell,仲要一開始逼你買好多,咁就有問題了。

———————————————

Q211:龔Sir, 多謝你教既倍升課程, 我學識揀股, 在跌市像你一樣入比亞迪, 忍痛放1828 及1133, 換1211。相信優質股在上升時, 表現會較佳, 現時1211升左好多。

痛定思痛, 重組組合, 努力儲錢買股, 並已設立月供盈富基金, 持續努力等待收成, 像你的經歷一樣, 向百萬富翁進發。

龔成:Good~ 但比亞迪(1211)為潛力股,要耐心等待收成。月供盈富(2800)的策略正確,如同儲錢一樣,記得要長線,加油!!

———————————————

Q212:成哥,有些問題想請教你,你覺得長期渣內銀渣十年收息,只買不賣,係內銀既變化出問題後,你覺得現價長渣有無問題?

龔成:現價可以呀,之前恆指28000就有d貴,但現已返回至合理價,但要注意內銀股不要佔超過股票組合的30%,因為太集中會面對金融系統性風險。另外,市況仍波動,唔好嘗試估底,分注入較佳。

———————————————-

Q213:成哥,我已30歲,但對於買股票我仍是很無知,最近才買你的書,要慢慢研究。現在是苦惱人工低,卻又要應付自己小朋友的開支,儲不到錢,小小儲蓄亦鎖死在其他藍籌股上。想請教你有什麼建議?

龔成:或者你需要開源,試下利用網去搞一些生意,例如小朋友的物品之類,簡單地用拍賣網都得。

投資方面,要學,但唔好急,投資一定要在低風險下進行,是一個令財富合理增值的過程,而你已經有家庭,風險就要更低。由於你是初階投資者,故盈富基金與收息股都適合你的,可以用月供股票的策略進行,令買入價位平均。

———————————————-

Q214:若果有物業,但又未過3年禁售期,咁有什麼方法對沖呢

龔成:外國就有,但香港真係好難找到對沖的產品。就算開put地產股,或買地產股的熊證,由於年期配對困難,故對沖系數不大,故不建議。

其實如果物業的數目為一個,可視為平倉樓市,其實不用太理會樓市的升跌。若多於一個物業,除非你好集中在近年買入,否則總會有些較易過3年期。

———————————————–

Q215:你好呀,有d投資策略上既野想請教你,我分別以
0388 $163
1211 $29.2
1928 $29.2
買入這些股票,如果我用每跌20%分注買入這些股你認為ok嗎?

龔成:首先,港交所(388)、比亞迪(1211)、金沙(1928)都是優質股,可儲貨。不過,要跌20%不容易到價的,但若果你資金不多,同時又是較低風險的人,15%-20%仍是適合你的策略。

我一般都以10%-20%為分注策略的每次入貨區,若股價的波動較大,就會相差較多,反之則較少。

同時會視乎我該策略分多少注,因一般地分3注以上,若分注較多,相隔價位可較低。

———————————————–

Q216:成,341,43,1299點睇呀?

龔成:大家樂(0341)其實不差,但以賺錢能力來說,我會偏向大快活(0052)都於大家樂,因大快活專注於賺錢能力較高的快餐業務,而且市值比大家樂細,值博率會較高。

卜蜂國際(0043)真係無睇過,見諒不胡亂分析。

友邦保險(1299)唔錯的,保險企業賺錢能力比一般企業強,加上友邦有一定的品牌,成為價值的重點,近幾年的盈利都能保持上升,不過要注意,市盈率約20倍算是中等。

———————————————–

Q217:香港中華煤氣無利潤管制,而且香港只得佢一間公司供應煤氣,比起港燈,煤氣是否可看高一線呢?

龔成:我認為煤氣(0003)是高一線的,港燈(2638)的增值很有限,只單純收7%息。但煤氣則有增長的能力,長遠的複息回報較佳,不過,由於有10送1紅股,故股東會在資本增值中反映,而現金股息則不多,只有2、3%。

———————————————-

Q218:多謝成哥協助,我而家係一名咖啡師,今年17歲,現有120,000資金在手,因為我都打算用長線價值投資法置富,所以我打算邊做野邊儲蓄,慢慢學習尋找優質股再買入,不心急,而我的目標是26歲鎌1,000,000。多謝你本書!

龔成:加油!意念成就事實,只要你定出26歲有一百萬,而你真心向這目標進發,你就一定能做到!

我23歲定28歲有一百萬,因為我肯定目標,同埋我真係去做,所以做到。我個fd係19歲定25歲有一百萬,因為佢肯定目標,同埋佢真係去做,所以做到。

一百萬真係唔多,所以只要你肯定目標,就無理由做唔到。到你有一百萬流動資金係手時,你到時運用資金就方便好多,條路會好順,加油!

