大學生揸$7萬想學投資 起步可先揀穩健增值工具｜月供股票｜龔成信箱
撰文：龔成 ｜圖片：新傳媒資料庫、unsplash
1.買樓
龔Sir你好。我今年21歲，讀緊書。現時儲蓄戶口有$7萬現金。我冇任何投資經驗，但睇完你個page之後有興趣想學，希望趁年輕儲多啲錢買樓。
短期目標係25歲賺到30萬
龔成老師：
你的方向正確，年輕時盡早開始投資，並學習知識，這你長遠財富會有好大影響，但你不用太心急去投資，這刻先從較穩健的開始，同時努力學多啲知識先。
如果你每月都有一定資金剩，可以去銀行做月供股票，盈富（2800）是適合你的。另外，你手頭上的$7萬，都可以動用其中的一半，去投資穩健增值類的股票，這刻可以投資盈富先，分注買入就得。長線投資。要做到25歲有30萬，不難。
反而你這刻年輕，初期資金不算太大，可以集中力量提升知識，對將來財富會有好大的影響。
到你有一定的知識與經驗後，就可以自行選股，以及利用投資時機的把握，提升回報。
（對照龔成信箱：Q7453）
2.衍生工具
你好，龔成老師，我現在已買入：
3（煤氣），一手14.98《應幾時再加注
2638（港燈），一手7.93《應幾時再加注
1883（中信），兩手均價2.22
268（金蝶），一手9.4《《貪心於太高位買入
1030（新城），一手7.09《《地產股還能留嗎
1177（中生物），一手13.32《《止賺後放剩一手，還應繼續留住嗎？
我人工每個月大概24000, 租屋每月4000, 一直不知道每個月存多少, 銀行活期大概18000, 定期30000, 上面的股票9~10萬左右, 上月於牛熊證輸了30000..
1) 以後我每個月應該存多少錢
2)應分配多少錢買股票?
3)如果我希望32歲之前置業, 有機會嗎?(今年27,已婚,女性)
4)以上的股票,有需要於現在的時間止損嗎?或者加注嗎? 因為我不是月供股票
5)如果我想56元購入27(銀娛),75元購入23(領展),合理價格嗎?謝謝老師~~
龔成老師：
不要再玩衍生工具了，長期一定輸多贏少的。另外，試下每天記低自己洗左幾多錢。
1）最好每月儲到$12000。
2）如果能儲到$12000，以現時的市況平貴，可將5、6成投資股票，其餘先儲現金。
3）可以，但要再加強儲蓄先得，同時要好好學投資，提升回報，就有機會做到。
4）基本上都可以持有，當中的質素不算差，只是有些股買入價略貴，持有就得，有得守的。
煤氣（0003）可加注，但好難跌得多，分注買就得。港燈（2638）亦可加，但好難跌得多，分注買就得。新城發展控股（1030）只能小注。中生製（1177）之前估值略貴，這股可加注，但最好回多少少先，但現價仍不平。
5）銀娛（0027）合理，但由於股價波動，分注較好。領展（0823）則略貴，但這股經常都處貴水平，要落去好難，所以只要分注入，都可以的。
（對照龔成信箱：Q7452）
3.月供股票
老師你好，想問關於月供股票的事。
小弟今年24歲，每個月扣除家用，有大約14000元，打算撥出其中6000元月供4隻股票，均是一些增長型企業為主。
暫時打算
1500 中電
1500 領展
1500 長建
1500 北控水務
原本打算供煤氣的，但女朋友供了，想分散風險，於是供了中電。請問你對上述計劃有何看法呢？請問月供方面，除了北水，萬洲及中生製藥，都是好選擇嗎？
另外小弟手頭上有些股票，你覺得仍可持有嗎 ？
中國同蝠 IPO價
奧思集團 1.24
雅生活 14.7
中海油服 8.3
龔成老師：
原本所供的股票，基本上都是有質素的，你保持月供就得，而每月$1500都適合的，不過因為金額不算大，所以要較長時間先儲到較多的股數。
而中生製藥（1177）是可以選擇的股票，這股有質素的，不過股價長期略貴，以月供模式去投資這股最好。萬洲國際（0288）則中等。
中國同輻（1763）不過不失，但上市不久的股票好難分析。持有可以。
至於其餘3隻，都可以的，但質素不算最高。持有都可以的，但未必值得持有太多。
（對照龔成信箱：Q7454）
4.和諧汽車（3836）
老師。想知3836同2389係咪無乜前境？我已經帳面虧損50%，觀察左一段時間，好似冇乜能力上反去咁。
我諗緊黎緊轉組合。
入573，作收息，見佢過去幾年好似都平穩。入2800，穩定投資。老師點睇？
龔成老師：
和諧汽車（3836）不是無質素，這股有得守的，佢行較高檔路線，對中國經濟及汽車市場一定較敏感，你要耐心持有先得，預佢中短期都未得，但長遠仍有前景的。
北控醫療健康（2389）質素不太好，這股業務波動，盈利不穩，這股可考慮轉其他股，如有轉大反彈可賣出。
稻香控股（0573）收息可以，但就不要對股價有太大的期望。
盈富（2800）當然是穩健的投資，長線持有無問題。
（對照龔成信箱：Q7455）
5.工行（1398）
工行中行息高，而且昨為世界第一大行，五年內可望成為另一個影響恆指升跌的走勢，估計其價值可上70$
不過奇怪是工行市值為什麼在H股只有5000億，昨為全球最大行，和建行分別好大
龔成老師：
工行（1398）的總股數為3500億股，而當中的H股只佔860億，而一般的財經報價機，「市值」只會計算H股部分。所以，佢真正的市值，已經是$20000億。
要一間規模咁大的銀行，股價上升10倍，市值要5年去到$20萬億，可能性好低。
至於建行（0939），佢發行的總股數，基本上就是全數的H股，所以股票機的「市值」能反映真實情況。
（對照龔成信箱：Q7456）
6.倍升股
你好
1.請問阜博3738有無潛力成為倍升股？打算strong hold, 3.41買入
2.成日聽你提買2800， 我又不想月供， 現時個市又咁衰， 現價應唔應該入2800？長遠策略是不是逢低位入
謝謝
龔成老師：
1）阜博集團（3738）係線上視頻內容保護服務供應商，客戶包括七大全球電影公司、電視網絡公司及其他內容擁有者。業務算是不過不失。
但見佢的盈利有少少唔穩定，同埋佢之前都只係一年賺$200萬美元，公司都幾細。只可以話有風險有回報，不太建議大注。
2）「個市衰」並不會影響當中企業的價值，反而大市由之前的高位（貴），回落現時的合理區，可以分注買入。
（對照龔成信箱：Q7457）
7.手續費
老師你好，睇左好多你的文章，對月供盈富基金有興趣。想問一般月供1000，扣除50手續費後，大概幾多年會回到本或有賺?
