診所職場事 【寶豬趣聞】 從中生利 ｜珍寶豬
我：「點解要咁多呀？你去旅行環遊世界呀？」
佢：「唔係呀，我想拎去俾人呀」
我：「俾邊個呀？你呢啲血壓藥唔可以亂俾人食㗎」
撰文：珍寶豬
佢：「我唔係傻嘅，我去俾醫生仔呀」
我：「邊個醫生仔呀？」
佢：「過幾條街藥房嗰個呀？」
我：「藥房？藥房入面有個醫生？」
佢：「係呀，上次我唔見咗啲藥，得返兩粒仔，我咪去問吓佢有冇得配俾我。佢嗰度呀！賣到好貴㗎！你呢度就平得多啦！」
我：「咁你俾佢做咩呀？」
佢：「賣返俾佢囉」
我：「佢叫你咁做呀？即係佢叫你喺我哋度拎多啲藥，然後賣俾佢？咁樣你賺到幾多錢呀？」
佢：「冇呀，佢冇嗌我咁做㗎，我見佢賣得咁貴，我咪賣啲俾佢囉」
我俾你激死啦阿婆！
我：「佢哋唔會要㗎～而且佢賣俾你個價唔等如係佢個入貨價啊，可能佢入貨價平過你都唔奇㗎～」
佢望望手上嘅藥：「吓？即係佢哋呃我呀？」
我：「唔係呃～只係定價上間間都唔同～」
佢：「佢嗰日仲同我講呢隻藥好值錢，好貴㗎，係私家先會有呢啲靚藥」
我：「呢啲聽完就算啦～」
佢垂頭喪氣：「我仲諗住有餐晏仔賺可以去食牛腩豬腸麵」
我：「你血壓高就唔好食咁多呢啲嘢啦～食清啲啊」
佢：「我食清啲都係冇得停藥啫，食又係死，唔食又係死」
【診所職場事】有日兩婆孫嚟到診所。
婆婆行埋嚟同我講：「唉，同佢登記啦」
我：「小朋友睇過未啊？」
佢：「佢阿媽成日帶佢嚟㗎啦！你登記啦！」
又唔駛咁快醒到我一臉屁嘅～
撰文：珍寶豬
我：「咁有冇覆診卡俾我，或者登記嘅電話號碼？」
佢問孫仔：「你阿媽幾號電話呀？」
孫仔口窒窒回應：「XXXX-XXXX」
我搵到紀錄：「你係咪叫乜乜乜呀？」
孫仔點頭。我：「登記咗㗎啦，咁你哋坐坐先，等嗌名得㗎啦」
婆婆拍拍孫仔個頭：「講個電話都講到一舊舊，梗係食得西藥多食到個人恰恰吓」
佢哋坐低後，婆婆唔知係咪越坐越激心，開始發火炳孫仔：「你呀！成日食埋咁多西藥呀！唔曉高㗎！會變侏儒㗎！」
咦，婆婆對藥物有自己嘅一番見解咁喎～
婆婆繼續講：「你唔知你阿媽點做人阿媽㗎，成日塞西藥俾個仔食，冇事都食到有事啦！越諗越唔妥啦，都唔知係咪個醫生有問題！有咩可能睇完一次又一次呀？慌死唔係俾啲會上癮嘅藥你食呀？」
孫仔，你平時喺屋企會追藥食嗎？
婆婆拉起孫仔：「咪啦，我同你去睇中醫！走啦」
孫仔扯返低婆婆：「唔得㗎，阿媽會鬧我哋㗎！」
婆婆覺得孫仔言之有理坐返低：「係喎，咁你睇完呢個再同我去睇中醫啦」
我怕出事就開口講：「婆婆呀，西藥唔可以同中藥一齊食㗎，同一日內都唔好啦」
婆婆：「你咁霸道㗎咩？中藥都冇話唔可以同你啲藥一齊食啦！」
我：「如果大家都有藥性嘅，真係唔可以一齊食㗎」
婆婆：「我而家冇話要一齊食，你唔俾我睇完唔食㗎？」
…你咁講，我都冇嘢好反駁啦，家陣小朋友齊嗌交咩～
我：「冇一齊食就最好啦，小朋友你都記住西藥同中藥係唔可以一齊食喎，知唔知呀？」
孫仔點頭。婆婆：「多多事幹」
呢啲多事都係唔想你搞出人命啫～
延伸閱讀：
診所職場事【寶豬趣聞】被HIGH死的太太 上集
【診所職場事】有晚有位先生睇完醫生，出埋藥～
我：「呢度三百呀」
佢打開銀包望望，之後哄埋嚟同我講：「淨係收現金？」
我：「係呀」
佢拎出幾張紙幣：「三百呀，呢度」
撰文：珍寶豬
我接過，望望手上嘅紙幣：「咦？你係咪俾錯我呀？呢幾張台幣嚟喎？」
佢：「我係得呢啲咋」
我：「我哋唔收外幣㗎，而且三百蚊係港幣喎～你台幣三百嘅話係港幣一百蚊都冇喎？」
佢：「你話三百㗎嘛」
我頂你啦，你不如俾盡啲，俾300YEN我？你唔好再惹起我把火啦，我冇得去旅行見到外幣會殺人㗎！
我：「呢度香港地方，正常人都知係用港幣結算㗎啦，先生，你唔好玩啦」
佢：「你話收現金我俾咗現金你啦喎，我係得呢啲咋」
佢打開銀包俾我睇，又真係全部台幣喎！
我：「我哋淨係收港幣㗎咋，或者你出去拎錢啦，對面都有櫃員機」
佢：「姑娘，我都好講道理嘅，我就唔係專登做西客留難你」
係咩？你大大個西字寫上臉啦喎。
我：「我明～不過我哋只收港幣現金」
佢：「咁我係冇嘅話，咁點呀？」
你大大個樣『奈我咩何呀～吹咩？』，冇嘅，你做初一我做十五。
我：「冇咩嘅，你俾唔到嘅，我哋取消你張病假紙同睇醫生紀錄，啲嘢收返啫，唯有當你冇嚟睇過啦」
佢口窒窒：「我啱啱落機咋嘛，我今日一定要攞假紙㗎」
我露出笑容：「你一定要攞病假紙，我一定要收足港幣現金」
佢：「你幾點收工呀？」
我：「我哋今日收九點」
佢：「我晏啲返嚟俾錢得唔得呀？」
我：「得呀，冇問題，九點前返嚟俾錢就得㗎啦」
佢邊講邊離開：「台幣都係三百啫」
你老闆出糧用台幣計算好冇？