———————————————

Q219:成哥,細佬係80後讀者,明白投資的重點,但我之前未接觸過股票,睇到你D股票分析既文章,同埋公司年報,細佬完全睇唔明,更加唔好講去做獨立分析,因此已無哂置富的信心,因為個人睇完80後認為最重要同最困難的是尋找同分析優質股。

龔成:係,因為《80後百萬富翁》只係基礎,而我平日po好多文都係實戰,有d地方可能會有d深。其實我已經寫緊第3本書講財務自由,同第4本書講投資股票,令到讀者可以一步步學習。不過仲要d時間。

我諗你而家咁,睇多d致富書,投資股票只係致富的其中一個方法,你賺多d書會開到個眼光。另外亦要睇多d巴菲特的書,你睇睇下就會掌握到d野。

而呢個時候,你唔好太心急去找倍升股、優質股,反而投資盈富基金、收息股一類較低風險的股票,同時要分段吸納,打好個底先,一邊有實戰經驗,一邊再睇書增加投資知識。

———————————————-

Q220:成哥,想請教一下,債券是否避險的產品。經濟差,債券價值是否會上升。

龔成:債券分好多,好難全部講。不過在加息期,要注意一般的債券價格會下跌,因為債券的利息不變,在吸引力減少的前提下,價格自然下跌。

———————————————-

Q221:成哥你好,之前有機會拜讀你兩本書,獲益良多。由於呢排為末來計劃中遇到一d問題,所以想請教下你。

其實我想問,真正既有錢人會係咩時候買樓?我明白係睇時機,但我所謂既”時候”, 係指當財富去到幾多既時間,先係考慮買樓既好時間?

##因為當選擇左買樓,原本可以用黎投資既資金就會放左落首期,達唔到”錢滾錢” 。但如果要單靠被動現金就儲夠首期,雖然唔係唔可能,但需時較長
咁到底,謝謝。##

龔成:物業是其中一種錢搵錢的資產,所以當你將資金投入物業中,其實都是進行增值的過程。另外,物業有借貸作用,只要借貸成本(息率),少於物業升值及租金回報,這部分借來的資金,就是在創造利潤。

有錢人視物業為資產,以儲的心態,以累積的心態,除狂市時的高樓價不買外,其他時間有錢都會入一d,但不會一次過入。其實佢地做的野,是將現金轉成資產,不打算賺買賣差價,著重長期持有。

最理想當然是在低價時買入,因低價時買入不止有得好的回報,升值的部分更高作財富的套現(如加按),將資套出的資金去創造財富。不過,要捕捉到低位其實好難。所以,以平均成本法,每隔某年期便買一層樓,買入價格細的單位,這可減少一次過高位買入的風險,當然在樓市高的年代,並不易做到。

———————————————-

Q222:龔成兄:小弟日前接觸到技術分析股票走勢和買賣時机。但你話過不會用到。咁價值投資法,用技術分析是否不太适用呢?

龔成:雖然有唔少人會將這兩套方法配合用,但個人則唔會這樣做。而我所用的是純為價值投資法。

其實係十幾年前,我勁鐘情於技術分析,好鐘意分析圖表(或者我數學科欏A,對d圖特別like),於是有一段好長日子不斷研究d圖,同埋將過往股價程式化,去嘗試預測將來走勢,可惜最終都係唔work。其後完全放棄技術分析後就開始持續賺錢……

如果你研究下d投資真係賺錢果d人,你會發覺無人用技術分析……

加上憑投資賺最多錢的巴菲特,都話技術分析唔work……

———————————————-

Q223:成,最近個經濟環境唔好,你會怎樣面對?

龔成:經濟唔好?其實唔多覺。我自己各方進度都好理想,呢d經濟環境同金融海嘯的差法無得比,更可況,金融海嘯時我都完全無事。加油啦!心態決定一切!

———————————————

Q224:龔先生,感謝你用心寫書出書,雖然我已30歲,最近才買你的書,獲益良多。現在是苦惱人工低,卻又要應付自己小朋友的開支,儲不到錢。

雖然我有學歷,但我能力不高。我不知道應否繼續嘗試考其他政府工。因我要花時間教養2歲的小朋友,所以時間不多。

關於能力,我有很多迷思,有些人好像天生聰明些,我先生認為我蠢,所以睇死我,叫我認命,安守本份,但我不甘心。請問是否肯努力,能力便可提升不少!可是我就缺少了恆心,決心和信心。你是如何做到的?