如果想 hold 大概5、6年然後全數沽作首期一部份是否建議?
龔成老師：
月供股票是一個好的方法，但成本太高就會好影響回報，如果供$1000要收$50收續費（即是5%），我認為是過高，你可以比較下不同的銀行，睇下有無平D的收費。
另外，你可以考慮加大月供金額，如果供$3000收$50，我認為可以勉強接受。
如果真的找唔到，建議你以分注的模式，即是儲到一筆錢後，入一手，再儲到後又入一手，這樣雖然平均風險能力較弱，但也無辨法。
如果5年後，作為首期的一部分，可以的，但具體要睇到時的股價表現，以及樓市的情況。
（對照龔成信箱：Q7458）
8.止蝕
你好 龔成老師 本人持有易鑫 同運興泰 2隻股 也是招股抽回來
但易鑫就屢屢尋底 運興泰上星期發盈喜也升不上 交易量有時一天也沒有一單 是不是應該放棄持有 止蝕
龔成老師：
其實你計計企業估值就會明白。
易鑫集團（2858）未有盈利，每股賬面淨值只有2.4人民幣，當然，這類企業未必太睇資產值。而預期佢之後有盈利，以預測市盈率計，都有50倍以上，現價仍然不平。
運興泰集團（8362）上市前有錢賺，之後就出現虧損，質素不好。就算以佢上市前的盈利為基準，一年只賺$400萬，就算以現時的股價計，市值約$1.6億，點計都貴，每股賬面淨值只有$0.088。
簡單來說，就是股價跌了不少，但仍然有少少貴，加上企業的本質一般，所以，賣出是最好的策略。
（對照龔成信箱：Q7459）
9.意外保
龔先生你好! 我有啲規劃想你比啲意見
26歲 月入約30,000
現時有學貸(14萬)
借左啲錢比朋友(10萬)
供緊兩個大陸車位(50萬)預計2022年完 + 家用(2萬)
近期想買份意外保
1. 想利用30年以月供股方式，為之後財務自由提早退休做準備
Q:1).我應該全部投資優質股 OR 分散優質股、潛力股、債券(明智之選?)
2. 我計劃5~8年買樓,e+d錢又應該點分配呢?
3. 近期想買意外保，方向應該係買 [意外+儲蓄] OR [消耗式(利用買儲蓄的錢去做月供)] 呢?
我一直都好想達到財務自由，但一直都唔知應該點做，早兩日睇到你D片就開始諗點做
龔成老師：
1）以你的年齡情況，仍可以有一定的增長能力，因此可以投資「潛方股」+「平穩增值類」的股票，作平衡分配，但潛力股要有一定的投資技巧，你最好多學習先投資。
暫時可以月供盈富（2800）或其他優質股先，之後再分配在潛力股部分。至於債券，對年輕人來說並不適合。
2）你照上述的模式分配就得，因為5-8年都不算好短，可以把握這段時間去盡力財富增值，投資股票能在這段時間內發揮作用。到之後物業市場回落，又或到你累積到一定的財富後，就把握機會買樓。
3）不用有儲蓄的成份，因為你簡簡單單買一份已得，餘下的資金，就可作投資。
要財務自由，可以一步步進行，「先增值，後現金流」是基本的方法，因此這刻可以集中在增值部分先。
（對照龔成信箱：Q7460）
10.美圖公司（1357）
老師你好，可否俾啲意見，我很久前入了1357美圖，平均價約13元，9000股，又不甘心大蝕咁放， 也有吉利175 ，平均23.3 六千股。
你怎看它前景？多謝老師先
龔成老師：
美圖公司（1357）其實有點麻煩，你睇翻佢的財務數據，多年來都是虧損狀態，燒銀紙狀態根本唔知幾時完，這類公司好難玩。因為企業的價值大部分來自「期望」，而這類估值，往往得個估字，如果佢的業務仍是這樣，相信有排都上唔返去。
比較令人擔心的，是佢一年做40億生意（無盈利），但現時市值有成$250億，即是這刻仍不算平。
至於吉利（0175），這股有前景，本身有質素，只是之前估值過高的問題，可以守住先。（對照龔成信箱：Q7461）
延伸閱讀：
月儲$1萬 想1.5年內有$25萬 可揀呢4隻股做月供