龔成:你先生在限制你的成長,但你唔好同佢爭辨,只需做比佢睇就得。

每個人的潛能根本好巨大,但問題係有無心去開發,我出左書後,有幸接觸到好多成功人士,佢地的共通點係好有自信,相信自己做到,相信自己會開展到某種能力。

根本好多野每個人都做到,問題係我地我無心去做,太多人未做就睇死自己唔得,但唔試過又點知。當然,好多事唔係做一次就得,所以恆心就係當中的關鍵,如果你認為人地做到係一下就得,咁你就錯,我見唔少創業者都係失敗左好多次先成功。你估佢day 1識創業咩?一樣唔識,仲做多好多白癡野,但有咩問題呀?佢錯,佢肯修正,先敗左,唔會放棄,只係一心向前,一心想成功。

所以,我見你有「唔咁心」係個特質,我先同你講咁多野來激勵你,因為我知你想做,但唔敢去做,你只係唔夠相信自己,同唔敢去做。你有好好的背景,點解唔好好運用?多d主動那學習,開發能力,唔怕你錯,最怕你唔敢去試,能力真的可以開發,我見得太多,你加油啦!

———————————————-

Q225:成哥,我正月供數隻股票,但本小,怕成效未能短時間半年1年才有。月供0003、0011、0066。平均1年2手才有一手,本金小,供3隻股票分攤了本金。但這進度自己一直懷疑效率,成哥,可給予意見嗎?

龔成:組合是可以的,而每個人按自己的情況做到最好,而你已做到這部分。另一問題是本金較少,這只有從找尋其他收入方面著手,因我不會建議人靠投機炒賣去增加本金,而是建議合理增值。

由於月供股票模式已是自動模化的模式,你已不用為投資太用時間,所以餘下的時間可思考其他賺錢方法,以增加額外收入,相信這對你來說是最理想的。

———————————————-

Q226:成哥你好,我想問,當您買入一隻股票您會點計算木標價呢?,,您不會永永遠遠去持有一隻股票,,,總有一天需要買出ga時候您會用d咩計算方法?or..,點洞識是正確的時間出賣呢??

龔成:我不會有明確的目標價。我沽出基於幾個原因:

由於我買入的是優質股,若買入後發現自己犯錯,這股不是優質股,又或這股核心的質素轉差,變成非優質股,這時無論賺蝕都要走。

又或是市況過熱,市場處牛三的狂熱狀態,例如復活簡後的狂熱時,我便用沽多於入的策略,但當時的市況不是極度狂熱,所以我亦只是沽了一部分的貨,不太多。

股價處over value,例如狂熱市,或自身的原因令股價爆上,都有可能放。

其實,如何你無法掌握到上述的,可用升一倍放一半的原則,等同收回成本,餘下的貨就不用再理會,長期或之遠持有。

——————————————–

Q227:想問自己住緊的樓是否叫資產?現在話有逆接揭,是否能產生cash flow呢?我衰心急,在較高位6.5元入左10万港燈!派息是幾多?10萬的5%?

龔成:從現金流上,自住樓不是資產,但供到咁上下,因為可以利用按揭套現等方法利用,故以亦可視為儲錢,並利用逆接揭創造現金流,但不是每個人都適合。

港燈一年派兩次息,兩次合共計有6、7厘,不理短期股價,收息極念,相信是理想的。

其實很難捉高低,所以我先強調要用策略,例如設計投資組合,分注買入股票等。

———————————————

Q228:成哥你好,我是你的讀者,你的書像同我說話一樣,而更是從來都無人跟我講這些說話,很欣賞你咁用心去幫人,謝謝你。

聽你一席話,原來每人都有無限可能,我要努力,謝謝你!!支持你繼續出書,惠及更多有心人,也希望你各方面順順利利!

龔成:我出書後有幸接觸到好多成功人士,發覺佢地不是天才,卻是相信自己得、堅持、好努力的人,所以你繼續加油啦,我相信有心睇我書的讀者,都是想進步、想成功的人。問題是有d未踏出這一步,add oil!

——————————————–

Q229:其實儲蓄理念方面我同你已經好相似,不過我係投資方面出現好大問題。

我簡單講出重點就係,我試過兩次借錢炒股,第一次仲讀緊書,輸50k(還完錢之後bal=$0)。過左幾年到今年第二次借,再輸多100k,假設還晒錢,只係得返70k,我對投資好似已經冇晒信心,我想問有咩正確的方便去重拾信心然後再作出一些理性的投資。我會追實你個page,慢慢覆;)

龔成:我係十幾年前,都試過3次接近Total Loss的經驗,好彩呢d在我後生時經歷,令我明白咩叫正確投資。另外,如果一個人到中年先經歷「遲來的Total Loss」,由於已有一定的生活負擔,所以殺傷力會好大。如果從吸取經驗的角度來看,你是有賺的。

其實,無論做人定投資,心態先係最重要,我唔係叫人死守錯誤的投資,而係明白投資總有得失,只要我地保持正確積極的心態,不斷吸收教訓,進步,學習正確的投資,錢總會賺翻來的。

我十幾年前好鐘意投資炒賣,可惜幾年來輸多贏少。之後狂睇投資書,發現憑投資真正賺錢的人(不只吹水果班),而係真正靠投資賺到過十億果班,都係以平穩增值去致富,即係視買股票如買公司,做足功課,耐心等入才買入,並持有多年,獲取高回報。

之後我就一直跟呢套方法,將財富合理增值,十年間贏多輸少。投資是一場馬拉松,不要著眼短期得失,而要建立一套長期能助你真正獲利的方法,而你的2次錯誤經歷,已是助你明白真正投資的基礎。

———————————————-

Q230:成哥,我是你的讀者 先後閱了80後百萬富翁的著作 但仍不知該如何入手去分析。本人應如何起步去學多d投資知識?垃間的投資班可取嗎?同埋未知閣下會否不停期開班給予投資新手報讀?

龔成:你可睇多d投資書(係書,唔係雜誌),雜誌只是資訊的參考,書先係真正的知識。

你可到坊間上堂都可,有好多投資班,但建議你睇多d書,知道咩先係真正的投資先,因為坊間有好多錯誤的投資方法。

你可留意fb或網,我有課程的到時會po上fb話比大家知。不過fb好麻煩,一個po唔係所有人都睇到。

———————————————

Q231:你好,小弟於拜讀 閣下一書後甚感敬佩。但不懂投資,亦無甚專業知識。惟憶起 閣下一書提及盈富基金(2800)。故現著手研究,小弟想問此股現時價值$19,請問還有下跌空間嗎。又,何時才是入市時機?希望 閣下能不吝賜教,謝謝

龔成:其實在盈富(2800)在$20以下已可買入,但你經濟較少,因此不宜太注,建議用分注或月供股票的策略,並要長線投資。另注意近期股市波動,要先預留防守的現金,而當買入後若股價再跌,不要恐慌,因長期持有不在乎。

———————————————

Q232:成哥,這前聽你講話買盈富不錯,但其實我有點猶豫…因為佢係跟HSI走…但如果我係因應 HSI 而去訂立出入策略, 其實可以考慮用另一隻優質股388去進行…1來BETA 大D, 2來每日HSI成交量可以為我地提供價格預期…你點睇呢?

龔成:我唔會做中短期的價格預期,所以我不用這套。我簡單來說啦,盈富風險較低,股價波動較低,預期回報較低;港交所388,風險比盈富高,股價波動較大,預期回報較大。

兩隻都唔差,但如果你對價位的捕捉能力較強,就港交所,但若然風險承受能力較低,就盈富,其實好睇個人的能力及風險偏好。

———————————————

Q233:你好阿成,請問你對1970 imax有何睇法?我係45蚊入,打算長放,因為imax 電影越來越多,而且屬半新股根據美股imax亦有盈利增長,在低位買入長放會否不智

龔成:IMAX CHINA(1970)係IMAX品牌的獨佔性許可人,及上映IMAX格式影片的唯一商業平台,品牌及市場令佢點都有價值,問題係呢d同娛樂有關的行業,一般都比較波動,盈利未必穩定,雖然有潛力,但不建議大注。

另外,佢上市不久,本人一般都不會投資上市未夠2年的股票,因為要合法地修飾上市時的賬目,等上市可以賣貴d,是很自然的事。佢上市不久,未有市盈率出到,但以過往的盈利,以及現時的市值推算,是處於高市盈率水平。

———————————————-

Q234:成, 個市由上年28000跌到22000點,這反映現實會咁差嗎?

龔成:股市反映將來,所以遲d會見到,但之前高位有泡沬,所以不能單比較高位。不過跟據過往的歷史,每一次金融市場都是過渡反映的,無論好壞都是。

———————————————-

Q235:年頭個市大跌,近期回穩,有點上升情況,想請教,是否一定會牛3升至泡沫後才來?因為我覺得自己係識入而唔識出?

龔成:關於牛熊的問題,你睇翻我之前的文,【牛熊頂上對決】,已解釋了你所問題。簡單來說,就係唔一定順次序行,同埋唔會估接下來是甚麼市況,而只會被動地當市況處某狀態,就去做某策略。

例如狂熱市會用沽多於入的策略,呢個我在15年5月的舊文有在fb po的,講到明會沽多於入,但當時未見極度狂熱,所以坦白講,我自己都只沽了部分。其實作為長線投資,從不擔心。

——————————————–

Q236:成gor,我想問你對1371既睇法,我之前以0.38入,現在跟隨大市下跌了不少,後市應如何操作?謝謝

龔成:華彩(1371)呢隻股我唔會買,因為好好好多散戶炒,凡多散戶炒,而又不算大的股票,股價都會好波動,難以計算其中價值,以至股價很易舞高弄低,好易被炒高,而炒高的一刻一定會配合消息或「專家」吸引散戶買入,好危險。

相信你餘下的是尋找中短期的波動,但這方面不是我的強項,因我只投資長期有價值的股票,相信你會找請教這方面的專家。

——————————————–

Q237:我有睇過<>, 當中有提過以物業為asset去賺取租金以及等待升值,但以我理解此部分物業都係用來投資而唔係自住,因為如作者咁講:物業自住係負債而唔係資產。

我相信人總需要個家吧,就算萬般不願意,巴菲特都買入左自己既物業自住(雖然有不斷升值) 咁到底到幾時我地先應該買樓自住?

龔成:而家樓價略高,你儲定錢先,如果有足夠的首期,若3年內樓價出現回落,可購入作收租先,到自己真正有需要時,就可用作自住。

樓價中短期可升可跌,但長期一定上升,這是因為現金是必然貶值的單位,而同現金對立的資產,例如物業,長遠是必定上升的。

正正由於長期必升,所以愈早買其實愈好,買了後先收租,有用才自住。

———————————————-

Q238:雖然今年地產股唔被睇好, 不過20號會德豐 你覺得潛力大唔大?

龔成:雖然市道未必好,但長期計(即3年以上),香港的地產終有價值,所以只要長線投資就可,因為香港本質土少人多,土地一定是有價值的資產。會德豐(0020)的每股資產淨值有$90,比現價有一定折讓,雖然每股資產淨值不代表真實價值,但都反映現時股價不貴。

———————————————-

Q239:龔成兄,請教零售股好多已去到7厘息以上(738 483 592 1382),請問你有冇相關文章分析零售業? 或者你點睇以上既股票?

龔成:零售業過往經歷了上升期,到近期又經歷下跌期,而生意好的時候往往會派較多的股息,但由於零售是有週期的,所以單憑好景的股息,去推算往後的回報,這就會有點問題。

由於息率是以剛過去一年作基準去計算,所以這個計算方法要作出調整。例如你可用過往5年的股息,計算平均數,再以現時股價看有沒有5厘的股息,相信這更能反映零售股在不同的時期,所派的股息是怎樣,以及是否吸引。

同時你亦觀察過往幾年的生意、盈利、股息,從而預計,若零售業的生意回落正幾年前的水平,以現時的股價計,是否有吸引力。

———————————————

Q240:成哥,近年人民幣眨值不少,令我手中四隻國有內銀跌左一部分,到底今次眨值因素係咩?會長期眨值嗎?還是長遠跟得番經濟增長現實?仲有,平均4點幾pe,真係幾吸引。應該再分注入?我只怕人民幣眨值二三年不改善?

龔成:人民幣下跌帶出了一個訊息,人民幣不是只會升的,而這次下跌亦是轉勢的信號,雖然我唔預人民幣再跌好多,但要上升已困難,同樣,市場已不期望人民幣上升。

一隻貨幣預期佢唔會升,比你會唔會買?即是買的人少了,而銀行要吸收人民幣資金難了,或許要以更高成本才能吸引到資金,令賺錢少了。這成了其中一個令內銀下跌的因素。

內銀一向都低市盈率,這是由於內銀壞帳不少,從而令往後盈利變化大,亦對其有點大能盡信的態度,故對其估值一定會打折扣。

最大果幾隻內銀,終有一定優素,可分注入的。

———————————————

多謝各位提問,若然你有問題想向本人發問,可在本人的facebook專頁中(www.facebook.com/80shing)inbox我,但要注意如無特別聲明,我有可能將問答放上網的,當然,我會將發問者的身份,以及有關個人的部分刪去。

另外,由於提問人數眾多,見諒我無法即日回覆,如果是普通的提問,預我起碼要3天以上才能回覆,若然是較複雜的提問,起碼要1星期才能回覆,希望各位能諒解。

相關文章